Meaalofa i Augatupulaga Uma
A o e fesootai atu i le talafaasolopito o lou aiga, o le a matua faamanuiaina oe ma ou tuaa.
Ata na tusia e le Guev Design
O le vaitau o le Kerisimasi o se taimi faapitoa lea e faatasi ai ma le aiga. Atonu o loo e tulimatai atu i tu ma aga masani faaleaiga e sili ona e fiafia i ai po o meaalofa o le a e tuuina atu i ou matua po o nai ou tei.
Ae faapefea tagata o lou aiga i le isi itu o le veli?
O le galuega o talafaasolopito o aiga o se vaega taua o le faapotopotoina o Isaraelu, o le “galuega aupito silisili lea i le lalolagi.” Ma o le togiolaina o e ua maliliu na mafai ona o le Togiola a le Faaola, o lona soifua mai lea tatou te faamanatuina i lenei taimi. Talu ai o le taimi o le Kerisimasi o se vaitau o le foai atu, o a meaalofa e mafai ona e tuuina atu—ma maua—e ala i talafaasolopito o aiga?
O Se Fesootaiga i le Aluga o Taimi
Ao tuputupu ae, sa ou faapea ua uma la’u galuega o talafaasolopito o aiga. E oo ane i le taimi ua lava lo’u matua e alu ai i le malumalu, ua maea uma sauniga a o’u tuaa ua faamaumauina. Sa lei foliga mai sa i ai se isi mea e mafai ona ou faia.
Ona ou maua lea o faamaumauga mo le tina o lo’u tinamatua o Elva Butler.
Sa soifua mai Elva i Iuta ina ua siitia atu ona matua ma paionia iina. Sa ia faia uma ana lava feagaiga a o ola, o lea sa ou manatu ai e le mafai ona ou faia se mea mo ia. Ae o le iloaina o ana faamaumauga na avea o se faamanuiaga tele—mo au!
Ou te lei feiloai lava ia Elva, ae ina ua uma ona ou tilotilo i ona ata, tusitusiga i api talaaga, ma tusi, sa ou lagonaina e pei na ou iloaina o ia. Sa fiafia o ia i tusi ma solo, e pei lava o au! Sa ou faamemelo i lona faatuatuaina o le Atua i taimi o ona faigata patino.
Ona o lona faatuatua, ua faamalosia ai lo’u faatuatua. Ou te lagona o loo leoleoina a’u e ia ma isi o’u tuaa.
O Le Agaga o Elia
Na auina mai le perofeta anamua o Elia “e liliu loto o tamā i fanau, ma fanau i tamā” (Mataupu Faavae ma Feagaiga 110:15). Na tupu lenei mea ina ua ia faaee atu ia Iosefa Samita ki o le mana o faamauga. O le mafuaaga lena e taitai atu ai i tatou e lagona faaleagaga e fausia se sootaga i le va o augatupulaga e masani ona ta’ua o le “agaga o Elia.”
E le faigofie i taimi uma le galuega o talafaasolopito o aiga. Atonu o galuega faalemalumalu a lou aiga e foliga mai ua “uma,” e pei o a’u galuega. Atonu e laitiiti lou gafa o le aiga ona e le o ia te oe faamaumauga e faaopoopo pe faafesootai ai nisi tagata. Po o le a lava le foliga o le gafa o lou aiga, e mafai ona e lagonaina le agaga o Elia pe a liliu atu lou loto i ou tuaa. A e faia, o le a e maua se malamalama sili atu i lou tulaga i le fuafuaga o le faaolataga.
O se meaalofa mamana lena. O a meaalofa o le a e tuuina atu i ou tuaa o se taui?