Faamanatuina o le Eseta: Na o Mea Moni Lava
O nisi nei o mea atonu e te lei iloaina e uiga i le faamanatuina o le Eseta.
O Le Malaga Faatupu a Keriso i Ierusalema, saunia e Harry Anderson
O le a se mea ua e iloa e uiga i le Eseta? Atonu ua e iloa le vaega aupito sili ona tāua: O se faamanatuina o le taulaga togiola a Iesu Keriso ma le Toetu.
Atonu e i ai ni au fesili o i ai e uiga i le Eseta ma le auala e faamanatuina ai e le toatele o tagata, faapea foi ma le mafuaaga o loo tatou taulai atu i ai i le ala o tatou i ai. O tali nei i ni nai fesili faapena.
O le a le Aso Sa o le Laupama ma le Vaiaso Paia?
O le Vaiaso Paia e faamanatu ai le vaiaso mulimuli o le galuega a Iesu Keriso i le olaga nei. O le Aso Sa o le Laupama o le aso muamua lea o le Vaiaso Paia. E faamanatu ai le aso o le malaga faatupu a Iesu Keriso i Ierusalema, sa tietie atu i se tamai asini, e faataunuuina valoaga. Sa fola e tagata ia lau pama ma lavalava i luga o le ala i Ona luma, ma alalaga, “Osana.” (Tagai i le Mataio 21:6–11.) O lenei mea na tupu i le vaiaso e tasi a o lumanai le Toetu o Iesu Keriso, lea e faamanatuina i le Eseta, o le aso mulimuli o le Vaiaso Paia. O lenei vaiaso e aofia ai foi le Aso Faraile Lelei (faamanatuina o le Faasatauroga ma le tanumiaina o Keriso).
Iesu i Ketesemane, saunia e Dan Burr
O anafea na amata ai e Kerisiano ona faamanatuina muamua le Eseta?
O le uluai faamaumauga ua tatou maua o se faamanatuga o le Eseta o soo se ituaiga e sau mai le ogatotonu o le seneturi lona lua (i se taimi i le va o le 160 ma le 170 T.A.). Peitai, atonu sa faamanatuina e Kerisiano le Faasatauroga ma le Toetu o Iesu Keriso i se isi tulaga talu mai le tele o taimi ua mavae. Talu ai o i latou o e mulimuli ia Iesu Keriso e talitonu i Lana galuega togiola, o le taualuga i le Toetu, o le mea aupito sili lea ona taua na tupu i le talafaasolopito o tagata ola uma, o lea e talafeagai ai lo latou faamanatuina o nei mea na tutupu talu mai uluai aso o le faaKerisiano. O aso nei e mafai ona tatou faamanatuina le Togiola a Keriso ma le Toetu i Aso Sa uma a o tatou aai ma feinu i le faamanatuga.
Aisea e tele ai ina fesuisuiai aso o le Eseta i tausaga taitasi?
E fai si faigata, ae o le fuataga faavae mo le Aso Sa o le Eseta o le: O le aso sa muamua lea pe a mavae le “masina atoa o le paseka,” o le masina atoa muamua lea ina ua mavae le taimi faapitoa o le la ua pasia le ekueta o le tautotogo i le Itulagi i Matu (21 Mati). (E sili atu ona faigata nai lo lena, ae ua lava lena mea.)
O le mafuaaga o lenei fuafaatatau e faatatau i mea moni e lua: (1) o le Faasatauroga o le Faaola na tupu i le taimi o le Paseka, ma le (2) O Lona Toetu na tupu i le aso muamua o le vaiaso (Aso Sa).
Sa finau le au Kerisiano anamua pe sili atu ona tāua le faamanatuina o le Eseta i luga o le Paseka po o se Aso Sa. O le Paseka o se taumafataga faa-Iutaia e fesootai i le kalena faa-Eperu, o se kalena e faitau i le masina lea e le ogatusa ma le kalena e faitau i le la e faaaogaina e le tele o tagata. I le kalena faaEperu, o loo faamanatuina ai le Paseka i le aso lona 14, o le masina lona fitu. Ma le isi, o tausaga uma e lua pe tolu, e faaopoopo ai se masina faaopoopo ina ia tumau ai i le faalaugatasia ma vaitau. O lea la, o le tuufaatasia o le Eseta i le Paseka o lona uiga o le aso o le a feosoosofai solo i le tele o mea ma e seasea ona i ai i se Aso Sa.
Ina ia foia le fesili, sa tonu ai i se aufono Kerisiano i le 325 T.A. e tuufaatasia le aso o loo faamanatuina ai le Eseta.
O lea la, o le faapuupuuina o se tala umi: e faavae i luga o le fuataga na faaaogaina e le toatele o Kerisiano, e mafai ona oo mai le Aso Sa o le Eseta i le vave e pei o le aso 22 o Mati po o le faaiuga o le aso 25 o Aperila.
E Fai ma Faamanatuga ia te A’u, saunia e Walter Rane
Na faapefea ona fesootai ia rapiti ma fuamoa ma le Eseta?
O rapiti o le Eseta (po o isi manu) e tuufua na amata ona faaalia i Europa i le seneturi e 17. O nei mea sa lei taatele seia oo i le seneturi lona 19. E talitonu na nono mai e tagata i latou mai faatusa lē Kerisiano o le vaitau o le tautotogo, faafouga, ma le ola ona faafesootai atu lea o i latou i le Eseta ma le Toetu o Iesu Keriso.
O Iesu ua Afio Mai i Fafo o le Tuugamau, saunia e Dan Burr
Aisea ua tatou taulai tele atu ai i le Eseta?
Ua talosagaina i tatou e le Au Peresitene Sili e siitia a tatou vaeaga e faamanatuina ai le Eseta. “E tusa po o a mea e talitonu pe fai e isi, e ao ona tatou faamanatuina le Toetu mai o lo tatou Faaola soifua e ala i le suesueina o Ana aoaoga ma fesoasoani e faavae ni tumasani o le Eseta i lo tatou sosaiete atoa, aemaise i totonu lava o o tatou aiga. Matou te luiina outou ia faia” (Dallin H. Oaks, “He Is Risen!: A Special Easter Season Message from the First Presidency” [vitio], Potutusi o le Talalelei).