ចូរមកតាមខ្ញុំ
និក្ខមនំ ១២
បុណ្យរំលងរបស់យើង—ពិធីសាក្រាម៉ង់
ភាពស្រដៀងគ្នាទូទៅរវាងបុណ្យរំលងពីបុរាណ និងពិធីសាក្រាម៉ង់រៀងរាល់សប្តាហ៍របស់យើង ។
រចនារូបភាពដោយ អាលីហ្សា ថាលិនថ៍
មុនពេលដែលពួកសាសន៍អ៊ីស្រាអែលពីបុរាណអាចចាកចេញពីទាសភាពរបស់ពួកគេនៅក្នុងស្រុកអេស៊ីព្ទ ពួកគេត្រូវបានស្នើសុំឲ្យគោរពតាមការណែនាំជាក់លាក់មកពីព្រះអម្ចាស់ ដើម្បីឲ្យទេវតាដែលបំផ្លាញនឹងបង្ហួសពួកគេ ឬរំលងពួកគេ ( សូមមើល និក្ខមនំ ១២ ) ។ បន្ទាប់ពីពួកគេចាកចេញពីស្រុកអេស៊ីព្ទ ពួកសាសន៍អ៊ីស្រាអែលបានប្រារព្ធពិធីបុណ្យជារៀងរាល់ឆ្នាំ ដែលហៅថាបុណ្យរំលង ដើម្បីចងចាំពីរបៀបដែលព្រះអម្ចាស់បានរំដោះប្រជាជននៃសេចក្តីសញ្ញារបស់ទ្រង់ ។
ក្នុងអំឡុងសប្តាហ៍ចុងក្រោយនៃជីវិតរមែងស្លាប់របស់ទ្រង់ ព្រះយេស៊ូវគ្រីស្ទបានគង់នៅឯអាហារមួយពេលនៃបុណ្យរំលង ។ ឥឡូវនេះយើងហៅអាហារនោះថា អាហារយប់ថ្ងៃចុងក្រោយ ។ ព្រះអង្គសង្គ្រោះបានប្រើឱកាសនោះដើម្បីណែនាំអំពីពិធីសាក្រាម៉ង់ ដែលឥឡូវនេះយើងចូលរួមជារៀងរាល់សប្តាហ៍ ។ ( សូមមើល ម៉ាថាយ ២៦:២៦–២៨; លូកា ២២:១៩–២០; គោលលទ្ធិ និងសេចក្ដីសញ្ញា ២០:៧៧, ៧៩ ) ។
នេះគឺជាភាពស្រដៀងគ្នាទូទៅពីររវាងបុណ្យរំលងដំបូង អាហារយប់ថ្ងៃចុងក្រោយរបស់ព្រះអម្ចាស់ និងពិធីសាក្រាម៉ង់សព្វថ្ងៃនេះ ដែលអាចជួយយើងឲ្យចងចាំការរំដោះរបស់យើងតាមរយៈព្រះអង្គសង្គ្រោះ ។
នំប៉័ង
បុណ្យរំលង ៖ អស់រយៈពេលប្រាំពីរថ្ងៃ ពួកសាសន៍អ៊ីស្រាអែលបានបរិភោគនំបុ័ងគ្មានដំបែ ( ដែលលឿនក្នុងការធ្វើ និងមិនចេះដុះផ្សិត និងខូច ) ។
អាហារយប់ថ្ងៃចុងក្រោយ ៖ ព្រះយេស៊ូវគ្រីស្ទបានប្រទានពរ និងកាច់នំបុ័ងដែលគ្មានដំបែនៃពិធីបុណ្យរំលង ហើយទ្រង់បានប្រគល់វាទៅដល់សិស្ស ។ ទ្រង់បានប្រាប់ពួកគេឲ្យបរិភោគវានៅក្នុងការនឹកចងចាំពីរូបកាយរបស់ទ្រង់ ដែលទ្រង់បានដឹងថានឹងត្រូវបំបែកក្នុងពេលឆាប់ៗនេះ ហើយនឹងសុគត ប៉ុន្តែនឹងមានព្រះជន្មឡើងម្តងទៀត ។
ពិធីសាក្រាម៉ង់ ៖ យើងបរិភោគនំបុ័ងនៅក្នុងការរំឭកដល់រូបកាយរបស់ព្រះយេស៊ូវគ្រីស្ទ ។
ព្រះយេស៊ូវគ្រីស្ទគឺជានំបុ័ងជីវិត តាមរយៈការរស់ឡើងវិញរបស់ទ្រង់ យើងទាំងអស់គ្នានឹងបានរស់ឡើងវិញជាមួយនឹងរូបកាយល្អឥតខ្ចោះ មិនពុករលួយ និងអមតៈ ។ ទ្រង់ជួយសង្គ្រោះយើងពីសេចក្តីស្លាប់ ។
ឈាមរបស់កូនចៀម
បុណ្យរំលង ៖ សាច់ចៀមនៃបុណ្យរំលង គឺជាសាច់ចៀមឈ្មោលអាយុមួយឆ្នាំដែលល្អឥតខ្ចោះ ។ វាត្រូវបានសម្លាប់ ហើយឈាមរបស់វាត្រូវបានប្រមូលនៅក្នុងចានមួយ ។ មែកហ៊ីសុប ( ឱសថមួយ ) ត្រូវបានជ្រលក់នៅក្នុងចាន និងប្រើដើម្បីលាបឈាមនោះនៅជុំវិញស៊ុមទ្វារខាងក្រៅផ្ទះ ។ នេះគឺជាសញ្ញាខាងក្រៅដែលកំណត់អត្តសញ្ញាណប្រជាជននៃសេចក្តីសញ្ញារបស់ព្រះអម្ចាស់ ដែលត្រូវបានបង្ហួសដោយទេវតាបំផ្លាញដើម្បីពួកគេអាចបានដោះលែងពីទាសករនៅក្នុងស្រុកអេស៊ីព្ទ ។
អាហារយប់ថ្ងៃចុងក្រោយ ៖ ព្រះយេស៊ូវគ្រីស្ទបានប្រើស្រាដើម្បីតំណាងឲ្យលោហិតរបស់ទ្រង់ ។ ទ្រង់បានប្រាប់សិស្សរបស់ទ្រង់ឲ្យផឹកវានៅក្នុងការរំឭកដល់លោហិតរបស់ទ្រង់ ដែលនឹងត្រូវបានបង្ហូរសម្រាប់ពួកគេសម្រាប់ការរួចពីអំពើបាបនិងជាផ្នែកមួយនៃសេចក្តីសញ្ញាថ្មីមួយ ។
ពិធីសាក្រាម៉ង់ ៖ យើងផឹកទឹកដើម្បីរំឭកដល់ព្រះលោហិតរបស់ព្រះយេស៊ូវគ្រីស្ទ ។
ព្រះយេស៊ូវគ្រីស្ទគឺជាកូនចៀមនៃព្រះ ។ លោហិតរបស់ទ្រង់ត្រូវបានបង្ហូរនៅពេលដែលទ្រង់រងទុក្ខសម្រាប់អំពើបាប និងជំងឺឈឺចាប់របស់យើង ។ លោហិតរបស់ទ្រង់—ការលះបង់របស់ទ្រង់—សម្អាតយើង ។ ទ្រង់ជួយសង្គ្រោះយើងពីអំពើបាប ។