Sau, Mulimuli Mai ia te A’u
Esoto 12
O La Tatou Paseka—o le Faamanatuga
O loo i ai se vaega masani i le va o le Paseka anamua ma la tatou faamanatuga faalevaiaso.
Ata na tusia e Alyssa Tallent
A o le’i mafai e Isaraelu anamua ona tuua lo latou nofopologa i Aikupito, sa talosagaina i latou e usitai i faatonuga patino mai le Alii ina ia faasaoina i latou e le agelu o le faafanoga, pe sopoloa i latou (tagai i le Esoto 12). Ina ua latou tuua Aikupito, sa tausia e Isaraelu se tausamiga i tausaga taitasi, sa ta’ua o le Paseka, e manatua ai le ala na laveaiina ai e le Alii Lona nuu o le feagaiga.
I le vaiaso mulimuli o Lona soifuaga faaletino, sa i ai Iesu Keriso i se tausamaaga o le Paseka. Ua tatou ta’ua nei lena taumafataga o le Tausamaaga Mulimuli. Sa faaaoga e le Faaola lena taimi e faailoa atu ai le sauniga o le faamanatuga, lea ua tatou auai ai nei i vaiaso taitasi. (Tagai i le Mataio 26:26–28; Luka 22:19–20; Mataupu Faavae ma Feagaiga 20:77, 79.)
O mala masani nei e lua i le va o le Paseka muamua, o le Tausamaaga Mulimuli a le Alii, ma le faamanatuga i le asō lea e mafai ona fesoasoani ia i tatou e manatua ai lo tatou laveaiga e ala i le Faaola.
O le Areto
Paseka: Mo aso e fitu, na aai ai Isaraelu i areto e le faafefeteina (lea e vave ona kukaina ma e le vave ona legalegā ma leaga).
Tausamaaga Mulimuli: Sa faamanuia ma tofitofi e Iesu Keriso le areto e le faafefeteina o le Paseka, ma sa Ia tuuina atu i le au soo. Sa Ia fetalai atu ia i latou e aai i le faamanatuina o Lona tino, lea na Ia silafia o le a vave ona motusia ma o le a oti ae o le a toe tu mai.
Faamanatuga: Tatou te aai i le areto e faamanatu ai le tino o Iesu Keriso.
O Iesu Keriso o le Areto o le Ola. E ala i Lona Toetu, o le a tatou toetutu uma ai ma ni tino atoatoa, e le mavavae ese, ma ola pea. Na te laveaiina i tatou mai le oti.
O le Toto o le Tamai Mamoe
Paseka: O le tamai mamoe o le Paseka o se tamai mamoe e le pona, e tasi le tausaga. E faalaloina, ma aumai lona toto i totonu o se pesini. O le Hyssop (o se laau faamanogi meaai) sa loiloi i totonu o le pesini ma faaaoga e faasalalau ai le toto faataamilo i le faitotoa i fafo o le fale. O le faailoga lea i fafo o le faailoaina lea o le nuu o le feagaiga a le Alii ina ia sopoloa e le agelu o le faafanoga ina ia mafai ona laveaiina i latou mai le nofopologa i Aikupito.
Tausamaaga Mulimuli: Sa faaaoga e Iesu Keriso le uaina e fai ma sui o Lona toto. Sa Ia ta’u atu i Ona soo ia feinu i le faamanatuina o Lona toto, lea o le a faamaligiina mo i latou mo le faamagaloina o agasala ma o se vaega o se feagaiga fou.
Faamanatuga: Tatou te inuina le vai e manatua ai le toto o Iesu Keriso.
O Iesu Keriso o le Tamai Mamoe a le Atua. Sa faamaligiina Lona toto a o puapuagatia o Ia mo a tatou agasala ma vaivaiga. O Lona toto—Lana taulaga—ua faamamaina ai i tatou. Na te laveaiina i tatou mai le agasala.