គ្រប់យ៉ាងនឹងប្រសើរឡើង នៅពេលអ្នក ដាក់ទីទុកចិត្តលើព្រះ
នៅពេលអ្នកដាក់ទីទុកចិត្តលើព្រះវរបិតាសួគ៌ នោះអ្នកនឹងអាចប្រឈមមុខនឹងអ្វីដែលអ្នកកំពុងតែឆ្លងកាត់ ។
រូបថតដោយ ជីអូវ៉ាណា ហ្វ្លាវីអា ដឺ អ៉ាលមីដា ខាមផូស
ខ្ញុំបានក្លាយជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ តាំងពីខ្ញុំមានអាយុប្រាំបីឆ្នាំមកម្ល៉េះ ។ ពីរបីខែបន្ទាប់ពីខ្ញុំបានទទួលពិធីបុណ្យជ្រមុជទឹករួច គ្រួសាររបស់ខ្ញុំ និងខ្ញុំបានឃ្លាតឆ្ងាយចេញពីសាសនាចក្រ ។
ច្រើនឆ្នាំក្រោយមក នៅពេលដែលយើងបានសម្រេចចិត្តត្រឡប់មកព្រះវិហារវិញ ជំងឺរាតត្បាតកូវីដ-១៩បានចាប់ផ្ដើមវាយលុក ហើយការប្រជុំសាសនាចក្របានចាប់ផ្តើមធ្វើឡើងពីចម្ងាយដោយមិនមានការជួបជុំផ្ទាល់ទេ ។ ជាថ្មីម្តងទៀត ខ្ញុំបានចាប់ផ្ដើមរសាត់ឆ្ងាយទៅៗ ប្រឈមមុខនឹងបញ្ហាជាច្រើន ។
ការលំបាក និងការសង្ស័យ
ក្នុងអំឡុងពេលនេះ ខ្ញុំបានចាប់ផ្តើមសង្ស័យអំពីសេចក្ដីពិតនៃដំណឹងល្អ ទីបន្ទាល់របស់ខ្ញុំ និងថាតើព្រះយេស៊ូវគ្រីស្ទអង្គបែបណា ។ មានពេលមួយខ្ញុំក៏ចាប់ផ្ដើមសង្ស័យ តើពិតជាមានព្រះឬទេ និងចាប់ផ្ដើមគិតថាខ្លួនឯងជាមនុស្សដែលមិនជឿលើព្រះតែម្ដង ។ ចិត្តខ្ញុំបានរឹងរូស និងត្រជាក់ដូចជាថ្មទឹកកក ។
ដំណាក់កាលនោះនៃជីវិតរបស់ខ្ញុំ គឺមានភាពលំបាក និងស្មុគស្មាញមិនគួរឲ្យជឿ ។ ខ្ញុំគិតថាដោយសារតែនៅពេលដែលយើងឈប់ជឿលើព្រះយេស៊ូវគ្រីស្ទ និងព្រះចេស្ដារបស់ទ្រង់ ទើបជីវិតរបស់យើងបាត់បង់អត្ថន័យ ហើយប្រែក្លាយជារងទុក្ខ ។
ថ្នាក់សិក្ខាសាលាបានផ្លាស់ប្តូរខ្ញុំ
ទីបំផុត ឪពុករបស់ខ្ញុំបានជះឥទ្ធិពលដល់ខ្ញុំឲ្យចាប់ផ្តើមចូលរួមព្រះវិហារម្តងទៀត ។ ខ្ញុំបានចូលរួម ទោះបីជាខ្ញុំនៅតែមានភាពច្របូកច្របល់ក្នុងចិត្ត និងនៅមានចម្ងល់ជាច្រើនក៏ដោយ ។
មានថ្ងៃមួយនៅព្រះវិហារ ខ្ញុំបានឃើញផ្ទាំងរូបភាពអំពីថ្នាក់សាលាសិក្ខាសាលា ។ វាបានបណ្ដាលឲ្យខ្ញុំមានការចាប់អារម្មណ៍ ។ ខ្ញុំបានទៅជួបប៊ីស្សពដើម្បីសួរគាត់អំពីរឿងនេះ ។ គាត់បានដាក់បញ្ចូលឈ្មោះខ្ញុំភ្លាមៗទៅក្នុងក្រុមឈែតថ្នាក់សិក្ខាសាលា ហើយបានប្រាប់ខ្ញុំថា ថ្នាក់សិក្ខាសាលាចាប់ផ្តើមនៅម៉ោង ៥:៣០ ព្រឹក ។
ដូច្នេះ ខ្ញុំបានចាប់ផ្តើមចូលរៀនថ្នាក់សិក្ខាសាលា ។ ការធ្វើបែបនេះបានជួយខ្ញុំឲ្យមានមិត្តភក្ដិថ្មីៗ ហើយទីបំផុតទទួលបានទីបន្ទាល់អំពីសាសនាចក្រ និងព្រះគម្ពីរត្រឡប់មកវិញ ។ ខ្ញុំមានគ្រូម្នាក់ដែលពិតជាលើកទឹកចិត្តដល់សិស្សក្នុងថ្នាក់ និងជួយយើងបញ្ចេញសមត្ថភាពរបស់យើង ។ ខ្ញុំបានរកឃើញថា ការសិក្សាបទគម្ពីរ ពិតជាអនុញ្ញាតឲ្យយើងស្គាល់ព្រះអង្គសង្គ្រោះ ។ វាមានភាពខុសគ្នារវាងការស្តាប់ទីបន្ទាល់របស់នរណាម្នាក់ និងការស្វែងរកទីបន្ទាល់របស់អ្នកផ្ទាល់ខ្លួនតាមរយៈការសិក្សា និងសេចក្ដីជំនឿ ។
ចាស្មីន ជាមួយមិត្តភក្តិរបស់នាង វីកតូរៀ ( ឆ្វេង ) និង ខារ៉ូល ( ស្តាំ ) ។ មិត្តភក្តិរបស់ចាស្មីន ជួយនាងឲ្យរស់នៅតាមដំណឹងល្អរបស់ព្រះយេស៊ូវគ្រីស្ទ ។
គន្លឹះចំនួន១០ដើម្បីក្លាយជាសិស្សរបស់ព្រះគ្រីស្ទ
ដំបូងឡើយខ្ញុំបានដឹងអំពីព្រះវរបិតាសួគ៌ និងព្រះយេស៊ូវគ្រីស្ទតាមរយៈអ្វីដែលអ្នកដទៃបានប្រាប់ដល់ខ្ញុំ ។ ប៉ុន្តែយើងមិនអាចពឹងផ្អែកតែលើទីបន្ទាល់របស់អ្នកដទៃបានទេ ។ យើងចាំបាច់ត្រូវស្គាល់ព្រះអង្គសង្គ្រោះដោយខ្លួនឯង ។
យើងត្រូវមានពេលវេលាសម្រាប់ព្រះអង្គសង្គ្រោះ និងសម្រាប់កិច្ចការដ៏ទេវភាព ដើម្បីយើងអាចក្លាយជាសិស្សម្នាក់របស់ទ្រង់ ។ ខ្ញុំបានរៀនថាអ្នកស្គាល់ទ្រង់នៅពេលដែលអ្នក ៖
-
ស្វែងរកទ្រង់ដោយចេតនា ។
-
អានព្រះគម្ពីរ ។
-
ខិតខំធ្វើឲ្យប្រសើរឡើងខាងវិញ្ញាណ ។
-
អធិស្ឋាន ។
-
ចូលរួមព្រះវិហារបរិសុទ្ធ ។
-
បម្រើមនុស្សដទៃ ។
-
តមអាហារ ។
-
ធ្វើតាមគំរូរបស់ទ្រង់ ។
-
មានដួងចិត្តល្អ ។
-
បដិសេធមិននិយាយអាក្រក់ ឬនិយាយដើមពីអ្នកដទៃ ។
រឿងទាំងនេះបានជួយខ្ញុំឲ្យស្គាល់ព្រះអង្គសង្គ្រោះ—និងក្លាយជាសិស្សម្នាក់របស់ទ្រង់ ។ ការធ្វើជាសិស្សរបស់ព្រះយេស៊ូវគ្រីស្ទ ជារឿងដែលមានសារៈសំខាន់ណាស់ ព្រោះយើងអាចប្រើពន្លឺរបស់ទ្រង់ដើម្បីជួយអ្នកដទៃ ។ តាមរយៈគំរូល្អរបស់យើង អ្នកដទៃអាចមើលឃើញថាដំណឹងល្អគឺជាពរជ័យប៉ុនណា ។
ការទៅព្រះវិហារ និងការចែកចាយដំណឹងល្អជាមួយគ្រួសាររបស់នាងបានផ្ដល់ពរជ័យដល់ជីវិតរបស់ ចាស្មីន តាមរបៀបជាច្រើន ។
គ្រប់យ៉ាងនឹងប្រសើរឡើង
នៅពេលដែលខ្ញុំត្រឡប់ទៅព្រះវិហារវិញ ពេលនោះខ្ញុំកំពុងតែស្ថិតនៅចំណុចបាត—ពោរពេញទៅដោយការសង្ស័យ មិនមានមិត្តភក្ដិ មិនមានសេចក្ដីសង្ឃឹម មិនស្គាល់សូម្បីតែខ្លួនឯងថាជានរណា ឬមិនដឹងថាអ្វីជាគោលបំណងក្នុងជីវិតខ្ញុំ ។
ឥឡូវនេះដំណឹងល្អគឺជា « អណ្តាតភ្លើង » ដែលបានបំភ្លឺជីវិតរបស់ខ្ញុំ និងជួយខ្ញុំឲ្យធ្វើអ្វីដែលត្រឹមត្រូវ ហើយក្លាយជាមនុស្សដែលល្អប្រសើរជាងមុន ។ បើគ្មានដំណឹងល្អទេ ខ្ញុំមិនដឹងថាខ្ញុំកំពុងតែនៅកន្លែងណាទេពេលនេះ ។
អ្វីគ្រប់យ៉ាងនឹងប្រសើរឡើងនៅក្នុងជីវិត នៅពេលដែលអ្នកដាក់ទីទុកចិត្តលើព្រះ ។ ខណៈពេលដែលអ្នកស្វែងរកព្រះ អ្នកនឹងចាប់ផ្តើមតោងឡើងចេញពីជ្រោះជ្រៅ ហើយគ្រប់យ៉ាងនឹងចាប់ផ្តើមល្អប្រសើរឡើង ។ ជាការពិតណាស់ ទុក្ខលំបាកនឹងនៅតែមាន ប៉ុន្ដែការដាក់ទីទុកចិត្ត និងបំណងប្រាថ្នាដើម្បីជឿនឹងស្អាងអ្នកឡើងបន្ដិចម្ដងៗ ។ វាអាចត្រូវការពេលវេលា ប៉ុន្តែគ្រប់យ់ាងនឹងល្អប្រសើរឡើង !
នៅពេលដែលអ្នកដាក់ទីទុកចិត្តទៅលើព្រះវរបិតាសួគ៌ អ្នកនឹងអាចប្រឈមមុខនឹងអ្វីៗដែលអ្នកកំពុងតែឆ្លងកាត់—មិនថាវាជាបញ្ហាប្រឈម ការសង្ស័យ បញ្ហាសុខភាព ឬភាពឯកោនោះទេ ។ ឧទាហរណ៍ ៖ អ្នកអាចទទួលបានពិន្ទុល្អក្នុងការប្រឡង សុខភាពអ្នកមានភាពល្អប្រសើរជាងមុន ឬអ្នកទទួលបានចម្លើយ—ពេលខ្លះជាចម្លើយតបនឹងសំណួរដែលអ្នកស្វែងរកតាំងពីអ្នកមានអាយុ១០ឆ្នាំមកម្ល៉េះ ដូចករណីរបស់ខ្ញុំ—ប្រសិនបើអ្នកស្វែងរកទ្រង់ ហើយដាក់ទីទុកចិត្តលើទ្រង់ ។
ខ្ញុំជឿជាក់លើរឿងទាំងអស់នេះ ។ ដោយសារតែដំណឹងល្អ ខ្ញុំអាចនិយាយបានថាខ្ញុំបានផ្លាស់ប្ដូរ ។ តាមពិតទៅ គ្រប់យ៉ាងបានផ្លាស់ប្ដូរ—ដួងចិត្ត គំនិត អត្ដចរិត និងគោលការណ៍ទាំងឡាយរបស់ខ្ញុំ ។ ឥឡូវនេះខ្ញុំដឹងពីសេចក្ដីពិត ហើយទាំងអស់នេះធ្វើឲ្យមានការផ្លាស់ប្ដូរទាំងស្រុង ។ អ្វីគ្រប់យ៉ាងបានល្អប្រសើរឡើង ដោយសារតែដំណឹងល្អនៃព្រះយេស៊ូវគ្រីស្ទ ។
អ្នកនិពន្ធរស់នៅទីក្រុង សៅផាឡូ ប្រទេសប្រេស៊ីល ។