ហូសាណារបស់ខ្ញុំ
ពួកយើងម្នាក់ៗមានអ្វីមួយនៅក្នុងជីវិតរបស់យើង ដែលជម្រុញយើងឲ្យលុតជង្គង់អធិស្ឋាន ។
ជំពូកមួយនៅក្នុងព្រះគម្ពីរសញ្ញាចាស់ ដែលខ្ញុំចូលចិត្តជាងគេនិយាយអំពីការយាងចូលទៅក្នុងក្រុងយេរូសាឡិមដោយជោគជ័យរបស់ព្រះយេស៊ូវគ្រីស្ទ ។ ហ្វូងមនុស្សបានស្រែកថា « ហូសាណា ដល់ព្រះវង្សហ្លួងដាវីឌ ព្រះអង្គដែលយាងមកដោយនូវព្រះនាមព្រះអម្ចាស់ ទ្រង់ប្រកបដោយព្រះពរ ហូសាណា នៅស្ថានដ៏ខ្ពស់បំផុត » ( ម៉ាថាយ ២១:៩ ) ។ ហើយនៅពេលណាដែលខ្ញុំអានខនេះ ខ្ញុំគិត ៖ តើអ្វីជាហូសាណារបស់ខ្ញុំ ?
ខ្ញុំបានមានជំងឺម៉្យាងដែលធ្វើឲ្យនិយាយត្រដិតពេញមួយជីវិតរបស់ខ្ញុំ ។ ពេលខ្លះខ្ញុំមានអារម្មណ៍តានតឹង និងបាក់ទឹកចិត្ត ព្រោះខ្ញុំមិនអាចបង្ហាញពីខ្លួនឯងតាមរបៀបដែលខ្ញុំចង់បានទេ ។ ខ្ញុំចង់និយាយឲ្យបានល្អឥតខ្ចោះ ឬមិននិយាយម្តងទៀតទាល់តែសោះ ។ ខ្ញុំតែងតែព្រួយបារម្ភនៅពេលដែលខ្ញុំនិយាយនៅចំពោះមុខអ្នកដទៃ ឬសូម្បីតែនៅពេលដែលខ្ញុំអធិស្ឋានបញ្ចេញសំឡេងឮៗ ។ ខ្ញុំបានទូលសុំដោយស្ងាត់ៗសម្រាប់ការអត់ធ្មត់ ភាពសុខសាន្ត និងជំនួយជាច្រើនដង ។ នេះគឺជាហូសាណាមួយក្នុងចំណោមហូសាណាផ្ទាល់ខ្លួនទាំងឡាយរបស់ខ្ញុំ—ការអធិស្ឋានរបស់ខ្ញុំសម្រាប់សេចក្ដីសង្គ្រោះ ។
គឺដូចកាលដែលព្រះគ្រីស្ទមិនបានព្រងើយកន្តើយចំពោះការអធិស្ឋានរបស់មនុស្សនៅក្នុងក្រុងយេរូសាឡិម នោះទ្រង់មិនដែលព្រងើយកន្តើយចំពោះការអធិស្ឋានរបស់ខ្ញុំឡើយ ។ ទ្រង់មិនបានយកការត្រដិតរបស់ខ្ញុំចេញទេ ប៉ុន្តែទ្រង់បានពង្រឹងខ្ញុំតាមរបៀបដែលខ្ញុំមិននឹកស្មានដល់ ។ ទ្រង់បានជួយខ្ញុំឲ្យមានអារម្មណ៍សុខសាន្តនៅក្នុងគ្រានៃការថប់បារម្ភ ហើយទទួលស្គាល់ថា សំឡេងដែលមានកំហុសរបស់ខ្ញុំគឺគ្រប់គ្រាន់សម្រាប់ទ្រង់ ។
ពួកយើងម្នាក់ៗមានអ្វីមួយនៅក្នុងជីវិតរបស់យើង ដែលជម្រុញយើងឲ្យលុតជង្គង់អធិស្ឋាន ។ ពេលខ្លះយើងអាចមានអារម្មណ៍ថាការអធិស្ឋានរបស់យើងមិនបានទទួលចម្លើយ ។ ប៉ុន្តែទ្រង់បានស្តាប់ឮរាល់ហូសាណាទាំងអស់ ។ ហើយនៅក្នុងរបៀបនិងពេលវេលាដ៏ល្អឥតខ្ចោះរបស់ទ្រង់ នោះទ្រង់នឹងមកជួយដល់យើង ។
នៅក្នុងសួនច្បារគែតសេម៉ានី ព្រះគ្រីស្ទបានរងទុក្ខសម្រាប់អំពើបាបរបស់យើង ហើយទទួលអារម្មណ៍ឈឺចាប់ និងការតស៊ូរបស់យើង ។ ទ្រង់បន្តដឹកនាំ និងលួងលោមដល់អស់អ្នកដែលងាកទៅរកទ្រង់ និងព្រះវរបិតាសួគ៌ ។ ព្រះគ្រីស្ទដដែលនោះដែលបានរងទុក្ខសម្រាប់យើងនៅក្នុងសួនច្បារគែតសេម៉ានី និងនៅលើឈើឆ្កាងក៏បានក្រោកឡើងពីផ្នូរ ដោយការឈ្នះលើសេចក្តីស្លាប់ ដើម្បីឲ្យយើងអាចមានសេចក្តីសង្ឃឹមផងដែរ ។ ការមានព្រះជន្មរស់ឡើងវិញរបស់ទ្រង់ គឺជាចម្លើយចុងក្រោយចំពោះរាល់ ហូសាណាទាំងអស់ ។
អ្នកនិពន្ធរស់នៅក្នុងរដ្ឋកាលីហ្វូញ៉ា ស.រ.អា. ។