Aua Lava Nei Aunoa ma le Faamoemoe
Pe a tatou mafaufau i mea na faia e le Faaola mo i tatou, e mafai ona tatou faaauau pea ona o a’e i luga, i le iloaina o loo faatasi pea o Ia ma i tatou.
Ata na tusia e Albert Espi
Vaai faalemafaufau i ou lima o nonoaina i tua o lou tua, o ou vae ua fusia faatasi, ona togi loa lea i totonu o se vai loloto e iva futu le loloto! O le a se mea o le a e faia? Pe o le a e tauivi e faaopeopea pea ma e vaivai ai oe lava, pe e te tumau i le toafimalie ma saili se auala e sao mai ai i lenei tulaga faigata?
O na aoaoga ina ia avea ma SEALs o le Neivi a le Iunaite Setete e feagai ma lenei luitau tonu lava. E ta’ua lena mea o le “puipuia mai le malemo.” O le faamoemoega o le faamaonia lea o lo latou gafatia e ola ai i le vai i ni tulaga eseese. O le taimi lava e noatia ai i latou ma faapa’ū ifo i totonu o le vai, o se vaega o le suega e manaomia ai ona latou magoto ifo i le pito i lalo o le vai e aunoa ma le popole, faaaoga o latou vae e tulei ese ai le pito i lalo, oo atu i le pito i luga, ona manava loa lea a o le’i toe magoto. E toe faia ma toe faia lenei vaega mo se taimi faatulagaina.
O le toatele o i tatou o le a le oo i aoaoga o le SEAL a le Neivi, ae atonu e i ai nisi o mea e mafai ona tatou aoao mai ai—ma atonu foi e maua ai se agaga faafetai sili atu mo Iesu Keriso ma Lana Togiola i le ala.
O Lou Faaola e Ala i Mea Uma
E faalagolago le au SEAL i a latou aoaoga faamasani ma tuutuuga ina ia mafai ai ona oo atu i lenei suega faigata—ma e tatau ona latou faamae’aina uma e i latou lava. O le a tatou feagai uma lava ma luitau o le olaga, ae i se tulaga e le tutusa ai ma le SEALs i a latou aoaoga faamasani, tatou te lē feagai lava ma ō tatou luitau, na o i tatou.
Pe a noatia i tatou i le agasala, popole, faavauvau, po o soo se isi lava luitau ma lagona e pei ua tatou magoto, e mafai ona tatou liliu atu ia Iesu Keriso. Pe a tatou lagonaina e pei ua tatou i ai i le pito i lalo ma o le a le toe foi mai lava, e mafai ona tatou manatua ua uma ona i ai le Faaola iina, ma o le a Ia tuuina mai ia i tatou le malosi e tulei ai i luga, toe manava, ma faaauau pea. Faatasi ai ma Ia, tatou te le aunoa lava ma se faamoemoe.
O Iesu Keriso o lou Faaola mai le agasala ma le oti. O Iesu Keriso o lou Togiola pe a e le atoatoa ma e manaomia ona faaatoatoaina faaleagaga. O Iesu Keriso o lou Faamalologa mai tiga faalelagona, faaleagaga, ma o nisi taimi o tiga faaletino ma tiga lea e na o Ia lava e mafai ona faamaloloina. O nei suafa ma isi mo Iesu Keriso e faasino i le mea moni lea e faapea o Ia o le Tagata e liliu atu i ai, aemaise lava pe a oo ina faigata le olaga.
Faatasi ai ma le latalata mai o le Eseta, tatou te faamanatuina ai le Toetu o Iesu Keriso. O loo soifua o Ia! Ma talu ai o loo soifua o Ia, o le a tatou toe ola ai ma maua le folafolaga o le ola e faavavau. Ae a o lei Toetu o Ia, sa puapuagatia le Faaola i Ketesemane ma maliu i luga o le satauro mo i tatou auā e alofa o Ia ia i tatou. Sa “afio ifo o Ia i lalo o mea uma”—ma mafatia e le gata i a tatou agasala, ae sa oo foi i ituaiga tiga uma, faanoanoaga, puapuaga, ma faaosoosoga—ina ia mafai ona Ia silafia le ala e fesoasoani ai ia i tatou (Mataupu Faavae ma Feagaiga 88:6; tagai foi i le Alema 7:11).
Silasila i Lou Faamoemoe ia te Ia
Ina ua faasatauroina le Faaola, sa foliga mai ua leai se faamoemoe o mea uma. Sa matuā lofituina Ona soo. Sa latou mulimuli ia te Ia, talitonu ia te Ia—ma o lenei ua maliu o Ia. Ina ua faataoto Iesu i se tuugamau, sa latou feagai ma le faanoanoa ma le lē mautonu. Ae o le tolu aso mulimuli ane, i le Aso Sa, sa gaogao ai le tuugamau. O Iesu Keriso ua toetu mai! O le mea na foliga mai ua leiloa i le taimi nei ua liliu atu i le faamoemoe!
Afai o ni mea ua lagona ai le pogisa ma le lotovaivai—e pei ua lafoina oe i totonu o se vaitaele ma fusi ou lima ma ou vae—ma e te le vaaia se auala e alu ese ai, faaalu sina taimi e saili ai le faamoemoe ia Iesu Keriso, ma manatua e te le o i ai i le iuga.
E lei oo atu le Faaola i lena Aso Sa fiafia o le Eseta e aunoa ma le onosaia muamua o Ketesemane ma le satauro i aso e tolu ua mavae. O lea, afai o loo e feagai ma se taimi faigata, aua e te fiu! E pei ona saunoa Elder Joseph B. Wirthlin (1917–2008) o le Korama a Aposetolo e Toasefululua i se tasi taimi, “I le pogisa o lo tatou faanoanoa, o le a oo mai le Aso Sa. … Po o le a lava lo tatou faavauvau, o le a oo mai le Aso Sa.”
E ala i Lana taulaga togiola ma le Toetu, o loo i ai pea Iesu Keriso iina e fesoasoani ia te oe ia maua le filemu ma agai i luga i le sili atu nai lo le mea e mafai ona e faamoemoe i ai.