Faamanatuina o le Eseta

1. Fuamoa o le Eseta

Fuamoa, fuamoa, fuamoa. I le salafa o le lalolagi, o fuamoa o le Eseta e teuteuina, sailia, faataavale, ta’ei, ma ‘ai. I Siamani ma Auseteria, o fuamoa o le Eseta e tautau i luga o laau o le (Ostereierbaum). I Mekisiko, e sasaa ese fuamoa mata mai totonu o le atigi ma faatumulia i fasi pepa ninii felanulanuai (cascarones) ona ta’e lea i luga o le ulu o se tasi.

O le mea moni, e toatele tagata e faaaogaina fuamoa e faamanatu ai le Eseta e aunoa ma le taulai atu i le Faaola. Ua aumaia ia i tatou e taulai atu i le Faaola i a tatou tu ma aga masani o le Eseta. O fuamoa e mafai ona avea ma faatusa o le olaga fou, o se sootaga vave i le toetu. O vali lanumumu sa faaaoga i nisi o aganuu e fai ma sui o le taulaga a le Faaola. Ma a ta’e se fuamoa, e mafai e le atigi ona faamanatu mai ia i tatou le tuugamau avanoa ma le Faaola Toetu. Afai e te le’i faafesootaia au tu ma aga masani o le Eseta ia te Ia, o le taimi lenei e amata ai!

2. Afi o le Eseta

O le i ai o se afitafu o se tu masani o le Eseta, aemaise lava i Siamani, o Netherlands, Kalaotia, ma Finelani.

O le afi i le taimi o le Eseta e mafai ona faamanatu mai ai ia i tatou e vaai atu i le Faaola, o le na te aumaia le malamalama ma le mafanafana i le lalolagi ma o le mea moni, o le Malamalama o le Lalolagi Lava Ia (tagai i le Ioane 8:12).

3. Meaai Faapitoa

I le salafa o le lalolagi i le Eseta, e lua meaai faafaatusa o loo aina pea lava pea: mamoe ma le falaoa.

E mafai e le mamoe ona faasino atu i le Tamai Mamoe a le Atua—le Faaola lava Ia. O le areto e mafai ona faamanatu mai ai ia i tatou Iesu Keriso, o le Areto o le Ola (tagai Ioane 6:35).

4. Lalagaina o Laupama

I nisi o atunuu, e pei o Italia, Sepania, Filipaina, Mekisiko, Aikupito, ma Itiopia, o tagata e filiina laupama po o isi laau i le Aso Sa o le Laupama.

O le Aso Sa o le Laupama o le Aso Sa lea a o lumanai le Eseta ma faamanatu ai le malaga faatupu a Iesu i Ierusalema, ao fola e tagata laupama i Ona luma.

5. Faaleleina o Maua

I Bermuda i le Eseta, sa faalele ai e tagata maua felanulanuai!

O lenei tu masani o se faamanatu malie lea o le Toetu o le Faaola ma le ala na Ia afio a’e ai mulimuli i le lagi.

6. Tapuaiga i le Lotu

Aua nei galo se tasi o tu masani sili ona taua o le Eseta—o le alu i le lotu! Tatou te o i le Lotu i le Aso Sa o le Eseta e aai ma feinu i le faamanatuga ma manatua le Faaola. (Afai o le konafesi aoao o loo i le Eseta, e mafai ona tatou manatua o Ia e ala i le faalogologo atu i ai—ona aai lea ma feinu i le faamanatuga i le vaiaso e sosoo ai.)

A o tatou tausia a tatou feagaiga ma faafouina e ala i le faamanatuga, e faamanuiaina i tatou ia maua pea le Agaga e faatasi ma i tatou. E mafai ona fesoasoani lenei mea ia i tatou e fesootai ai ma le Faaola i le Eseta ma i isi foi aso uma.