« ដើរជាមួយនឹងយើងចុះ »—ចូរយើងវិភាគទាំងអស់គ្នា

ដោយ អ៊ីរិក ឌី ស្នាយឌឺ

ទស្សនាវដ្ដីសាសនាចក្រ

បាវចនាឆ្នាំនេះមានចំនួនបីពាក្យ ប៉ុន្តែពាក្យនីមួយៗមានអត្ថន័យច្រើនដើម្បីបង្រៀនយើង ។

ដូចបាវចនាយុវវ័យកាលពីឆ្នាំមុន « មើលទៅព្រះគ្រីស្ទ » ដែរ បាវចនាឆ្នាំនេះ « ដើរជាមួយនឹងយើងចុះ »—គឺជាពាក្យប្រៀបប្រដូច ។ នៅក្នុងជីវិតនេះ ពួកយើងភាគច្រើនមិនមានឱកាសដើម្បីមើល ឬដើរជាមួយព្រះអង្គសង្គ្រោះដោយផ្ទាល់ទេ ។ ដូច្នេះ តើវាមានន័យដូចម្តេចដើម្បី « ដើរ » ជាមួយនរណាម្នាក់ដែលមិនមានវត្តមានជារូបកាយផ្ទាល់ ? ចូរយើងវិភាគទាំងអស់គ្នា ។

ដើរ

ពេលព្រះអម្ចាស់បានហៅហេណុកឲ្យធ្វើជាព្យាការី ទ្រង់បានប្រទានដល់គាត់នូវការសន្យាមួយ ៖ « គ្រប់អស់ទាំងពាក្យសម្ដីរបស់អ្នក យើងនឹងរាប់ជាសុចរិត ហើយភ្នំទាំងឡាយនឹងគេចចេញពីមុខអ្នក ហើយទន្លេទាំងឡាយនឹងបែរចេញពីដំណើរវា ហើយអ្នកនឹងនៅក្នុងយើង ហើយយើងក្នុងអ្នក ហេតុដូច្នោះហើយ ចូរដើរជាមួយនឹងយើងចុះ » ( ម៉ូសេ ៦:៣៤ ) ។

ប្រសិនបើអ្នកត្រូវបានសន្យាថា ការដើរជាមួយនឹងព្រះមានន័យថា ទ្រង់នឹងគាំទ្រពាក្យសម្ដីរបស់អ្នក យកឧបសគ្គចេញពីផ្លូវរបស់អ្នក ហើយតែងតែគង់នៅជាមួយអ្នក—ដូច្នេះហើយហេតុអ្វីបានជាអ្នក មិន ដើរជាមួយទ្រង់ ?

ជាដំណឹងដ៏អស្ចារ្យ ៖ អ្នកត្រូវបានសន្យាបែបនេះ ប្រហែលជាថ្មីៗនេះកាលពីថ្ងៃអាទិត្យមុន ។ នៅពេលដែលអ្នកទទួលទានសាក្រាម៉ង់ អ្នកបានសន្យាថានឹង « ចងចាំទ្រង់ជានិច្ច ហើយកាន់តាមព្រះបញ្ញត្តិទាំងឡាយរបស់ទ្រង់ »—ឬនិយាយម្យ៉ាងទៀតថា ដើរជាមួយនឹងទ្រង់ ។ ហើយហេតុអ្វីបានជាអ្នកធ្វើបែបនេះ ? « ប្រយោជន៍ឲ្យ [ អ្នក ] អាចបានព្រះវិញ្ញាណរបស់ទ្រង់គង់នៅជាមួយនឹង [ អ្នក ] ជាដរាប » ( គោលលទ្ធិ និងសេចក្ដីសញ្ញា ២០:៧៧ បានបន្ថែមការគូសបញ្ជាក់ ) ។

ឥឡូវនេះ អ្នកនឹងកត់សម្គាល់ឃើញថាព្រះអម្ចាស់មិនបានប្រាប់ហេណុកឲ្យ ៖ « ឈរនៅទីនេះ ហើយមើលជុំវិញជាមួយយើង » នោះទេ ។ ទ្រង់មិនបានមានបន្ទូលថា ៖« អង្គុយ ហើយសម្រាកជាមួយយើងមួយរយៈ » នោះទេ ។ ទ្រង់មានបន្ទូលថា ៖ « ចូរដើរជាមួយនឹងយើងចុះ ។ » យើងត្រូវតែ ធ្វើ តាមការជំរុញខាងវិញ្ញាណដែលយើងទទួលបាន ។ យើងត្រូវតែធ្វើ និងនិយាយអ្វីដែលយើងជឿថាត្រឹមត្រូវ ។

ដូចដែលប្រធាន ម៉ារ៉ុន ជី រ៉មនី ( ឆ្នាំ១៨៩៧–១៩៨៨ ) ទីប្រឹក្សានៅក្នុងគណៈប្រធានទីមួយបានមានប្រសាសន៍ថា « ទ្រង់អាចដឹកនាំជំហានរបស់យើងបានតែនៅពេល ដែលយើងផ្លាស់ទីជើងរបស់យើង »ប៉ុណ្ណោះ ។

ប៉ុន្តែសូមកត់សម្គាល់អ្វីផ្សេងទៀតដែលព្រះអម្ចាស់មិនបានមានបន្ទូល ។ ទ្រង់មិនបានមានបន្ទូលថា ៖ « រត់ជាមួយនឹងយើងចុះ » ។ ទ្រង់មិនបានមានបន្ទូលថា ៖« លោតផ្លោះឧបសគ្គទាំងអស់របស់អ្នក ដោយមិនចាំបាច់ប្រឹងជាមួយនឹងយើងចុះ » នោះទេ ។ ទ្រង់មិនសុំឲ្យយើង « រត់លឿនជាងកម្លាំងដែល [ យើងមាន ] » នោះទេ ( ម៉ូសាយ ៤:២៧ ) ។ ទ្រង់មិនបានរំពឹងឲ្យយើងនឹងផ្លាស់ទីក្នុងល្បឿនលឿនបំផុតនោះទេ ។ ទ្រង់មិនបានរំពឹងថា យើងនឹងមិនធ្វើកំហុស ឬបាក់ទឹកចិត្តនោះទេ ។ ទ្រង់គ្រាន់តែចង់ឲ្យយើងបន្តដើរទៅមុខប៉ុណ្ណោះ ។

ជាមួយនឹង

យើងដើរ ជាមួយនឹង ព្រះអង្គសង្គ្រោះ ។ មិនមែននៅពីមុខទ្រង់ទេ ។ ពិតណាស់មិនឆ្ងាយពីទ្រង់ពេកទេ !

នៅពេលដែលអ្នកកំពុងដើរជាមួយនរណាម្នាក់ដោយផ្ទាល់ អ្នកដើរនៅក្បែរពួកគេ ។ ប៉ុន្ដែក្នុងន័យប្រៀបធៀប យើងនៅពីក្រោយព្រះអង្គសង្គ្រោះបន្តិច ។ ទ្រង់ជាអ្នកដឹកនាំ ហើយយើងធ្វើតាមពីក្រោយ—យ៉ាងប្រកៀក ។

នៅពេលដែលអ្នកស្ថិតនៅលើផ្លូវត្រូវ ផ្លូវនោះមិននាំ « ទៅរក » ព្រះយេស៊ូវទេ—ទ្រង់ក៏នៅលើផ្លូវនោះជាមួយនឹងយើងដែរ ! សូមចងចាំពិធីសាក្រាម៉ង់ ! តាមរយៈព្រះវិញ្ញាណរបស់ទ្រង់ ព្រះអម្ចាស់នឹង តែងតែ គង់នៅជាមួយអ្នកជានិច្ច ដរាបណាអ្នកបន្តអញ្ជើញទ្រង់ឲ្យគង់នៅជាមួយ ។

ព្រះវរបិតាសួគ៌ និងព្រះយេស៊ូវគ្រីស្ទមិនសូវមានការព្រួយបារម្ភពីកន្លែងណាដែលអ្នកស្ថិតនៅលើផ្លូវនោះទេ តែទ្រង់ខ្វល់វិញថាទិសដៅណាដែលអ្នកកំពុងតែបែរមុខទៅរក ។ ទ្រង់ទាំងទ្វេនឹងជួបអ្នកនៅទីកន្លែងណាដែលអ្នករស់នៅ ។ វាមិនមែនជាបញ្ហាទេ ទោះបីជាអ្នកដើរយឺតប៉ុនណាក៏ដោយ ។

យើង

យើងត្រូវតែធ្វើសកម្មភាព ( ដើរ ) ។ យើងត្រូវធ្វើវាឲ្យស្របតាមបទបញ្ញត្តិរបស់ព្រះ និងការខ្សឹបប្រាប់របស់ព្រះវិញ្ញាណបរិសុទ្ធ ( ជាមួយនឹង ) ។ ហើយយើងមិនត្រូវធ្វើរឿងទាំងអស់នេះជាមួយនរណាទេ ក្រៅតែពីព្រះយេស៊ូវគ្រីស្ទមួយអង្គប៉ុណ្ណោះ ( យើង ) ។

( ដោយសារតែព្រះយេស៊ូវគ្រីស្ទ ព្រះវរបិតាសួគ៌របស់ទ្រង់ និងព្រះវិញ្ញាណបរិសុទ្ធ សុទ្ធតែមានគោលបំណងតែមួយ—សូមមើល យ៉ូហាន ១០:៣០; ១៧:២១; គោលលទ្ធិ និងសេចក្ដីសញ្ញា ៣៥:២—វាជាការត្រឹមត្រូវក្នុងការនិយាយថា ក្មួយកំពុង « ដើរជាមួយនឹងព្រះ » « ដើរជាមួយនឹងព្រះអង្គសង្គ្រោះ » « ដើរជាមួយនឹងព្រះវិញ្ញាណបរិសុទ្ធ » ឬគ្រប់យ៉ាងដែលនៅក្នុងសភាវនោះ ) ។

មានសំឡេងជាច្រើនដែលចង់ឲ្យយើងស្ដាប់តាមនៅលើពិភពលោកនេះ ។ មានអ្នកមានឥទ្ធិពល តារាល្បី និងអ្នកនយោបាយជាច្រើនដែលចង់ឲ្យអ្នក « ដើរ » ជាមួយពួកគេ (ឬយ៉ាងហោចណាស់ផ្តល់លុយឲ្យពួកគេ ) ។ អ្វីដែលអ្នកដទៃនិយាយអាចមានប្រយោជន៍ ប្រសិនបើការនិយាយនោះស្របគ្នានឹងការបង្រៀនរបស់ព្រះអង្គសង្រ្គោះ ។

ចូរដើរជាមួយនឹង ទ្រង់ ចុះ ។