សំឡេងយុវវ័យ
ការធ្វើដំណើរទៅកាន់ព្រះវិហារបរិសុទ្ធ
រចនារូបភាពដោយ ខេតលីន បឺច
មានពេលមួយដែលខ្ញុំមិនបានទៅព្រះវិហារបរិសុទ្ធប្រហែលប្រាំមួយឆ្នាំ ។ ឆ្នាំទាំងនេះគឺជាពេលវេលាដ៏ងងឹតបំផុតនៅក្នុងជីវិតរបស់ខ្ញុំ ពីព្រោះខ្ញុំក៏បាត់បង់ម្តាយរបស់ខ្ញុំក្នុងរយៈពេលនេះផងដែរ ។ ខ្ញុំចង់ទៅព្រះវិហារបរិសុទ្ធ ប៉ុន្តែវាប្រហែលមួយម៉ោងពីផ្ទះ ហើយខ្ញុំមិនមានលុយសម្រាប់ការធ្វើដំណើរ និងគ្មាននរណាម្នាក់ជូនខ្ញុំទៅនោះទេ ។
បន្ទាប់មកកាលពីឆ្នាំមុន ខ្ញុំត្រូវបានហៅឲ្យធ្វើជាប្រធានថ្នាក់យុវនារី ។ នៅពេលដែលថ្នាក់ដឹកនាំយុវនារីរបស់ខ្ញុំបានសុំខ្ញុំឲ្យជួយនាងរៀបចំផែនការសកម្មភាពសម្រាប់ឆ្នាំនេះ ខ្ញុំបានប្រាប់នាងថា រឿងដំបូងដែលយើងគួរធ្វើគឺ ទៅព្រះវិហារបរិសុទ្ធជាក្រុម ។ នៅពេលដែលខ្ញុំបានប្រកាសរឿងនេះទៅកាន់យុវនារី ពួកគេពិតជារំភើបណាស់ ! សម្រាប់ពួកគេភាគច្រើន វានឹងជាលើកដំបូងក្នុងការចូលរួមរបស់ពួកគេ ។ ខ្ញុំបានអធិស្ឋាន និងតមអាហារយ៉ាងច្រើននៅពេលយើងបានរៀបចំសម្រាប់ការធ្វើដំណើរនោះ ។ ខ្ញុំមិនចង់ឲ្យមានអ្វីខុសឡើយ ។
នៅក្នុងព្រះវិហារបរិសុទ្ធ ខ្ញុំមានអារម្មណ៍ធូរស្រាលពីបន្ទុកទាំងឡាយ ។ ខ្ញុំបានសន្យាថានឹងទៅព្រះវិហារបរិសុទ្ធឲ្យកាន់តែញឹកញាប់ ។ វាជាបទពិសោធន៍ដ៏ស្រស់ស្អាត និងជាពរជ័យមួយ ។ ខ្ញុំរំភើបខ្លាំងណាស់ដែលខ្ញុំ និងមិត្តយុវវ័យរបស់ខ្ញុំបានចូលរួមក្នុងកិច្ចការដ៏អស្ចារ្យរបស់ព្រះវរបិតាសួគ៌របស់យើង ។
ខ្ញុំដឹងថាព្រះវិហារបរិសុទ្ធគឺជាដំណាក់ដ៏បរិសុទ្ធរបស់ព្រះអម្ចាស់ ជាកន្លែងដែលពិធីបរិសុទ្ធដ៏ពិសិដ្ឋត្រូវបានអនុវត្ត ។ នៅទីនោះ យើងអាចទូលទៅកាន់ព្រះវរបិតាសួគ៌តាមការអធិស្ឋាន ហើយទ្រង់នឹងធ្វើឲ្យរឿងគ្រប់យ៉ាងត្រឹមត្រូវទៅតាមពេលវេលារបស់ទ្រង់ បំពេញយើងដោយក្តីស្រឡាញ់ និងប្រទានដល់យើងនូវភាពសុខសាន្ត ដ៏អស់កល្បជានិច្ច ។ ខ្ញុំដឹងថានៅពេលដែលយើងសម្លឹងមើលទៅព្រះគ្រីស្ទ យើងនឹងឃើញអព្ភូតហេតុដែលយើងត្រូវការ ។ យើងគឺជាបុត្រាបុត្រីជាទីស្រឡាញ់របស់ព្រះវរបិតាសួគ៌របស់យើង ហើយទ្រង់មានកិច្ចការដ៏អស្ចារ្យមួយសម្រាប់ឲ្យពួកយើងធ្វើ—ការប្រមូលផ្តុំអ៊ីស្រាអែលនៅទាំងសងខាងនៃវាំងនន ។
ព្រេសើស ខេ អាយុ ១៧ ឆ្នាំ រដ្ឋ អាប៊ីអា ប្រទេសនីហ្សេរីយ៉ា
ចូលចិត្តស្តាប់តន្ត្រី ច្រៀង និងបង្កើតមិត្តភក្តិថ្មីៗ ។