Oa Natia
Mauaina o le Togiola a le Faaola i le Feagaiga Tuai
Vaai toto’a; aoao loloto.
Atonu e manatu nisi tagata o le Feagaiga Tuai, lea na tusia a o le’i fanau mai le Faaola ma e le o ta’ua ai Iesu Keriso i lona suafa, e le tele se tala e uiga i le Eseta. Ae e pei ona faamanino mai e le Tusi a Mamona, sa iloa foi e tagata i aso anamua ma faatuatua i le Faaola (tagai i le Iakopo 4:4).
Sa aoaoina Isaraelu o le faamoemoega o le tulafono a Mose o le faasino atu lea o i latou ia Keriso. Mo se faataitaiga, ina ua faamaloloina i latou mai gata uogo e ala i le tilotilo atu i le gata apamemea sa faatonuina Mose e le Alii e fai, sa aoaoina i latou e Mose o se faatusa lenei o le Faaola, o le a afio mai ma laveai i latou mai a latou agasala (tagai i le Numera 21:7–9; Alema 33:18–20).
Ae paga lea, o le tele o lena vaega manino o loo misi mai le Tusi Paia e pei ona tatou maua i aso nei, ona o suiga—i vaega e faamoemoeina ma vaega tutupu faafuasei—i le aluga o seneturi (tagai i le 1 Nifae 13:23–27).
Ae afai e te vaai, e mafai lava ona e maua le tele o mau faasino i le Faaola ma Lana Togiola i le Feagaiga Tuai. Tatou talanoa e uiga i ni nai mau!
Aso Sa o le Laupama, Ketesemane, ma le Faamasinoga
“O le a alu atu lou Tupu ia te oe: o ia o le amiotonu ma le faaola; e agamalu o ia, o loo tietie i le asini, o le tamai asini foi” (Sakaria 9:9).
Sa faataunuuina lenei mea i le mea ua ta’ua nei o le Aso Sa o le Laupama, i le fitu o aso a o lumanai le Eseta, ina ua ulufale atu ma le manumalo Iesu i Ierusalema (tagai i le Mataio 21:15).
“E moni ua na tauave o tatou tiga, ma na tauave o tatou faanoanoaga: a ua tatou manatu o ia ua taia, ua fasia e le Atua, ma ua faatigaina.” (Isaia 53:4).
I Ketesemane, sa puapuagatia ai le Faaola mo agasala uma—ma lagonaina faanoanoaga, tiga, ma’i, ma puapuaga—o tagata uma na soifua pe o le a soifua mai i le lalolagi. Ona o lenei mea, ua Ia silafia ai le auala e faamafanafana ai i tatou i o tatou tofotofoga (tagai i le Alema 7:11–13; tagai foi i le Mataio 8:17).
“Na faasauaina o ia, sa tigaina foi o ia, ae lē tautala mai o ia; e pei o le tamai mamoe ua taitaiina ia fasia, e pei o le mamoe foi i luma o e sele lona fulufulu, ua faalologo o ia, o ia foi ua le tautala mai” (Isaiah 53:7).
Sa le tali atu Iesu ina ua fesiligia o Ia e le faitaulaga sili (tagai i le Mareko 14:60–61).
O Le Faasatauroga
“Ua punitia a’u e le vao tagata amio leaga: ua tu’ia e i latou o’u lima ma o’u vae” (Salamo 22:16).
“Ua latou tufatufa o’u ofu mo i latou, ua latou fai le vili i lo’u ofu tino ” (Salamo 22:18).
“Na latou avane le mea oona e fai ma’u mea e ai; ua ou fia inu, ona latou avane ai lea o le vineta ou te inu ai” (Salamo 69:21).
O le faasatauroga o se metotia masani o le fasiotiga i lena taimi, ae o fitafita Roma sa faapitoa lava le agaleaga i lo latou tauemuga ma le faapuapuagatiaina o le Faaola (tagai i le Ioane 19:1–3; Mataio 27:34–35, 48).
O Le Toetu
“E faaumatia e ia le oti e faavavau; e soloiesea foi e le Alii o Ieova o loimata i mata uma lava; e faateaeseina foi e ia le gao o lona nuu i le lalolagi uma lava; auā ua fetalai mai Ieova” (Isaia 25:8).
“Auā ua ou iloa, o loo soifua le na te togiolaina a’u, o aso amuli foi e tulai mai ai o ia i luga o le eleele: E ui foi ina faaumatia lenei tino pe a mavae atu lo’u pa’u, ae ou te iloa atu le Atua i lo’u tino.” (Iopu 19:25–26).
Na toetu mai le Alii o Iesu Keriso. O loo soifua nei o Ia! E le mafaitaulia mau ma molimau ua faamaonia ai lenei mea. O le mea e sili atu, na silafia e lo tatou Tama Faalelagi mai le amataga o le a tatou manaomia se Faaola, ma sa Ia saunia Ana fanau e talia le Faaola talu mai taimi o le Feagaiga Tuai.