O se Malaga i le Malumalu

Ata na tusia e Katelyn Budge

Sa i ai se taimi ou te le’i asiasi ai lava i le malumalu mo le tusa ma le ono tausaga. O nei tausaga o ni taimi sili ona pogisa o lo’u olaga auā sa maliu foi lo’u tina i totonu o lenei vaitaimi. Sa ou manao ou te alu i le malumalu, ae pe a ma se itula mai le fale, ma sa leai sa’u tupe mo femalagaaiga ma e leai se tasi e aveina a’u.

O le tausaga na te’a nei sa valaauina ai a’u e avea ma peresitene o le vasega a Tamaitai Talavou. Ina ua fai mai lo’u taitai o Tamaitai Talavou ia te a’u e fesoasoani i lana fuafuaga o gaoioiga mo le tausaga, sa ou ta’u atu ia te ia le mea muamua e tatau ona matou faia o le o lea i le malumalu o se vasega. Ina ua ou faasilasila atu lenei mea i tamaitai talavou, sa matuai fiafia lava i latou! Mo le toatele o i latou, o lo latou taimi muamua lea e auai ai. Sa matuā ou tatalo ma anapogi a o matou saunia mo le malaga. Ou te le’i manao lava e i ai se mea e sese.

I totonu o le malumalu, sa ou lagonaina le faamaloloina mai avega uma. Sa ou folafola atu e asiasi soo i le malumalu. O se aafiaga matagofie ma se faamanuiaga. Sa ou matuā fiafia lava ona sa matou auai ma o’u uso a talavou i le galuega tele a lo tatou Tama Faalelagi.

Ou te iloa o le malumalu o le maota paia o le Alii, lea e faatinoina ai sauniga paia. O iina, e mafai ai ona tatou tagi atu i le Tama Faalelagi i le tatalo, ma o le a Ia faasa’oina mea i Lona taimi, faatumuina i tatou i le alofa, ma aumaia ia i tatou le filemu e faavavau. Ou te iloa a tatou vaai atu ia Keriso, o le a tatou vaai i vavega tatou te manaomia. O i tatou o fanau faapelepele a lo tatou Tama Faalelagi, ma o loo i ai Sana galuega tele mo i tatou e fai—faapotopotoina o Isaraelu i itu uma e lua o le veli.