O le a se mea e mafai ona ou faia pe afai o loo ou tauivi ma le popole po o le atuatuvale?

I le aluga o le lua tausaga ua mavae, sa ou tauivi ai ma le popole ma le atuatuvale ona o le tele o suiga na tutupu i lo’u olaga i le taimi lava e tasi: sa ou siitia ese, na siitia ese ou matua matutua, ma na maliu le uso o lo’u tama i le kanesa o le atepili, ae o lo o feagai foi lou tinamatua ma togafitiga o le kanesa o le susu. O le amataina o le aoga tulagalua na ou maua ai foi le tele o le popole. O se nofoaga fou ma ni tagata fou ma ni aafiaga, ma sa matuai lofituina lava au.

I le taimi lea, sa ou lagona le pei ua tapeina se ki o le moli ma sa leai se faamoemoe na totoe. Sa amata ni a’u osofaiga popole i aso taitasi ma sa ou le iloa po o le a le mea e fai.

Ona ou iloaina lea sa i ai se Faaola alofa o le a fesoasoani mai ia te au. O lea sa ou alu ai i lo’u Tama Faalelagi i le tatalo ma faitau e uiga ia Iesu Keriso i tusitusiga paia. Sa amata ona ou vaaia se fomai, ma sa ou maua lo’u faamanuiaga faapeteriaka.

E ui ina sa faigata na masina mo au, ae sa ou aoaoina le tele o mea. O lenei afai e mafai ona ou toe foi i tua ma sui soo se mea ina ia faafaigofie ai, ou te le faia.

Sa ou iloaina foi talu ai nei o le a ou toe malaga ese foi, ma sa ou iloaina sa saunia au e le Tama Faalelagi mo le luitau o i luma atu.

A o tuputupu ae la’u sootaga ma le Atua, ua tele atu lo’u mautinoa e taulima o’u luitau faalemafaufau. Ua le aunoa nei ona ou vaai atu i lo’u Faaola. O Ia o lo’u mapusaga ma lo’u taiala i lenei lalolagi le mautonu, ma o Ia foi mo outou.

O Ia o le malamalama o le lalolagi. O le a Ia sii a’e au avega ma faamama i ou tiga a o e taumafai e avea e faapei o Ia.