Fai se Eseesega ma ni Valaaulia Faigofie
E te le iloa lava po o le a le lelei o le a oo mai a o e faasoa atu le alofa ma le malamalama o le Faaola i isi.
Ata na tusia e Kyungeun Park
I se tasi aso ao aoga Peresitene M. Russell Ballard (1928–2023) i le aoga maualuga, sa fesili atu lana uo o Nedra ia te ia, “Russ, aisea e te le alu ai i le seminare?”
I lena taimi, sa lei auai matua o Peresitene Ballard i le lotu. Sa ia alu i nisi taimi ma ni uo lelei, ae sa lei alu o ia i le seminare. O lea na valaaulia ai o ia e Nedra, ma o le aso na sosoo ai na ia taunuu ai i le 6:30 mo le seminare i le vaveao. Mai lava i lena taimi, sa auai ai o ia i le seminare i aso uma—e oo lava i taeao malulu ma toulu le kiona o le taumalulu.
“O mea na ou aoaoina i le seminare na ootia ai lo’u loto,” na fai mai ai Peresitene Ballard. “Sa tuputupu ae la’u molimau a o ou aoao atili e uiga ia Iesu Keriso ma Lana talalelei toefuataiina. O lenei mea na saunia ai a’u e auauna atu i la’u misiona i Egelani ma faaauau ai pea i le olaga atoa o le auauna atu i le Alii ma Lana Ekalesia.”
Atonu e lei iloa e Nedra le mea o le a oo mai i lana valaaulia faigofie, ae o lana faataitaiga ua faaalia ai o avanoa o loo i soo se mea e faasoa atu ai le malamalama ma le olioli lea e aumaia e Iesu Keriso ma Lana talalelei. O le taimi lenei o le tausaga—taimi o le Kerisimasi—o se taimi faapitoa lea e faia ai a o tatou faamanatuina le soifua mai o Iesu Keriso, “o le malamalama, o le ola, ma le faamoemoe o le lalolagi.”
Amata i le Alofa
O le auaunaga a le Faaola o loo faaalia mai ai ia poloaiga sili e lua: “E te alofa atu i le Alii lou Atua ma lou loto atoa, ma lou agaga atoa, ma lou manatu atoa” ma “E te alofa atu i lē lua te tuaoi, ia pei o oe lava ia te oe” (Mataio 22:37, 39).
O iina e tatau ona tatou amata ai pe a tatou valaaulia isi i le lotu po o gaoioiga e pei o se sauniga faamanatuga o le Kerisimasi po o se pati o le Kerisimasi a le uarota. O lou alofa mo le Atua o le a faamalosia ai lou manao ma le tomai e auauna atu ia te Ia ma alofa ma auauna atu i isi. Afai e mafai ona lagona e i latou o siomia oe e te alofa moni ma popole mo i latou, atonu o le a sili atu ona latou naunau e aoao atili e uiga ia te oe—e aofia ai mea e te talitonu i ai.
Faasoa Atu Mea o i Totonu o Lou Loto
Faapea la ua valaaulia oe e lau uo i se pati, ae ua uma ona e filifili e alu i se malaga a le uarota i le malumalu i lena aso. Nai lo le na o le faapea atu, “Faamalie atu, e le mafai ona ou alu,” e mafai foi ona e ta’u atu i lau uo e uiga i le malumalu ma faamanuiaga na te aumaia i lou olaga. E mafai ona faigofie lava !
Na aoao mai Peresitene Ballard tatou te “molimau atu i mea ua [tatou] iloa ma talitonu i ai ma mea [tatou] te lagonaina” ma “o se molimau mama … e mafai ona tauaveina e le mana o le Agaga Paia i loto o isi o e ua saunia ina ia taliaina.” E mafai foi ona tatou faasoa atu mea o i o tatou loto “e ala i le avea ma ni tuaoi lelei ma le agalelei ma faaali atu le alofa.” O le faia o lena mea, e mafai ai ona tatou “faasusulu atu le talalelei i o tatou lava olaga, ma … faasusulu atu i [isi] faamanuiaga o loo ofoina mai e le talalelei.”
E mafai ona taufaafefe le faasoa atu. Atonu e te popole o le a le fiafia isi pe teena foi oe. Atonu e tupu lena mea i nisi taimi, ae o le a taialaina oe e le Agaga a o e tatalo ma agai i luma ma le lototele e faasoa atu ai mea ua e iloa e moni i avanoa uma e te maua.
Aua Le Fiu!
E ui o le ituaiga o tali na tuuina atu e Peresitene Ballard i le valaaulia a Nedra o le a le avea pea ma ou aafiaga, ae e taua le aua lava nei fiu! E mafai e tagata ona teena au valaaulia mai lea taimi i lea taimi. Pe a tupu lena mea, ia talia ma le agalelei ma aua nei mamafa ia te oe. O se “leai” e auai i le lotu po o se gaoioiga po o le saili atili e uiga i ou talitonuga e masani lava e le faapea o se “leai” ia te oe.
Ia avea pea ma se uo. Aapa atu i taimi e te mafaia ai. Ma vaavaai i taimi uma mo ni auala e faasoa atu ai le malamalama o le Faaola i au upu ma faatinoga.
E pei o Nedra, e te le iloa lava po o le a le lelei o le a oo mai a o e faaalia le alofa, faasoa atu mea o loo i lou loto, ma valaaulia isi ia lagonaina le alofa ma le malamalama o le Faaola—i le Kerisimasi ma taimi uma.