Սուրբ Զատիկի մշտական ազդեցությունը

Սուրբ գրությունները հզոր գործիք են, որոնք օգնում են ձեզ անձամբ ճանաչել Հիսուս Քրիստոսին և ամրապնդել ձեր հավատքը Նրա հանդեպ։ Սուրբ Զատիկի տոնաշրջանում դուք կարող եք կենտրոնացնել ձեր սուրբ գրությունների ուսումնասիրությունը Նրա կյանքի վերջին շաբաթվա կամ, որպես հարություն առած աշխարհի Փրկիչ, Ամերիկա կատարած Նրա այցի վրա։ Այս հզոր պատմությունների ընթերցումը կօգնի ձեզ զգալ Փրկչի սերը ձեր հանդեպ և ավելի լավ հասկանալ Նրա Քավությունն ու Հարությունը։

Եթե համոզված չեք, թե որ հատվածների վրա կենտրոնանալ, կարող եք հետևել Եկ, հետևիր ինձ գրքի Սուրբ Զատիկի ուսումնական ուղեցույցին կամ ChurchofJesusChrist.org կայքում հրապարակված այլ ուսումնական ուղեցույցներին։

Քրիստոսի հաղթանակը մահվան նկատմամբ և այն գիտակցումը, որ մենք նույնպես հարություն կառնենք, «մարդկությանը տրված բոլոր լուրերից ամենափառահեղն է»։ Նրա Քավության և Հարության շնորհիվ մեր ընտանիքները կարող են հավերժական լինել, և մեր բոլոր նախնիները հնարավորություն կունենան սրբազան ուխտեր կապելու։

Դուք կարող եք տոնել Հիսուս Քրիստոսի Հարությունը և շարունակել հոգևոր բանտում գտնվողների համար արվող Նրա փրկագնման գործը (տես Ա Պետրոս 3․18–20)՝ կատարելով ընտանեկան պատմության և տաճարային աշխատանք։ Տաճարում կատարած ձեր ծառայությունը թույլ է տալիս այդ հոգիներին նույնպես ստանալ Քրիստոսի Քավության բոլոր օրհնությունները։

Հիսուս Քրիստոսը բարձրացրել և ծառայել է մարդկանց Իր մահկանացու ծառայության ողջ ընթացքում՝ նույնիսկ խաչի վրա գտնվելու ժամանակ։ Դուք կարող եք պատվել Նրա օրինակը՝ ծառայելով ձեր շրջապատի մարդկանց այնպես, ինչպես Նա կաներ։ Նույնիսկ բարության պարզ արարքները, ինչպիսիք են՝ հաճախ ժպտալը, ուրիշներին իսկապես լսելը և տնային գործերում օգնելը, կարող են ստեղծել քրիստոսանման սիրո մթնոլորտ։ Երբ ծառայում եք մարդկանց, դուք և նրանք կարող եք զգալ Սուրբ Զատիկի տոնաշրջանի հույսն ու բարությունը։

Փրկիչն Ինքը հաստատեց մի ավանդույթ, որը լավագույնս կօգնի ձեզ հիշել Նրան՝ հաղորդությունը։ Հաղորդություն ընդունելը ցույց է տալիս, որ դուք պատրաստ եք «միշտ հիշել նրան և պահել նրա պատվիրանները», և Իր հերթին, Նա խոստանում է, որ դուք «Նրա Հոգին միշտ [ձեզ] հետ կունենաք» (Վարդապետություն և Ուխտեր 20․77)։ Դա զորավոր խոստում է։ Երբ դուք ամեն շաբաթ ընդունում եք հաղորդությունը, կարող եք զգալ այդ խոստման ճշմարտությունը Սուրբ Զատիկին և առհասարակ միշտ։

Հաղորդությունն ընդունելիս փորձեք խորհել Հիսուս Քրիստոսի ծառայության, Քավության և Հարության մասին։ Անկեղծ աղոթեք և փորձեք մտածել այն մասին, թե ինչպես է Նրա զոհաբերությունը օրհնել անձամբ ձեզ։