អ្នកមិនចាំបាច់ក្លាយជាអ្នកជំនាញទេ

អ៊ីរិក ឌី ស្នាយឌឺ

ទស្សនាវដ្ដីសាសនាចក្រ

« មានទេពកោសល្យ » ឬអត់ មនុស្សគ្រប់គ្នាអាចទទួលបានការបំផុសគំនិត ។

ពួកយើងភាគច្រើនធ្លាប់ជួបប្រទះនឹងស្នាដៃសិល្បៈ ឬការកម្សាន្តដ៏អស្ចារ្យមួយ ហើយគិតថា ៖ « ខ្ញុំសង្ឃឹមថាខ្ញុំអាចធ្វើវាបាន ប៉ុន្តែខ្ញុំមិនមានទេពកោសល្យគ្រប់គ្រាន់ទេ » ។

ស្នាដៃដែលអ្នកចូលចិត្តជាច្រើនពិតជាត្រូវបានបង្កើតឡើងដោយមនុស្សដែលមានទេពកោសល្យពីធម្មជាតិជាច្រើនរូប ។ ប៉ុន្តែអ្នកនឹងភ្ញាក់ផ្អើលថា ជាទូទៅវាគ្រាន់តែជាមនុស្សធម្មតាដែលទទួលបានការបំផុសគំនិតប៉ុណ្ណោះ ។

« Let Easter Anthems Ring » ទំនុកតម្កើងថ្មីមួយដែលសាសនាចក្របានចេញផ្សាយកាលពីថ្មីៗនេះ ត្រូវបាននិពន្ធដោយសមាជិកនៃពួកបរិសុទ្ធថ្ងៃចុងក្រោយម្នាក់មានឈ្មោះថា ឡារី អេ ហ៊ីលឡឺ ។ គាត់គឺជាអ្នកនិពន្ធ និងនិពន្ធនាយកអាជីព ( បានចូលនិវត្តន៍ហើយឥឡូវនេះ ) ប៉ុន្តែ មិនមែន ជាអ្នកនិពន្ធបទចម្រៀងទេ ។ គាត់ក៏មិនមែនជាតារាចម្រៀង ឬតន្ត្រីករដ៏អស្ចារ្យដែរ ។

គាត់គ្រាន់តែជាមនុស្សម្នាក់ដែលស្រឡាញ់តន្ត្រី និងបានទទួលការបំផុសគំនិតមួយ ។

ខណៈពេលបម្រើការជាអ្នកដឹកនាំក្រុមចម្រៀងវួដកាលពីប៉ុន្មានឆ្នាំមុន បងប្រុស ហ៊ីលឡឺ បានព្យាយាមសរសេរទំនុកច្រៀងថ្មីសម្រាប់បទចម្រៀងចាស់មួយដែលគាត់បានរកឃើញ ។ គាត់រីករាយនឹងបទពិសោធន៍នោះណាស់ ហើយបានសួរមិត្តភក្តិម្នាក់ដែលធ្វើការឲ្យសាសនាចក្រប្រសិនបើនាងដឹងពីបទចម្រៀងផ្សេងទៀតណាដែលត្រូវការពាក្យថ្មី ។ នាងបានបង្ហាញគាត់នូវបទចម្រៀងដែលបាននិពន្ធនៅក្នុងទសវត្សរ៍ឆ្នាំ១៨០០ ។

បងប្រុស ហ៊ីលឡឺ បាននិយាយថា « ខ្ញុំអង្គុយជាមួយតន្ត្រីនោះ ហើយពាក្យបានចូលមកក្នុងចិត្តរបស់ខ្ញុំភ្លាមៗ ៖ ‹ ចូរក្រោកឡើង ពួកបរិសុទ្ធ ចូរអរសប្បាយ › ។ ហើយចាប់ពីពេលនោះមក ខ្ញុំមានអារម្មណ៍ថា អត្ថបទទូទៅ និងអ្វីដែលវាត្រូវការដើម្បីឲ្យមាន—បទចម្រៀងនៃសេចក្តីអំណរអំពីព្រះអង្គសង្គ្រោះ » ។

ទំនុកតម្កើងនោះត្រូវបានបោះពុម្ពផ្សាយនៅក្នុង Ensign នៅក្នុងឆ្នាំ២០១២ ។ វាមានបួនវគ្គ និងច្រៀងអំពីដង្វាយធួនរបស់ព្រះយេស៊ូវគ្រីស្ទ ។ បងប្រុស ហ៊ីលឡឺ បាននិយាយថា « វាមានការផ្តោតយ៉ាងខ្លាំងលើ ‹ អ្នកនឹងជួបមនុស្សជាទីស្រឡាញ់របស់អ្នកម្តងទៀត មានការរស់ឡើងវិញ › » ។ នៅពេលដែលសាសនាចក្របានដាក់ចេញការប្រកាសសម្រាប់ទំនុកតម្កើងថ្មី បងប្រុស ហ៊ីលឡឺ ត្រូវបានគេស្នើសុំឲ្យផ្តោតទំនុកច្រៀងរបស់គាត់ឡើងវិញជាពិសេសនៅលើបុណ្យអ៊ីស្ទើរ ។

បន្ទាប់ពីផ្លាស់ប្តូរទំនុកច្រៀងជាច្រើន—បើទោះបីជាបន្ទាត់ចាប់ផ្តើម « ចូរក្រោកឡើង ពួកបរិសុទ្ធ ចូរអរសប្បាយ » នៅតែមាន—បងប្រុស ហ៊ីលឡឺ ឥឡូវនេះមានទំនុកតម្កើងបីវគ្គដែលមានចំណងជើងថា « Let Easter Anthems Ring » ។ អ្នកអាចច្រៀងវានៅក្នុងការប្រជុំសាក្រាម៉ង់រដូវកាលបុណ្យអ៊ីស្ទើរនេះបាន !

តើបងប្រុស ហ៊ីលឡឺ មានអារម្មណ៍បំផុសគំនិតនៅពេលដែលគាត់សរសេរពាក្យទាំងនេះទេ ?

គាត់បាននិយាយថា « វាជាការរាបទាបដើម្បីនិយាយដូច្នេះ » ។ « ប៉ុន្តែបាទពិតណាស់ ។ មានពេលខ្លះដែលខ្ញុំមានអារម្មណ៍ថា លំហូរនៃពាក្យចូលមកក្នុងចិត្តរបស់ខ្ញុំ ។ វាគួរជាទីពេញចិត្ត និងជាទីរីករាយក្រៃលែង ។ ហើយខ្ញុំអាចមានអារម្មណ៍បន្ទរនៃសេចក្តីអំណរនោះជាញឹកញាប់នៅពេលដែលខ្ញុំអានឡើងវិញនូវអ្វីមួយដែលបំផុសដល់ខ្ញុំជាពិសេសនៅពេលនោះ ។ តែការណ៍នោះមួយមុខ នាំមកនូវអារម្មណ៍នៃទីបន្ទាល់ទាំងនោះ ។ វាស្ទើរតែដូចជាការរស់នៅក្នុងបទពិសោធន៍នេះឡើងវិញអ៊ីចឹង » ។

មនុស្សប្រហែលជាចូលចិត្តទំនុកតម្កើងនេះ ប៉ុន្តែមើលទៅ បុគ្គលដែលទទួលបានប្រយោជន៍ច្រើនបំផុតពីទំនុកតម្កើងនោះគឺ ( សំឡេងគោះស្គរ ) … អ្នកដែលសរសេរវា ! ការប្រើទេពកោសល្យ និងគំនិតដែលបានបំផុសរបស់យើងមិនត្រឹមតែប្រទានពរដល់អ្នកដទៃប៉ុណ្ណោះទេ—វាក៏ប្រទានពរដល់យើងផងដែរ ។

គន្លឹះសម្រាប់ទេពកោសល្យ

រៀនអ្វីៗទាំងអស់ដែលអ្នកអាចរៀនបាន ។ បងប្រុស ហ៊ីលឡឺ បាននិយាយថា « ទម្រង់សិល្បៈនីមួយៗមានរចនាសម្ព័ន្ធ និងច្បាប់ » ។ « ការរៀន និងការធ្វើតាមចំណុចទាំងនោះបង្កើនសមត្ថភាពរបស់អ្នក បង្កើនឥទ្ធិពលសិល្បៈនៃអ្វីដែលអ្នកកំពុងធ្វើ » ។
មតិកែលម្អគឺមានតម្លៃណាស់ ។ បងប្រុស ហ៊ីលឡឺ បាននិយាយថា គាត់ដឹងគុណចំពោះអ្នកកែសម្រួល និងអ្នកដទៃទៀតដែលបានជួយធ្វើឲ្យទំនុកតម្កើងរបស់គាត់កាន់តែប្រសើរឡើង ។
អ្នកពុំចាំបាច់ល្អឥតខ្ចោះនោះទេ ។ ប្រសិនបើអ្នកចូលចិត្តធ្វើអ្វីមួយដែលច្នៃប្រឌិត សូមធ្វើវាទៅ ! បងប្រុស ហ៊ីលឡឺ បាននិយាយ « សូមរីករាយជាមួយវា » ។ « ចូរទុកឲ្យភាពច្នៃប្រឌិតរបស់អ្នកបង្ហាញឡើង » ។
នៅទីបំផុតវាគឺ សម្រាប់អ្នក ។ បងប្រុស ហ៊ីលឡឺ បានសរសេរទំនុកតម្កើងផ្សេងទៀតដែលនឹងមិនត្រូវបានបោះពុម្ពនៅទីណាទេ ។ វាមិនសំខាន់ទេ ។ គាត់បាននិយាយ « ទោះបីជាវាមិនត្រូវបានបោះពុម្ពផ្សាយក៏ដោយ ក៏វាជាទីបន្ទាល់មួយសម្រាប់ខ្ញុំដែរ » ។ « នោះគឺជាអ្វីដែលមានតម្លៃមិនអាចកាត់ថ្លៃបាន ដែលនរណាម្នាក់អាចទទួលបានបទពិសោធន៍នោះ » ។