ផែនការរបស់ព្រះវរបិតាសួគ៌សម្រាប់ក្រុមគ្រួសារ

ដោយអែលឌើរ ឌៀថើរ អេហ្វ អុជដូហ្វ

ក្នុងកូរ៉ុមនៃពួកសាវកដប់ពីរនាក់

ការបង្រៀន ពិធីបរិសុទ្ធ និងសេចក្ដីសញ្ញាទាំងឡាយនៃព្រះវិហារបរិសុទ្ធប្រទានពរដល់ក្រុមគ្រួសារទាំងអស់នៅលើផែនដី ។

ថ្មីៗនេះ ស៊ីស្ទើរ អុជដូហ្វ និងខ្ញុំបានចូលរួមពិធីបុណ្យជ្រមុជទឹកចៅទួតរបស់យើងម្នាក់ ។ នៅពេលយើងមើលទៅកូនចៅជាច្រើនជំនាន់ទាំងនេះប្រារព្ធព្រឹត្តិការណ៍នេះដោយសប្បាយរីករាយ យើងមានអំណរគុណយ៉ាងជ្រាលជ្រៅចំពោះព្រះវរបិតាសួគ៌របស់យើង សម្រាប់ផែនការនៃសេចក្តីសង្គ្រោះរបស់ទ្រង់ដែលមានដល់បុត្រាបុត្រីរបស់ទ្រង់ ។ យើងមានអារម្មណ៍ដឹងថាគ្រួសារ និងសេចក្តីសញ្ញាដ៏ពិសិដ្ឋមានសារសំខាន់ប៉ុនណាចំពោះទ្រង់តាំងពីដើមរៀងមក ។

សារៈសំខាន់នោះអាចរកឃើញនៅក្នុងព្រះគម្ពីសញ្ញាចាស់ អំពីយ៉ាកុបដ៏ស្មោះត្រង់ ដែលបានធ្វើដំណើរយ៉ាងវែងឆ្ងាយ និងលំបាកដើម្បីស្វែងរកប្រពន្ធ ដើម្បីរៀបការនៅក្នុងសេចក្តីសញ្ញា និងបង្កើតគ្រួសារមួយ ។ ល្ងាចមួយ យ៉ាកុបបានឈប់សម្រាកនៅពេលយប់ ហើយមានតែដុំថ្មប៉ុណ្ណោះដើម្បីធ្វើជាខ្នើយកើយ ។ គាត់ប្រហែលជាអស់កម្លាំងខ្លាំងណាស់ពីព្រោះគាត់អាចគេងលង់លក់នៅលើថ្មបាន—ហើយថែមទាំងគេងយល់សប្ដិថែមទៀតផង ។

គាត់យល់សប្តិឃើញថាមានជណ្តើរ១បញ្ឈរនៅលើដី មានចុងទល់នឹងផ្ទៃមេឃ ក៏ឃើញមានពួកទេវតារបស់ព្រះឡើងចុះតាមជណ្តើរនោះ ។

« ព្រះយេហូវ៉ាក៏សណ្ឋិតនៅពីលើជណ្តើរ ទ្រង់មានព្រះបន្ទូលថា យើងជាព្រះយេហូវ៉ាជាព្រះនៃអ័ប្រាហាំជីតាឯង ហើយជាព្រះនៃអ៊ីសាក » ( លោកុប្បត្តិ ២៨:១២–១៣ ) ។

បន្ទាប់មកព្រះអម្ចាស់បានធ្វើការសន្យាពីសេចក្តីសញ្ញាដ៏សំខាន់មួយចំនួនដល់យ៉ាកុប—ការសន្យាដែលទ្រង់បានធ្វើជាមួយនឹងឪពុករបស់យ៉ាកុប គឺអ៊ីសាក និងជីតារបស់គាត់ គឺអ័ប្រាហាំ រួមមាន ៖

ការសន្យាដែលថា យ៉ាកុបនឹងក្លាយជាឪពុករបស់ « គ្នាដ៏ច្រើន » ( លោកុប្បត្តិ ២៨:៣, ១៤ ) ។
ការសន្យាអំពីដីសម្រាប់កូនចៅរបស់យ៉ាកុប ( សូមមើល លោកុប្បត្តិ ២៨:៤, ១៣ ) ។
ការសន្យាដែលថាតាមរយៈយ៉ាកុប និង« គ្រប់ទាំងគ្រួសារនៅផែនដីនឹងបានពរ ដោយសារឯង ហើយនិងពូជឯង » ( លោកុប្បត្តិ ២៨:១៤ បានបន្ថែមការគូសបញ្ជាក់ ) ។

ដោយសារតែបទពិសោធន៍ដ៏ពិសិដ្ឋដែលយ៉ាកុបមានយ៉ាងដូច្នោះទើបគាត់បានប្រកាសថា ៖ « ពិតប្រាកដជាព្រះយេហូវ៉ាទ្រង់គង់នៅទីនេះហើយ ។ … ទីនេះមិនមែនជាអ្វីទេ គឺជាដំណាក់នៃព្រះ ហើយជាទ្វារស្ថាន‌សួគ៌ពិត » ( លោកុប្បត្តិ ២៨:១៦–១៧ ) ។ ដូច្នេះហើយ យ៉ាកុបបានដាក់ឈ្មោះតំបន់នោះថា បេត-អែល ដែលមានន័យថា « ដំណាក់នៃព្រះ » ( សូមមើល លោកុប្បត្តិ ២៨:១៩ ) ។

ព្រះវិហារបរិសុទ្ធគឺប្រៀបដូចជាជណ្តើរដែលយ៉ាកុបបានមើលឃើញដែរ ។ ការបង្រៀន ពិធីបរិសុទ្ធ និងសេចក្តីសញ្ញាទាំងឡាយនៅក្នុងដំណាក់នៃព្រះអម្ចាស់ភ្ជាប់ស្ថានសួគ៍ និងផែនដីឲ្យជាប់គ្នា ។ សេចក្តីសញ្ញាអាចប្រៀបទៅនឹងការឡើងនៅលើជណ្តើរដែលធ្វើឲ្យយើងកាន់តែខិតទៅជិតនឹងព្រះអម្ចាស់ ។ ហើយ តាមរយៈការបម្រើរបស់យើងនៅក្នុងព្រះវិហារបរិសុទ្ធដ៏ពិសិដ្ឋ នោះយើងកំពុងផ្តល់ពរដល់ « គ្រប់ទាំងគ្រួសារនៅផែនដី »—ទាំងនៅក្នុងអតីតកាល បច្ចុប្បន្នកាល និងអនាគតកាល ។

ទស្សនៈដ៏រីករាយនៃស្ថានសួគ៌

អែលឌើរ ប្រ៊ូស ស៊ី ហាហ្វិន ដែលជាសមាជិកកិត្តិយសនៃពួកចិតសិបនាក់ ធ្លាប់បានទទួលទូរសព្ទមកពីនិពន្ធនាយកទស្សនាវដ្តីព័ត៌មានជាតិមួយ ដើម្បីនិយាយអំពីសៀវភៅមួយដែលបង្ហាញពីប្រវត្តិនៃជំនឿអំពីស្ថានសួគ៌នៅទូទាំងសាសនាផ្សេងៗគ្នា ។

អែលឌើរ ហាហ្វិនបានមានប្រសាសន៍ថា « អ្នកនិពន្ធបានរកឃើញថា សាធារណជនមានចិត្តចង់ដឹងយ៉ាងខ្លាំងអំពីស្ថានសួគ៌—និងក្រុមគ្រួសារនៅស្ថានសួគ៌ » ។ ប៉ុន្តែ « ព្រះវិហារគ្រិស្ដសាសនាភាគច្រើនផ្តល់នូវការឆ្លើយតបតិចតួចចំពោះការចង់ដឹងចង់ឮផ្ទាល់ខ្លួននេះ »—ដោយលើកលែងតែ ៖ សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។

នៅក្នុងសាសនាចក្រដែលបានស្តារឡើងវិញរបស់ព្រះអង្គសង្គ្រោះ យើងមានព្រះវិហារបរិសុទ្ធដ៏ពិសិដ្ឋ ។ យើងមានអាពាហ៍ពិពាហ៍ដ៏អស់កល្បជានិច្ច ដោយមានសិទ្ធិអំណាចនៃការផ្សារភ្ជាប់ដែលផ្តល់ពរជ័យលើសពីការស្លាប់ខាងសាច់ឈាម ។ យើងមានការសន្យាអំពីអនាគតដ៏អស់កល្បជានិច្ចជាមួយមនុស្សជាទីស្រឡាញ់នៅក្នុងទីវត្តមានរបស់ព្រះវរបិតា និងព្រះរាជបុត្រា ។ ដោយសារចំណុចទាំងអស់នេះ អ្នកនិពន្ធបានសន្និដ្ឋានថា គោលគំនិតរបស់ពួកបរិសុទ្ធថ្ងៃចុងក្រោយអំពីស្ថានសួគ៌គឺពេញលេញបំផុត—ហើយ ខ្ញុំនឹងបន្ថែមថា មានសុភមង្គលជាងគេបំផុត ។

ដូចដែលប្រធាន រ័សុល អិម ណិលសុន បានបង្រៀនថា « ព្រះអម្ចាស់ … បានបង្កើតផែនដី ដើម្បីឲ្យយើងអាចទទួលបានរាងកាយ និងបង្កើតក្រុមគ្រួសារ ។ ទ្រង់បានបង្កើតសាសនាចក្ររបស់ទ្រង់ឡើងដើម្បីលើកតម្កើងក្រុមគ្រួសារ ។ ទ្រង់ប្រទាននូវព្រះវិហារបរិសុទ្ធ ដើម្បីឲ្យក្រុមគ្រួសារអាចនៅជាមួយគ្នាជានិរន្តរ៍ » ។

ការការពារគ្រួសារ

យើងមិនគួរភ្ញាក់ផ្អើលទេថា អ្វីដែលសំខាន់ខ្លាំងបំផុតចំពោះផែនការរបស់ព្រះនឹងមានការប្រឆាំងជំទាស់នោះ ។ ប្រធាន អិម រ័សុល បាឡឺដ ( ឆ្នាំ១៩២៨–២០២៣ ) បានមានប្រសាសន៍ថា « សាតាំងដឹងថា វិធីដ៏ប្រាកដបំផុត និងមានប្រសិទ្ធភាពបំផុតដើម្បីបង្អាក់កិច្ចការរបស់ព្រះអម្ចាស់ គឺការបន្ថយប្រសិទ្ធភាពនៃគ្រួសារ និងភាពបរិសុទ្ធនៃគេហដ្ឋាន » ។

ដោយដឹងពីអ្វីដែលយើងដឹង នោះយើងគួរតែស្ថិតក្នុងចំណោមអ្នកការពារគ្រួសារយ៉ាងស្វិតស្វាញបំផុតរបស់ពិភពលោកនេះ ។

តើយើងធ្វើកិច្ចការនេះបានដោយរបៀបណា ?

យើងអាចធ្វើ « កិច្ចការតូចតាច និងងាយ » ( អាលម៉ា ៣៧:៦ ) ដែលពង្រឹងទំនាក់ទំនងគ្រួសារ ។ ការណ៍នេះរួមបញ្ចូលទាំងការធ្វើតាមគោលការណ៍ដែលមានចែងនៅក្នុងការប្រកាសអំពីក្រុមគ្រួសារ ៖ « សេចក្តីជំនឿ ការអធិស្ឋាន ការប្រែចិត្ត ការអភ័យទោស ការគោរពគ្នា សេចក្តីស្រឡាញ់ សេចក្តីមេត្តាករុណា ការងារ និងកម្មវិធីកំសាន្តល្អៗនានា » ។ ដោយមិនគិតពីស្ថានភាពគ្រួសារបច្ចុប្បន្នរបស់អ្នក អ្នកអាចបង្ហាញតាមរយៈសកម្មភាពរបស់អ្នកថា ទំនាក់ទំនងគ្រួសារមានសារៈសំខាន់ដ៏អស់កល្បចំពោះអ្នក ។

តាមរយៈការរស់នៅ ការការពារ និងការចែកចាយសេចក្តីពិតដ៏អស់កល្បជានិច្ចអំពីក្រុមគ្រួសារ យើងអាចជួយអ្នកដទៃមើលឃើញថា « គ្រួសារជាផ្នែកដ៏សំខាន់មួយ នៅក្នុងផែនការរបស់ព្រះដ៏បង្កបង្កើត សម្រាប់គោលដៅដ៏នៅអស់កល្បជានិច្ចនៃកូនចៅរបស់ទ្រង់ » ហើយថា « ព្រះវិហារបរិសុទ្ឋដ៏ពិសិដ្ឋអាចធ្វើឲ្យបុគ្គលម្នាក់ៗត្រឡប់ទៅកាន់វត្តមាននៃព្រះរិញ ហើយដើម្បីឲ្យក្រុមគ្រួសារអាចត្រូវបានរួបរួមគ្នាដ៏អស់កល្បជានិច្ច » ។

« យើងនៅជាមួយនឹងឯង »

នៅពេលដែលស៊ីស្ទើរ អុជដូហ្វ និងខ្ញុំមើលសមាជិកគ្រួសាររបស់យើងធ្វើសេចក្តីសញ្ញាដ៏ពិសិដ្ឋជាមួយនឹងព្រះវរបិតាសួគ៌ដ៏ជាទីស្រឡាញ់ និងអស់កល្បជានិច្ចរបស់យើង នោះដួងចិត្តរបស់យើងពោរពេញដោយសេចក្តីអំណរ និងការដឹងគុណ ។ យើងរីករាយមិនត្រឹមតែចំពោះកូនៗរបស់យើង និងកូនៗរបស់ពួកគេប៉ុណ្ណោះទេ ប៉ុន្តែថែមទាំងចំពោះឪពុកម្តាយរបស់ពួកយើង និងឪពុកម្តាយរបស់ពួកគេផងដែរ ។ យើងពិចារណាដោយក្តីស្រឡាញ់យ៉ាងជ្រាលជ្រៅអំពីរបៀប ដែលសេចក្តីសញ្ញានៃដំណឹងល្អបង្រួបបង្រួមយើងគ្រប់ជំនាន់ទាំងអស់ ។

ពរជ័យដែលព្រះអម្ចាស់បានសន្យាដល់អ័ប្រាហាំ អ៊ីសាក និងយ៉ាកុបនៅក្នុងសុបិនរបស់គាត់ថាមានអ្វីៗគ្រប់យ៉ាងទាក់ទងនឹងក្រុមគ្រួសារ ។ ហើយពួកលោកបានពង្រីកទៅដល់កូនៗនៃសេចក្តីសញ្ញារបស់ទ្រង់ ទាំងអស់ —រួមទាំងក្មួយៗ និងខ្ញុំ ។ ព្រះអម្ចាស់បានមានបន្ទូលថា « មើលយើងនៅជាមួយនឹងឯង យើងនឹងថែរក្សាឯងនៅកន្លែងណាដែលឯងទៅ … ពីព្រោះយើងមិនចោលឯងឡើយ » ( លោកុប្បត្តិ ២៨:១៥ ) ។

ខ្ញុំសូមសន្យាថា នៅពេលដែលក្មួយៗធ្វើតាម និងចែកចាយផែនការរបស់ព្រះវរបិតាសួគ៌របស់យើងសម្រាប់ក្រុមគ្រួសារ នោះទ្រង់នឹងគង់នៅជាមួយក្មួយ ជាពិសេសនៅពេលដែលការសាកល្បងមកដល់ក្មួយ ឬមនុស្សជាទីស្រឡាញ់របស់ក្មួយ ។ ទ្រង់នឹងដឹកក្មួយ លើកក្មួយឡើង និងដឹកនាំក្មួយទៅកាន់ភាពពោរពេញដោយសេចក្តីអំណរជាមួយនឹងទ្រង់ ជាមួយនឹងព្រះរាជបុត្រារបស់ទ្រង់ គឺព្រះយេស៊ូវគ្រីស្ទ និងជាមួយគ្រួសាររបស់ក្មួយ—ដ៏អស់កល្បជានិច្ច ។