O le a Uiga o le Salamo Faamaoni?

O le Salamo e maua ai suiga i uiga ma amioga, ae o se suiga faigofie o uiga ma amioga e le o se salamo.

Ao i ai i lau auaunaga o se peresitene o le Univesite o Polika Iaga i Idaho, sa ou talanoa ai i se tasi aoauli o se Aso Sa ma se epikopo o le lotoa. E aunoa ma le faailoaina o le tagata, na ia faamatala ia te au na ia maua se tautinoga mai se tagata talavou lea na ia faia le tautinoga lea: "Epikopo, sa ou solia le tulafono o le ola mama i le po o le aso Faraile. O le talanoa ia te oe o le mea mulimuli lea i luga o lau lisi o mea e fai e salamo ai. O lea ua ou ta’uta’u atu, ua ou lagona le fiafia tele."

O le iloaina ma le lafoai o le agasala, lagona le salamo ma le faia o se faaleleiga mo agasala, ma le tautau atu o agasala i le Atua ma, pe a manaomia, i le tatou taitai perisitua o ni elemene aoga ma taua uma lava i le faagasologa o le salamo. Peitai, o nei laasaga taua e le na o se lisi e siaki ai amioga, e mafai ona tatou faamaeaina vave lava ma faauma malie ai. A tatou faia nei mea ma tatou le iloa ma faalagolago i le Faaola ma lana taulaga togiola, e o’o lava ile tatou taumafaiga sili e le aoga uma.

Ou te manatu i nisi taimi pe o tatou o tagata o le Ekalesia ua taulotoina laasaga eseese o le salamoe—pei o le iloaina, faanoanoa, ma faaleleia—ma galo ai le vaega e sili ona taua: o le Faaola. O le liliuese mai le leaga e le aumaia le faamalologa faaleagaga e aunoa ma le liliu atu ia Keriso.

O le Faaola e masani ona taua o le Fomai Sili, ma o lenei faalagiga e i ai se faatusa sili ona taua

Faamolemole manatu i le agasala o se manua faaleagaga e lagona ai le tausalaga pe, e pei ona taua e Alema i lona ataliia o Korianetona," faanoanoa o le mafaufau." O le tiga i le tino ao le tausalaga i le agaga--o se lapataiga o le lamatia ma o se puipuiga mai le pagatia faaopoopo. Mai le Faaola ma Lana Togiola e tafe mai ai le suauu malu e mafai ai ona faamalolo o tatou manua faaleagaga ma aveese ai le tausalaga. Ae ui i lea, o lenei suauu e faatoa faaaoga e ala i mataupu faavae o le faatuatua i le Alii ma le salamo. O taunuuga o le salamo faamaoni o le filemu, mafanfana, ma le faamalologa faaleagaga ma le faafouina.

O peresitene o siteki, misiona, ma itu; epikopo; ma peresitene o paranesi, e galulue i le pule o ki o le perisitua na latou maua ina ua vaetofia, o ni sui vaaia ia o le Faaola, e tuuina atu le fesoasoani taua i le salamo ma le faagasologa o le faamalologa. O nei taitai o ni fesoasoani i le fomai e mafai ona iloiloina ma’i faaleagaga ma tusi atu vai e manaomia ma togafitiga.

O manua matuia faaleagaga e manaomia ai taumafaiga faifaipea ma le taimi e faamaloloina ai mae’ae’a ma atoatoa. Ma o le faagasologa o le faamalologa lava ia e mafai ona tiga.

E tatau ona tatou faafetai ao tatou mafaufau loloto i folafolaga faaleagaga faapea o Keriso "o le a toetu mai le oti, ma le faamalologa i ona apaau; ma o i latou uma o le a talitonu i lona suafa o le a faaolaina i le malo o le Atua."

Ao tatou salamo ma liliu atu i le Alii, e taua lo tatou famaoni ia i tatou lava. E tatau ona tatou galulue ia faatoilalo le faia o alofaga, tuuaiga, ma faafiaamiotonu lea e mafai ona liliuese ai i tatou nai le liliu moni atu i le Alii.

Ma ao tatou salamo ma liliu atu i le Alii, e tatau ona i ai lo tatou manatu moni ma ia faamaoni ia te Ia e ana le salamo o loo tatou sailia. O le ta’uta’u atu ma le faamaoni i le Atua, ma afai e tatau ai i taitai perisitua, e tatau ona atoatoa ma mae’ae’a.

O nisi tagata e le malamalama i le natura o le salamo e talitonu e mafai ona latou salamo i se ala ua faatulagaina ma fuafuaina, ma faamoemoe e ta’uta’u atu ma le faigofie i le epikopo ona faasolo atu lea i le malumalu, i le misiona, ma isi taunuuga faaleagaga.

I le avea ai ma taitai i le Ekalesia toefuataiina a le Alii, ua i ai so tatou tiute paia e aoaoina tagata ia aua nei faaseseina e na ituaiga o mafaufauga sese. E faapefea ona salamo se tagata ma saili le faamagaloga ma se manatu moni ao le mea moni o lona manatu moni o le agasala? E faapefea ona liliu atu se tagata i le Alii ma le faamoemoe atoatoa o le loto ao le salamo e le ano i ai, e papa’u, pe sa fuafuaina le taimi e aloese ai mai le maasiasi lautele? E na ituaiga o faamaumau oa muai faatulagaina ma fuafuaina e amusia le Togiola a Keriso. O le faamagaloga mai na agasala e mautinoa e mafaia, ae o le auala e tasi e tatau ona mulimuli ai e le faigofie, ma o le malaga e le puupuu.

E faamamafaina soo i tusitusiga paia le fesootaiga faifaipea i mataupu faavae o le salamo, ma le taua o feagaiga paia ma sauniga, le mana faamama o le Agaga Paia, ma le faamanuiaga mamalu o le faatumauina pea o se faamagaloga o agasala.

I le avea ai ma tagata o le Ekalesia toefuataiina a le Alii, ua faamanuiaina i tatou e lo tatou uluai faamamaina mai agasala e fesootai ma le papatisoga ma le mauaina o le meaalofa o le Agaga Paia. Ma o lena uluai faamanuiaga ua faalauteleina e le malosiaga mo se faamamaina faifaipea mai agasala na mafai e ala i le mafutaga faifaipea ma le mana faamama o le Agaga Paia--e oo lava i le sui lona tolu o le Aigaatua. O nei faamanuiaga olioli e taua aua "e leai se mea eleelea e mafai ona tumau i le Atua."

O le sauniga o le faamanatuga o se valaaulia paia ma faifaipea ia salamo moni ma ia faafouina faaleagaga, o le totonugalemu lea o le faagasologa o le faamamaina faifaipea.

O le faatinoga o le tagofia o le faamanatuga lava ia e le faamagaloina ai agasala. Ae ao tatou salamo, saunia faalemafaufau, ma auai i lenei sauniga paia ma se loto momomo ma se agaga salamo, o le folafolaga e faapea e ono mafai ai ona tatou maua pea le Agaga o le Alii e faatasi ma i tatou. Ona, mafai lea e le mana faamama o le Agaga Paia, ona tatou faatumauina pea se faamagaloga o a tatou agasala.

E finagalo lo tatou Tama Faalelagi ma Lona Alo Pele mo i tatou ia maua le faafouina faaleagaga, ma le toefuataiina e faatasi lava i o tatou olaga ao papatisoina i tatou, maua le meaalofa o le Agaga Paia, ma faamauina o ni tagta o le Ekalesia toefuataiina a le Alii. O le papatisoga i le faatofuina, faaeega o lima mo le meaalofa o le Agaga Paia, ma le faamanatuga e le o ni sauniga eseese ma faafoliga.

Ae, o ni elemene i se mamanu fesootai ma faaopoopoina o se faagasologa faaola. O feagaiga e sosoo ai taitasi ma sauniga e siitia ma faalautele ai lo tatou faamoemoega, manao, ma faatinoga faaleagaga.

O le faasologa o le avea ma soo e faigofie ma tuusao: faaaoga le faatuatua i le Faaola, salamo, maua feagaiga ma sauniga e manaomia, suia, taumafai ia faatumauina pea se faamagaloga o agasala, ma tulei i luma i le faatuatua i le ala o feagaiga. O le fuafuaga a le Tama, le Togiola a le Faaola, ma mataupu faavae ma sauniga o le talalelei e tuuina mai le alofa tunoa tatou te manaomia e alualu ai i luma i lea fuaiupu i lea fuaiupu ma lea mataupu i lea mataupu agai i lo tatou taunuuga e faavavau.

O le salamo ma le faamagaloga o agasala o faamanuiaga ofoofogia ia e mafai ona o le togiola faaola faavavau ma le le iu a le Alii o Iesu Keriso. O nei mataupu faavae e moni, ma e sao lava. Ou te molimau atu i le paia o le Faaola, le soifua moni, ma le alofa e le mafaatusalia mo i tatou.