ការសន្យាដ៏មានតម្លៃទាំងឡាយ នៃ ផែនការរបស់ព្រះវរបិតា
ព្រលឹងរបស់យើងគួរតែពោរពេញដោយការដឹងគុណ ពេលដែលយើងពិចារណាអំពីផែនការដ៏អស្ចារ្យរបស់ព្រះដែលមានសម្រាប់យើង ។
រចនារូបភាពដោយ អាលីហ្សា ភីធើរសិន
ផែនការរបស់ព្រះវរបិតាសួគ៌ពិពណ៌នាអំពី « សេចក្ដីសន្យាដ៏ធំបំផុត ហើយវិសេសផង »( សូមមើល ពេត្រុស ទី២ ១:៣–៤ ) និងសេចក្តីពិតដែលកំណត់ពីអត្តសញ្ញាណ និងគោលបំណងដ៏អស់កល្បជានិច្ចរបស់យើង ។
ដូចបានពន្យល់នៅក្នុង « ក្រុមគ្រួសារ ៖ ការប្រកាសដល់ពិភពលោក » ដែលចែងថា « មនុស្សទាំងអស់—ទាំងប្រុសទាំងស្រី—ត្រូវបានបង្កើតឡើងតាមរូបភាពនៃព្រះ ។ មនុស្សម្នាក់ៗសុទ្ធតែជាបុត្រា និងបុត្រីខាងវិញ្ញាណរបស់មាតាបិតាសួគ៌ ដូច្នេះហើយ មនុស្សម្នាក់ៗមាននិស្ស័យ និងជោគវាសនានៃព្រះ » ។
ព្រះវរបិតាសួគ៌សន្យានឹងយើងថា ប្រសិនបើយើងធ្វើតាមផែនការរបស់ទ្រង់ និងគំរូនៃបុត្រាស្ងួនភ្ងារបស់ទ្រង់ រក្សាបទបញ្ញត្តិទាំងឡាយ និងស៊ូទ្រាំដោយសេចក្តីជំនឿរហូតដល់ទីបញ្ចប់នោះយើង « នឹងបានជីវិតដ៏នៅអស់កល្បជានិច្ច គឺជាអំណោយទានដ៏មហិមាបំផុតនូវគ្រប់អំណោយទានទាំងឡាយនៃព្រះ » ( គោលលទ្ធិ និងសេចក្ដីសញ្ញា ១៤:៧ ) ។
កិច្ចការរបស់ព្រះផ្តោតលើភាពរីកចម្រើន និងភាពតម្កើងឡើងនៃកូនចៅរបស់ទ្រង់ ។ គ្រប់ផ្នែកនៃផែនការរបស់ទ្រង់ត្រូវបានរចនាឡើង ដើម្បីផ្ដល់ពរដល់យើង ដោយសារ « តម្លៃនៃព្រលឹងទាំងឡាយ គឺមហិមាណាស់ចំពោះ [ ព្រះនេត្ររបស់ទ្រង់ ]» ( គោលលទ្ធិ និងសេចក្ដីសញ្ញា ១៨:១០ ) ។
ផែនការរបស់ព្រះវរបិតាសួគ៌
នៅក្នុងក្រុមប្រឹក្សាជីវិតមុនផែនដី ព្រះវរបិតាសួគ៌បានបង្ហាញដល់កូនចៅខាងវិញ្ញាណរបស់ទ្រង់ អំពីផែនការរបស់ទ្រង់ ចំពោះ ភាពរីកចម្រើន និងសុភមង្គលដ៏អស់កល្បជានិច្ចសម្រាប់ពួកគេ ។ ទ្រង់បានមានបន្ទូលមកកាន់យើងថា ទ្រង់នឹងបញ្ជូនយើងមកផែនដីដើម្បីឲ្យយើងបង្ហាញដល់ទ្រង់ថា យើងនឹងប្រតិបត្តិតាមទ្រង់ ហើយស័ក្តិសមនឹង « បានសិរីល្អបន្ថែមទៅលើក្បាល [ របស់យើង ] ជារៀងដរាបរហូតតទៅ » ( សូមមើល អ័ប្រាហាំ ៣:២៤–២៦ ) ។
ទ្រង់បានមានបន្ទូលថា ៖ « តើយើងនឹងចាត់អ្នកណាឲ្យទៅ ? ហើយម្នាក់ដូចជាកូនមនុស្សបានឆ្លើយថា ៖ ទូលបង្គំនៅឯណេះហើយ សូមចាត់ទូលបង្គំចុះ ។ ហើយម្នាក់ទៀតបានឆ្លើយ ហើយនិយាយថា ៖ ទូលបង្គំនៅឯណេះហើយ សូមចាត់ទូលបង្គំចុះ ។ ហើយព្រះអម្ចាស់ទ្រង់បានមានព្រះបន្ទូលថា ៖ យើងនឹងចាត់អ្នកទីមួយ ។
« ហើយអ្នកទីពីរក៏ខឹង … ហើយនៅថ្ងៃនោះ មានមនុស្សជាច្រើនបានដើរតាមគាត់ »( អ័ប្រាហាំ ៣:២៧–២៨ ) ។
មានតែផែនការមួយប៉ុណ្ណោះដែលត្រូវបានបង្ហាញ—គឺផែនការរបស់ព្រះវរបិតា ។ ព្រះវរបិតាសួគ៌របស់យើងមិនបានដាក់សំណួរថា « តើយើងនឹងធ្វើអ្វីទេ ? » ទ្រង់មិនបានស្វែងរកយោបល់ សុំអនុសាសន៍ ឬស្នើសុំសំណើនោះទេ ។ ខ្លឹមសារសំខាន់នៃសំណួររបស់ទ្រង់បានផ្តោតទៅលើថា នរណាដែលគួរតែត្រូវបានបញ្ជូនទៅដើម្បីប្រតិបត្តិតាមលក្ខខណ្ឌនៃផែនការរបស់ទ្រង់ ។
លូស៊ីហ្វើរមិនបានបង្ហាញពីផែនការមួយដែលត្រូវបានបោះឆ្នោតដោយមតិភាគច្រើននៃអ្នកចូលរួម នៅក្នុងក្រុមប្រឹក្សាជីវិតមុនផែនដីទេ ។ វាបានប្រឆាំងបះបោរ ! វាបានខំរកបំផ្លាញសិទ្ធិជ្រើសរើសរបស់មនុស្ស ហើយវាត្រូវបណ្ដេញចុះ និង « ក្លាយទៅជាសាតាំង … ជាអារក្ស ជាបិតានៃអស់ទាំងការកុហក ដើម្បីបញ្ឆោត ហើយដើម្បីធ្វើឲ្យមនុស្សខ្វាក់ ហើយដើម្បីដឹកពួកគេយកទៅជាឈ្លើយ » ( សូមមើល ម៉ូសេ ៤:១, ៣–៤ ) ។ អំនួត ភាពល្ងង់ខ្លៅ និងភាពអាត្មានិយមបានជំរុញឲ្យវាបះបោរប្រឆាំងនឹងផែនការរបស់ព្រះវរបិតា ។
ផែនការរបស់ព្រះវរបិតា និងដំណឹងល្អរបស់ព្រះអង្គសង្រ្គោះ
ផែនការនេះពិពណ៌នាអំពីកិច្ចការរបស់ព្រះវរបិតា និងព្រះរាជបុត្រាដែលធ្វើឲ្យពរជ័យនៃជីវិតដ៏នៅអស់កល្បជានិច្ច អាចកើតមានដល់មនុស្សជាតិទាំងអស់ ។
ដំណឹងល្អនៃព្រះយេស៊ូវគ្រីស្ទគឺជា វិធី ដើម្បីយើងទទួលបានពរជ័យដែលបានសន្យានៅក្នុងផែនការរបស់ព្រះ រួមមានទាំងគោលលទ្ធិ គោលការណ៍ ពិធីបរិសុទ្ធ និងសេចក្ដីសញ្ញាទាំងឡាយដែលយើងត្រូវជឿ និងធ្វើតាម ។ នីហ្វៃបានសរសេរថា « គ្មាននាមណាទៀតនៅក្រោមមេឃនេះ ក្រៅពីព្រះយេស៊ូវគ្រីស្ទ … ដែលមនុស្សអាចបានសង្គ្រោះនោះឡើយ » ( នីហ្វៃទី២ ២៥:២០ ) ។ ពិតណាស់ ព្រះអម្ចាស់ព្រះយេស៊ូវគ្រីស្ទគឺជា« ផ្លូវ ជាសេចក្តីពិត ហើយជាជីវិត បើមិនមកតាម [ ទ្រង់ ] នោះគ្មានអ្នកណាទៅឯព្រះវរបិតាបានឡើយ ( យ៉ូហាន ១៤:៦ បានគូសបញ្ជាក់បន្ថែម ) ។
ចំណងជើងនៃផែនការនៅក្នុងព្រះគម្ពីរមរមន
យើងរៀនពីសារៈសំខាន់នៃសេចក្ដីពិតតាមរយៈការកំណត់ និងសិក្សាចំណងជើងផ្សេងៗគ្នាជាច្រើននៃផែនការរបស់ព្រះវរបិតា ដែលមាននៅក្នុងព្រះគម្ពីរមរមន ៖ សក្ខីបទមួយទៀតអំពីព្រះយេស៊ូវគ្រីស្ទ ។ ឧទាហរណ៍ សូមពិចារណាគំរូចំណងជើងដែលបានជ្រើសរើសដូចខាងក្រោម ៖
-
« ផែនការនៃការប្រោសប្រណីរបស់ព្រះបង្កបង្កើតដ៏ធំយ៉ាងណា » ( នីហ្វៃទី២ ៩:៦ ) ។
-
« ផែនការនៃព្រះរបស់យើង » ( នីហ្វៃទី២ ៩:១៣ ) ។
-
« ផែនការនៃសេចក្តីសង្គ្រោះ » ( យ៉ារ៉ុម ១:២; អាលម៉ា ២៤:១៤ )
-
« ផែនការនៃសេចក្ដីប្រោសលោះ » ( អាលម៉ា ១២:២៥, ២៦, ៣០, ៣២, ៣៣; ៤២:១១, ១៣ ) ។
-
« ផែនការនៃការសាងឡើងវិញ » ( អាលម៉ា ៤១:២ ) ។
-
« ផែនការនៃសុភមង្គល » ( អាលម៉ា ៤២:១៦ ) ។
-
« ផែនការនៃសេចក្ដីមេត្តាករុណាដ៏មហិមា » ( អាលម៉ា ៤២:៣១ ) ។
ចំណងជើងនីមួយៗទាំងនេះជួយយើងឲ្យយល់កាន់តែច្បាស់អំពីការសន្យាដ៏មានតម្លៃនៃផែនការរបស់ព្រះវរបិតាសួគ៌ និងពង្រីកទស្សនៈរបស់យើងបន្ថែមទៀតអំពីគោលបំណង និងអត្ថន័យនៃជីវិតរមែងស្លាប់របស់យើង ។
ជាការគួរឲ្យកត់សម្គាល់ ចំណងជើងដែលប្រើញឹកញាប់បំផុតសម្រាប់ផែនការរបស់ព្រះនៅក្នុងព្រះគម្ពីរមរមន ( « ផែនការនៃសេចក្ដីប្រោសលោះ » ) ផ្តោតលើការប្រោសលោះពីអំពើបាប និងសេចក្ដីស្លាប់ ដែលអាចធ្វើទៅបានតាមរយៈដង្វាយធួនរបស់ព្រះយេស៊ូវគ្រីស្ទ ( សូមមើល អាលម៉ា ១២:២៥; ៣៣:២២ ) ។
ផ្លូវដែលបានរៀបចំរួចជាស្រេច
ព្រលឹងរបស់យើងគួរតែពោរពេញដោយការដឹងគុណ នៅពេលដែលយើងពិចារណាអំពីផែនការដ៏អស្ចារ្យរបស់ព្រះ ។ ចំណេះដឹងអំពីផែនការរបស់ទ្រង់ផ្តល់ឲ្យយើងនូវទស្សនៈដ៏មានតម្លៃ បង្កើនសេចក្តីអំណរដល់យើង និងពង្រឹងយើងឲ្យរឹងមាំ ដើម្បីយកឈ្នះលើបញ្ហាប្រឈម និងទុក្ខលំបាករបស់យើង ។
ព្រះវរបិតាសួគ៌ប្រាថ្នាចង់ឲ្យយើងត្រឡប់ទៅផ្ទះទៅរកទ្រង់វិញ ។ ទ្រង់អញ្ជើញ និងសន្យាដល់យើងនូវពរជ័យ ប៉ុន្តែទ្រង់នឹងមិនបង្ខំ ឬរារាំងយើងមិនឲ្យប្រើប្រាស់សិទ្ធិជ្រើសរើសដែលទ្រង់បានប្រទានឲ្យដល់យើងនោះទេ ។ យើងត្រូវតែធ្វើសកម្មភាព និងជ្រើសរើសវិលត្រឡប់ទៅរកទ្រង់វិញដោយធ្វើតាមគំរូបុត្រាស្ងួនភ្ងារបស់ទ្រង់ ។
« ផ្លូវ ត្រូវបានរៀបចំជាស្រេច ហើយបើសិនជាយើងនឹងមើល នោះយើងអាចរស់នៅរហូតតទៅ » ( អាលម៉ា ៣៧:៤៦ បានបន្ថែមការគូសបញ្ជាក់ ) ។
ខ្ញុំធ្វើជាសាក្សីដោយសេចក្ដីអំណរថា ព្រះវរបិតាសួគ៌គឺជាអ្នកនិពន្ធនៃផែនការដ៏ទេវភាពសម្រាប់កូនចៅរបស់ទ្រង់ ។ ព្រះយេស៊ូវគ្រីស្ទគឺជាព្រះអង្គសង្គ្រោះ និងព្រះប្រោសលោះរបស់យើង ។ ហើយក្នុងនាមជាសាវកថ្ងៃចុងក្រោយរបស់ព្រះអម្ចាស់ម្នាក់ ខ្ញុំសូមធ្វើជាសាក្សីថាទ្រង់ពិតជា « ផ្លូវ ជាសេចក្ដីពិត និងជាជីវិត » ។ ( យ៉ូហាន ១៤:៦ បានបន្ថែមការគូសបញ្ជាក់ ) ។