O La’u Osana

O se tasi o mataupu e sili ona ou fiafia i ai o le Feagaiga Fou o loo talanoa mai e uiga i le ulufale atu faatupu o Iesu Keriso i Ierusalema. Sa alalaga le motu o tagata, “Osana i le Alo o Tavita: Ia manuia le afio mai i le suafa o le Alii; Osana i mea aupito a luga.” (Mataio 21:9). Soo se taimi lava ou te faitauina ai lenei mea, ou te manatu: O le a la’u osana?

Sa i ai se tulaga o le lē manino o la’u tautala i lo’u olaga atoa. E i ai taimi sa ou lagona ai le le fiafia ma le lotovaivai ona sa le mafai ona ou faailoa atu a’u lava i le ala sa ou manao ai. Sa ou manao e tautala atoatoa poo le le toe tautala lava. Ou te popole lava i taimi uma pe a ou tautala atu i luma o isi pe e tusa lava foi pe ou te tatalo leotele. Sa ou aioi atu ma le lē leoa mo le onosai, filemu, ma le fesoasoani i le tele o taimi. O se tasi lenei o a’u osana patino—o la’u tagi mo le laveaiina.

E pei lava ona le faatuatuana’i e Keriso ia tagi a tagata i Ierusalema, Na te le’i faatuatuana’i foi lava la’u tagi. Na te le’i aveesea le tulaga le manino o la’u tautala, ae ua Ia faamalosia a’u i auala ou te le’i faamoemoeina. Ua Ia fesoasoani mai ia te a’u ia lagona le filemu i taimi o le atuatuvale ma iloa ai o lo’u leo, e ui i se tulaga faaletonu e pei ona i ai, ua lava lea mo Ia.

E tofu i tatou ma se mea i o tatou olaga lea e tuuina ai i tatou i o tatou tulivae. O nisi taimi, atonu tatou te lagona ai e le taliina a tatou tagi. Ae e faafofoga o Ia i osana uma. Ma i Lana ala atoatoa ma le taimi, o le a Afio mai o Ia e fesoasoani mai ia i tatou.

I Ketesemane, sa puapuagatia Keriso mo a tatou agasala ma lagonaina o tatou tiga ma o tatou tauiviga. O loo faaauau pea ona Ia taialaina ma faamafanafana i latou uma o e liliu atu ia te Ia ma le Tama Faalelagi. O le Keriso lava lea e tasi na puapuagatia mo i tatou i Ketesemane ma luga o le satauro na toetu mai foi mai le tuugamau, na faatoilaloina le oti ina ia mafai ona tatou maua le faamoemoe. O Lona Toetu o le tali tupito lea i osana uma.