Kerisimasi i le Misiona

Afai o loo e mafaufau e auauna atu i se misiona, o le aluese mai lou aiga mo le Kerisimasi—o nisi taimi i se atunuu ese—e mafai ona avea ma se manatu taufaamatau.

Ae e tusa ai ma nei faifeautalai ua mae’a misiona, ua ia te oe ni mea matagofie e tulimatai atu i ai. Siaki mea na latou faasoa mai e uiga i a latou Kerisimasi i le misiona.

O ata na tusia e Jarom Vogel

O le vaega sili ona lelei o le Kerisimasi i le avea ai ma se faifeautalai o lou fai ma sui o Iesu Keriso—o le mafuaaga tatou te faamanatuina ai.

I Filipaina, matou te faamanatuina ai le Kerisimasi mai ia Setema seia oo ia Fepuari. E fiafia ma pisi tagata uma! Ae i Hong Kong, e matuai ese lava le siosiomaga. Sa faigata lena mea ia te a’u, ae sa faaosofia ai a’u e galue malosi. E le toatele ni tagata i Hong Kong e talitonu ia Iesu Keriso, ma na manaomia ona matou faasoa atu Lana savali ina ia mafai ai e le toatele o tagata ona lagonaIna Lona alofa i le Kerisimasi ma taimi uma.

E ui lava e te aluese mai le aiga, o le a e lagonaina se ituaiga o olioli e ese mai ai, ma o le a fesoasoani e te malamalama ai pe aisea tatou te faamanatuina ai le Kerisimasi. Afai e te taulai atu i le Faaola, e mafai ona e lagonaina ua faatasi ma oe le Tama Faalelagi ma Iesu Keriso.

Charles S., mai Manila, Filipaina; sa auauna atu i le Misiona a Saina Hong Kong

Ou te sau mai se aiga toatele, o lea sa tuua toatasi ai na o maua ma la’u soa i le Kerisimasi. Ae ua mavae atu le ma’i manatu i le aiga. E toatele tagata o le ekalesia na tatalaina o latou faitotoa ma “vaetamaina” i matou o ni tagata o le aiga mo le aso, ma sa fesoasoani tele lena mea.

Olioli i le Kerisimasi i le misiona aua o se taimi tulaga ese lea e faamalosia ai lau molimau ia Iesu Keriso. I le taimi o la’u misiona, sa ou iloa ai o le Kerisimasi e le faatatau i meaalofa po o le faia o se malologa mai le aoga—e faatatau i le meaalofa silisili o meaalofa uma, o Iesu Keriso. O lenei, o le faatusa o le Kerisimasi mo a’u o se faatanoa vao, ae le o se laau.

Gabrielly R., mai Sergipe, Pasila; sa auauna atu i le Misiona a Pasila São Paulo i Matu

Ona o faafitauli faaletino o le soifua maloloina, ina ua pe a ma se tausaga i la’u misiona, sa tatau ai ona ou alu i le fale mo sina taimi itiiti. Ae ou te lei alu ese, sa fai mai se tasi o uso ia te a’u, “Ia i ai i le aiga mo le Kerisimasi. O lou aiga lenei.”

Sa ou faia lena mea o se sini. Sa ou iloaina o le misiona o le mea lea na finagalo le Atua ou te i ai, ma sa ou manao moni lava e fai le mea na Ia poloai mai ai, lagonaina le olioli na ou lagonaina muamua, ma faaalu lau Kerisimasi i le mauaina o vavega o se faifeautalai.

Sa ou toe foi atu i la’u eria muamua i le vaiaso muamua o Tesema. Sa fesoasoani le Atua ia te a’u e toe oso i le galuega, ma o se vaitau lelei o le Kerisimasi. Sa o se auaunaga ma e faatotonugalemu ia Keriso, o le auala tonu lava e tatau ona i ai. O nisi taimi tatou te maua ai i vaega faalelalolagi o le Kerisimasi, ae e le o le autu lena. O le autu o le fanau mai o Iesu Keriso mo i tatou, soifua mo i tatou, ma maliu mo i tatou aua e alofa o Ia ia i tatou.

Sa ou fiafia e avea o Ia ma totonugalemu o lo’u olaga i le taimi o la’u misiona aua sa fesoasoani ou te lagona ai le latalata atili atu ia te Ia, ma sa ou faasoaina atu foi lena meaalofa i isi tagata. Sa matou aoaoina se tamaitai sa manao moni lava i lona aiga e o mai mo le Kerisimasi aua na te lei vaai ia i latou i sina taimi. Sa matou faamamaina lona fale, faatulaga lana laau Kerisimasi, ma matamata i le vitio a le Ekalesia “The Christ Child” faatasi ma ia.

Mulimuli ane sa ia fai mai ia i maua, “Ua mafai ona ou maua le Kerisimasi ona o oulua o tamaitai faifeautalai. Semanu ou te le aumaia lo”u aiga pe ana faapea lua te lei fesoasoani mai ia te a”u.” Sa matuai ootia ai lava lo’u loto. Sa ou matuai faafetai lava ona sa faatagaina a’u e le Atua ia ou oo i lena mea.

I le lumanai, ou te manao e faia a’u Kerisimasi ia sili atu e uiga ia Keriso ma ia auai atili i le Malamalama o le Lalolagi. O le auala lena e mafai ai ona tatou avea atili e faapei o Ia: e ala i le auauna atili atu ma le taulai atu i fafo.

Mary M., mai Colorado, ISA; na auauna atu i le Misiona a Arisona Mesa