O se Eseta e Faatotonugalemu i le Faaola

Sa ou faatauina foi se pusa tele o faatusa o Iesu Keriso mo le Eseta. I le taimi muamua sa ou manatu o le a ou nanaina i latou i la’u aoga atoa. Ae ina ua vaai tagata i le aoga i le pusa, sa latou fesili atu mo ni faatusa. Sa amata foi ona fesili mai faiaoga. Ona fesili mai lea o tamaiti ou te le’i manatu lava o le a manao i se faatusa o Iesu mo se tasi. Ma o lea na ou tuuina atu ai i tagata uma sa ou vaai i ai.

Sa le’i fefe le Faaola e talanoa atu i soo se tasi, e oo lava i tagata e sili ona faate’aeseina o Lona nuu. Sa faauo o Ia ma i latou. Sa Ia faaaluina le taimi ma i latou. Sa Ia talisua faatasi ma i latou. O le tufaina atu o faatusa na aoaoina ai a’u ina ia ou fiafia atili, e pei o le Faaola. Sa aoao mai ai foi ia te a’u e tusa lava po o ai oe, e tusa lava po o le a lou manatu i mea ua e faia, e i ai lava i taimi uma se avanoa mo Iesu Keriso i lou olaga.

I lo’u olaga atoa sa ou mafaufau ai, e faapefea ona ou maua le Togiola a le Faaola? Ae o lenei Eseta, sa ou aoaoina ai afai ou te faia ni suiga i lo’u olaga ia avea atili ai e faapei o le Faaola, o Lona alofa tunoa togiola o loo galue i lo’u olaga. Ma afai ou te taumafai i aso taitasi e sui mea iti, ona amata lea ona ou lelei atili.

Mo ni nai tausaga i lo’u olaga, sa ou tauivi ai ma le faaaogaina o ponokalafi. Ina ua mae’a se lesona i le seminare, sa musuia a’u e talanoa i lo’u epikopo. Sa sili atu ona faigofie le amata faatoilaloina la’u tauiviga i le taimi lava na iu ai ina ou ta’u atu i lo’u epikopo ma o’u matua, auā sa faigata tele ona faagasolo na o a’u.

Sa amata ona ou taumafai e tatalo ma faitau a’u tusitusiga paia i aso taitasi, ma sa ou taumafai ia ou agalelei atili i le aoga. O lena mea sa fesoasoani ia te a’u auā sa ou taulai atili atu ai i le Faaola nai lo a’u agasala. Sa sili atu ona ou liliu atu ia te Ia nai lo le mea sa ou i ai i le taimi ua tuanai.

E ala i le Togiola a Iesu Keriso, ua ou faatoilaloina ai la’u tauiviga ma ponokalafi. Ua avea atili a’u ma tagata e finagalo le Atua ou te avea ai. O lea la ua mafai ona ou faamanuiaina le faamanatuga ona ua suia a’u e le Faaola ma faamamaina a’u. Ou te faafetai i le agavaa e faaaoga le perisitua e faamanuia ai olaga o i latou o siomia a’u.

O le tausaga lenei i le seminare, sa ou maua ai se aafiaga manaia tele ina ua matou talanoa e uiga i le taulaga a le Faaola. Sa ou manatu a o puapuagatia o Ia, semanu e mafai lava ona Ia taofia i soo se taimi. Ae sa ou vaai faalemafaufau ia te Ia o mafaufau, “Leai, e tatau ona ou faia pea lenei mea. E tatau ona ou faia lenei mea mo Ben. E na te manaomiaina lenei mea.” Ia te a’u lava ia, o lena manatu na fesootai moni ai lava la’u sootaga ma le Faaola i le Eseta.

O le Eseta e sosoo ai, atonu o le a ou galue i se isi ata piliki o Iesu. E mautinoa lava ou te manao e tufa atu nisi faatusa. Po o le fea lava le itu, o le a ou mafaufau e uiga i puapuaga o Keriso ma Lana Togiola mo au. Ona o Ia, ua mafai ai ona ou salamo i au agasala ma toe foi atu ai ia te Ia ma le Tama Faalelagi i se aso.

Ou te iloa na soifua le Faaola ma maliu mo i tatou taitoatasi ma Na te silafia i tatou ma mea tatou te manaomia. Afai tatou te taumafai moni lava, e mafai ona tatou maua Lona mana o le faamafanafanaga ma suiga, ma e mafai ona avea i tatou ma tagata sili atu ona lelei.