Երկնային Հոր ծրագիրը ընտանիքների համար

Երեց Բրյուս Ս. Հեյֆենը՝ Յոթանասունի պատվավոր անդամը, մի անգամ հեռախոսազանգ ստացավ ազգային լրատվական ամսագրի խմբագրից՝ խոսելու մի գրքի մասին, որը տարբեր կրոնների տեսանկյունից տալիս էր երկնքի մասին հավատալիքների պատմությունը:

«Հեղինակները պարզել են, որ հանրությունը համատարած քաղց է զգում երկնքի՝ երկնային ընտանիքների»,- ասել է երեց Հեյֆենը։ Սակայն «քրիստոնեական եկեղեցիների մեծ մասը քիչ է արձագանքում այս ներքին ծարավին», բացառությամբ՝ Հիսուս Քրիստոսի Վերջին Օրերի Սրբերի Եկեղեցու։

Փրկչի վերականգնված Եկեղեցում մենք ունենք սրբազան տաճարներ։ Մենք ունենք հավերժական ամուսնություն՝ այն կնքելու լիազորությամբ, որն օրհնություն է ֆիզիկական մահից հետո։ Մենք ունենք հավիտենական ապագայի խոստումը՝ սիրելիների հետ՝ Հոր և Որդու ներկայության մեջ։ Հաշվի առնելով այս ամենը, հեղինակները եզրակացրել են, որ երկնքի մասին Վերջին Օրերի Սրբերի պատկերացումն ամենաամբողջականն է, իսկ ես կավելացնեի՝ ամենաերջանիկը։

Ինչպես Նախագահ Ռասսել Մ. Նելսոնն է ուսուցանել. «Տերը … ստեղծեց երկիրը, որպեսզի մենք կարողանանք ձեռք բերել ֆիզիկական մարմիններ և կազմել ընտանիքներ»։ Նա հիմնադրեց Իր Եկեղեցին՝ ընտանիքները վեհացնելու համար։ Նա տաճարներ է տրամադրում, որպեսզի ընտանիքները կարողանան հավերժ միասին լինել»։

Մեզ չպետք է զարմացնի այն փաստը, որ Աստծո ծրագրում այդքան կարևոր մի բանը կարող է բախվել ընդդիմության։ Նախագահ Մ. Ռասսել Բալլարդը (1928–2023) ասել է. «Սատանան գիտի, որ Տիրոջ գործը խափանելու ամենահաստատ և ամենաարդյունավետ միջոցը ընտանիքի արդյունավետությունը և տան սրբությունը նվազեցնելն է»։

Իմանալով այն, ինչ գիտենք, մենք պետք է լինենք ընտանիքի ամենաջանասեր պաշտպաններից մեկը աշխարհում։

Ինչպե՞ս ենք դա անում:

Մենք կարող ենք անել «փոքր և հասարակ բաներ» (Ալմա 37․6), որոնք կամրապնդեն ընտանեկան կապերը։ Սա ներառում է ընտանիքի հռչակագրում նշված սկզբունքներին հետևելը՝ «հավատ, աղոթք, ապաշխարություն, ներողամտություն, հարգանք, սեր, կարեկցանք, աշխատանք և առողջ ու ստեղծարար միջոցառումներ»: Անկախ ձեր ներկայիս ընտանեկան իրավիճակից, կարող եք ձեր գործողություններով ցույց տալ, որ ընտանեկան կապերը հավերժական կարևորություն ունեն ձեզ համար։

Ապրելով, պաշտպանելով և կիսվելով ընտանիքի մասին հավերժական ճշմարտություններով՝ մենք կարող ենք օգնել մարդկանց տեսնել, որ «ընտանիքն ամենակարևոր դերն ունի Արարչի ծրագրում՝ Իր զավակների հավերժական ճակատագրի համար» և որ «սուրբ տաճարներ[ը] հնարավոր են դարձնում անհատների համար՝ վերադարձը դեպի Աստծո ներկայությունը, իսկ ընտանիքների համար՝ հավերժական միասնությունը»։

Երբ ես և քույր Ուխդորֆը տեսնում ենք, թե ինչպես են մեր ընտանիքի անդամները սուրբ ուխտեր կապում մեր սիրող, հավերժական Երկնային Հոր հետ, մեր սրտերը լցվում են ուրախությամբ և երախտագիտությամբ։ Մենք ուրախանում ենք ոչ միայն մեր երեխաներով և նրանց երեխաներով, այլև մեր ծնողներով և նրանց ծնողներով։ Մենք խորունկ սիրով խորհում ենք այն մասին, թե ինչպես են ավետարանի ուխտերը միավորում մեզ սերնդե-սերունդ։

Օրհնությունները, որոնք Տերը խոստացավ Աբրահամին, Իսահակին և Հակոբին՝ նրա երազում, ամբողջովին առնչվում են ընտանիքներին։ Եվ դրանք տարածվում են Նրա բոլոր ուխտյալ զավակների վրա, ներառյալ՝ ձեզ և ինձ։ «Ահա,- ասաց Տերը,- ես քեզ հետ եմ և ամեն տեղ, ուր էլ գնաս, ես կպահպանեմ քեզ, … որովհետև քեզ չեմ թողնի» (Ծնունդ 28․15):

Ես խոստանում եմ, որ երբ դուք հետևեք և կիսվեք ընտանիքների համար նախատեսված մեր Երկնային Հոր ծրագրով, Նա ձեզ հետ կլինի, հատկապես, երբ դուք և ձեր մտերիմները փորձություններ ունենաք։ Նա կբարձրացնի և կտանի ձեզ դեպի ուրախության լիություն՝ Իր հետ, Իր Որդի Հիսուս Քրիստոսի հետ և ձեր ընտանիքի հետ՝ առհավետ։