បុណ្យអ៊ីស្ទើរ ដែលផ្តោតលើព្រះអង្គសង្គ្រោះ
និងជីវិតដែលផ្តោតលើបុណ្យអ៊ីស្ទើរ
យើងទាំងអស់គ្នាអាចចូលប្រើព្រះចេស្តានៃការលួងលោម និងការផ្លាស់ប្តូររបស់ព្រះអង្គសង្គ្រោះបាន ។
រូបថតដោយ ជេណេ ប៊ីងហាំ
នៅក្នុងថ្នាក់សិក្ខាសាលា យើងបាននិយាយអំពីអត្តន័យពិតរបស់បុណ្យអ៊ីស្ទើរនិងរបៀបដែលយើងគួរប្រារព្ធពិធីនោះ ។ វាមិនត្រឹមតែអំពីស្ករគ្រាប់ និងទន្សាយប៉ុណ្ណោះទេ—វាគឺអំពីព្រះអង្គសង្គ្រោះ ។ ខ្ញុំបានសួរខ្លួនឯងថា « តើប្រពៃណីបុណ្យអ៊ីស្ទើរអ្វីខ្លះដែលខ្ញុំអាចចាប់ផ្តើមនៅក្នុងផ្ទះរបស់ខ្ញុំ ដែលផ្តោតលើព្រះអង្គសង្គ្រោះ ? »
ខ្ញុំចូលចិត្តសាងសង់វត្ថុជាមួយ ដុំឥដ្ឋ® LEGO ។ ខ្ញុំបានរកឃើញរូបភាពរបស់ព្រះអង្គសង្គ្រោះចេញពីបណ្ណាល័យដំណឹងល្អតាមអនឡាញ ហើយបានបំប្លែងវាទៅជាការណែនាំពីដុំឥដ្ឋ ។ ខ្ញុំបានធ្វើការនៅលើរូបភាពដុំឥដ្ឋខណៈពេលដែលខ្ញុំស្តាប់សន្និសីទទូទៅ ។ នៅពេលដែលខ្ញុំបានបញ្ចប់ ខ្ញុំបានព្យួរវានៅក្នុងផ្ទះរបស់ខ្ញុំ ។
ការចែករូបចម្លាក់ព្រះអង្គសង្រ្គោះ
ខ្ញុំក៏បានទិញប្រអប់ធំមួយនៃរូបចម្លាក់របស់ព្រះយេស៊ូវគ្រីស្ទសម្រាប់បុណ្យអ៊ីស្ទើរផងដែរ ។ ដំបូងខ្ញុំគិតថានឹងលាក់រូបចម្លាក់ទាំងអស់នៅជុំវិញសាលារៀនរបស់ខ្ញុំ ។ ប៉ុន្តែនៅពេលដែលមនុស្សនៅសាលាបានឃើញប្រអប់នោះ ពួកគេបានសុំរូបចម្លាក់នោះ ។ លោកគ្រូអ្នកគ្រូក៏បានចាប់ផ្តើមសុំផងដែរ ។ ហើយបន្ទាប់មកក្មេងៗដែលខ្ញុំមិនដែលគិតថា នឹងចង់បានរូបចម្លាក់របស់ព្រះយេស៊ូវក៏បានសុំរូបចម្លាក់មួយដែរ ។ ដូច្នេះខ្ញុំបានផ្តល់រូបចម្លាក់ទាំងនោះទៅឲ្យមនុស្សគ្រប់គ្នាដែលខ្ញុំបានជួប ។
ព្រះអង្គសង្គ្រោះមិនខ្លាចក្នុងការមានបន្ទូលជាមួយនរណាម្នាក់ទេ សូម្បីតែមនុស្សដែលត្រូវបានគេបោះបង់ចោលនៅក្នុងសង្គមរបស់ទ្រង់ក៏ដោយក្តី ។ ទ្រង់គឺជាមិត្តរបស់ពួកគេ ។ ទ្រង់បានចំណាយពេលជាមួយពួកគេ ។ ទ្រង់បានសោយអាហារជាមួយពួកគេ ។ ការចែករូបចម្លាក់បានបង្រៀនខ្ញុំឲ្យមានភាពក្លាហានជាងមុន ឲ្យដូចជាព្រះអង្គសង្គ្រោះដែរ ។ វាក៏បានបង្រៀនខ្ញុំដែរថា មិនថាអ្នកជានរណា មិនថាអ្នកគិតថាអ្នកបានធ្វើអ្វីនោះទេ វាតែងតែមានកន្លែងសម្រាប់ព្រះយេស៊ូវគ្រីស្ទក្នុងជីវិតរបស់អ្នកជានិច្ច ។
ការផ្លាស់ប្តូរតាមរយៈព្រះអង្គសង្គ្រោះ
ពេញមួយជីវិតរបស់ខ្ញុំ ខ្ញុំបានងឿងឆ្ងល់ថា តើខ្ញុំអាចចូលប្រើដង្វាយធួនរបស់ព្រះអង្គសង្រ្គោះដោយរបៀបណា ? ប៉ុន្តែបុណ្យអ៊ីស្ទើរនេះ ខ្ញុំបានរៀនថា ប្រសិនបើខ្ញុំធ្វើការផ្លាស់ប្តូរក្នុងជីវិតរបស់ខ្ញុំ ដើម្បីក្លាយដូចជាព្រះអង្គសង្គ្រោះ នោះព្រះគុណដ៏ធួនរបស់ទ្រង់នឹងដំណើរការនៅក្នុងជីវិតរបស់ខ្ញុំ ។ ហើយប្រសិនបើខ្ញុំព្យាយាមជារៀងរាល់ថ្ងៃ ដើម្បីផ្លាស់ប្តូររឿងតូចតាច នោះខ្ញុំនឹងចាប់ផ្តើមកាន់តែប្រសើរឡើង ។
អស់រយៈពេលពីរបីឆ្នាំក្នុងជីវិតរបស់ខ្ញុំ ខ្ញុំមានបញ្ហាជាមួយការមើលរូបអាសគ្រាម ។ បន្ទាប់ពីមេរៀននៅក្នុងថ្នាក់សិក្ខាសាលាមួយ ខ្ញុំទទួលបានការបំផុសគំនិតឲ្យទៅជួបជាមួយប៊ីស្សពរបស់ខ្ញុំ ។ វាងាយស្រួលជាងក្នុងការចាប់ផ្តើមយកឈ្នះលើឧបសគ្គរបស់ខ្ញុំ នៅពេលដែលខ្ញុំបានប្រាប់ទៅដល់ប៊ីស្សព និងឪពុកម្តាយរបស់ខ្ញុំ ពីព្រោះវាពិតជាពិបាកណាស់ដើម្បីហែលឆ្លងរឿងនោះតែម្នាក់ឯង ។
ខ្ញុំបានចាប់ផ្តើមព្យាយាមអធិស្ឋាន និងអានបទគម្ពីររបស់ខ្ញុំជារៀងរាល់ថ្ងៃ ហើយខ្ញុំបានព្យាយាមមានចិត្តសប្បុរសនៅឯសាលា ។ វាបានជួយខ្ញុំដោយសារតែខ្ញុំបានផ្តោតលើព្រះអង្គសង្រ្គោះកាន់តែខ្លាំងជាងអំពើបាបរបស់ខ្ញុំ ។ ខ្ញុំបានងាកទៅរកទ្រង់ច្រើនជាងខ្ញុំកាលពីមុន ។
តាមរយៈដង្វាយធួនរបស់ព្រះយេស៊ូវគ្រីស្ទ ខ្ញុំបានយកឈ្នះលើឧបសគ្គរបស់ខ្ញុំជាមួយរូបអាសគ្រាម ។ ខ្ញុំកាន់តែក្លាយជាអ្នកដែលព្រះសព្វព្រះទ័យឲ្យខ្ញុំប្រែក្លាយ ។ ឥឡូវនេះខ្ញុំអាចប្រទានពរនៅពិធីសាក្រាម៉ង់បាន ដោយសារតែព្រះអង្គសង្គ្រោះផ្លាស់ប្តូរខ្ញុំ និងសម្អាតខ្ញុំ ។ ខ្ញុំមានអំណរគុណដើម្បីមានភាពសក្តិសមក្នុងការប្រើបព្វជិតភាពដើម្បីប្រទានពរដល់ជីវិតរបស់មនុស្សដែលនៅជុំវិញខ្ញុំ ។
ការតភ្ជាប់បុណ្យអ៊ីស្ទើរជាមួយនឹងខ្ញុំ
នៅក្នុងឆ្នាំនេះក្នុងថ្នាក់សិក្ខាសាលា ខ្ញុំមានបទពិសោធន៍ដ៏អស្ចារ្យមួយ នៅពេលយើងកំពុងនិយាយអំពីពលិកម្មរបស់ព្រះអង្គសង្គ្រោះ ។ ខ្ញុំបានមានគំនិតថា កាលទ្រង់កំពុងរងទុក្ខ ទ្រង់អាចបញ្ឈប់វានៅគ្រប់ពេល ។ ប៉ុន្តែបន្ទាប់មកខ្ញុំស្រមៃថា ទ្រង់គិតថា « អត់ទេ យើងត្រូវបន្តធ្វើការណ៍នេះ ។ យើងត្រូវធ្វើរឿងនេះសម្រាប់ ប៊េន ។ គាត់ត្រូវការការណ៍នេះ » ។ សម្រាប់ខ្ញុំ គំនិតនោះគ្រាន់តែភ្ជាប់ទំនាក់ទំនងរបស់ខ្ញុំជាមួយនឹងព្រះអង្គសង្គ្រោះទៅនឹងបុណ្យអ៊ីស្ទើរ ។
បុណ្យអ៊ីស្ទើរក្រោយ ខ្ញុំប្រហែលជានឹងធ្វើការលើរូបភាពដុំឥដ្ឋមួយផ្សេងទៀតរបស់ព្រះយេស៊ូវ ។ ខ្ញុំពិតជាចង់ចែករូបចម្លាក់បន្ថែមទៀតណាស់ ។ ទោះយ៉ាងណាក៏ដោយ ខ្ញុំនឹងគិតអំពីការរងទុក្ខរបស់ព្រះគ្រីស្ទ និងដង្វាយធួនរបស់ទ្រង់សម្រាប់ខ្ញុំ ។ ដោយសារតែទ្រង់ នោះខ្ញុំអាចប្រែចិត្តពីអំពើបាបរបស់ខ្ញុំ ហើយត្រឡប់ទៅរកទ្រង់ និងព្រះវរបិតាសួគ៌វិញនៅថ្ងៃណាមួយ ។
ខ្ញុំដឹងថា ព្រះអង្គសង្គ្រោះបានរស់នៅ និងសុគតសម្រាប់យើងម្នាក់ៗដោយផ្ទាល់ ហើយថាទ្រង់ជ្រាបដឹងថាយើងជានរណា និងអ្វីដែលយើងត្រូវការ ។ ប្រសិនបើយើងពិតជាព្យាយាមនោះយើងអាចចូលប្រើព្រះចេស្តានៃការលួងលោម និងការផ្លាស់ប្តូររបស់ទ្រង់ ហើយយើងអាចក្លាយជាមនុស្សកាន់តែប្រសើរឡើង ។
អ្នកនិពន្ធរស់នៅក្នុងរដ្ឋ អៃដាហូ ស.រ.អា ។