Folafolaga mo le Faavavau
O le aoaoina e mafai ona faavavau aiga ua faamanuiaina ai lo’u aiga e faavavau. E mafai foi ona faamanuiaina ai lou aiga.
Matua o Elder Soares, Aparecido ma Mercedes Soares
A o avea ma se alii talavou, sa le fiafia lo’u tama, o Aparecido, i mataupu faalelotu. O ona matua o ni tagata lelei ae le o ni tagata lotu. Ae ui i lea, a o tuputupu ae o ia i le avea ma tagata matua, sa ia faitauina le Tusi Paia, auai i vasega faale Tusi Paia, ma suesue i le soifuaga o Iesu Keriso. O lenei mea na mafua ai ona ia fiafia tele i le talalelei a le Faaola ma i le aiga. Sa manao o ia e faaipoipo i se tasi e tutusa mea e fiafia i ai.
O lo’u tina, o Mercedes, na sau mai se aiga lolotu malolosi. Sa latou auai i le lotu ma faatino la latou tapuaiga. O le tuputupu ae i lena siosiomaga, e lei misi ai lava se lotu a lo’u tina.
Ina ua uma ona faaipoipo o’u matua ma fananau mai o’u uso e toatolu ma au, sa la faia le mea sili la te mafaia e tausi ai i matou e faavae i aoaoga a le Faaola. I se tasi aso na fai atu ai le uso o lo’u tina i lo’u tama, “Afai e te manao moni lava e tausi lau fanau tama e toafa e faatotonugalemu ia Keriso ma ia i ai le Atua i lou aiga, e tatau ona e aoao atili e uiga i la“u ekalesia.”
O ia o se tagata O Le Ekalesia a Iesu Keriso o le Au Paia o Aso e Gata Ai.
O Le Talalelei ua Faamanuiaina ai Lo’u Aiga
Sa lei fiafia tele lo’u tama e suesue atili e uiga i le lotu a le uso o lo’u tina, ma e leai se mea na tupu seia tu’itu’i mai faifeautalai i lo matou faitotoa. A o la aoaoina i matou, o le mea e tasi na fiafia ai o’u matua i le talalelei toefuataiina a Iesu Keriso o le taua o le aiga ma le auala e faamanuiaina ai aiga e le talalelei.
Mo ni masina, sa auai ai o’u matua i le lotu ma auai faatasi ma tagata o le ekalesia, ae sa le’i papatisoina i laua i le taimi lava lena. A o la feiloai ma faifeautalai ma faaauau pea ona suesue i le talalelei, sa la aoaoina le taua o le aoaoina o le la fanau i le malamalama ma le upumoni ma e mafai ona faavavau aiga. Na iu lava ina papatisoina i la’ua.
O le manatu o le i ai o ni aiga e faavavau na matua ootia ai loto o o’u matua lea na avea ai ma vaega autu o lo laua liua. Sa latou valaaulia foi tuaoi e faalogologo soo i lesona a faifeautalai.
Fausia o ni Aiga e Faavavau
Ina ua uma le papatisoga o o’u matua, sa la faia e le aunoa afiafi faaleaiga ma suesuega o tusitusiga paia, auai ma le faamaoni i le lotu, ma amata galuega o talafaasolopito o aiga. Faatasi ai ma na taumafaiga, sa laua faamoemoe ai e fatu se aiga e faatotonugalemu i le talalelei a Iesu Keriso ma sa mananao ia faamauina o se aiga e faavavau.
O le tausaga na papatiso ai o’u matua, sa leai se malumalu i Pasila. O le malumalu aupito lata ane i le mea sa matou nonofo ai i São Paulo o le Malumalu o Mesa Arisona, toeitiiti 6,000 maila (9,650 km) le mamao! Sa taugata tele le malaga, o lea sa faatalitali ai o’u matua mo le tele o tausaga mo le faapaiaga o le Malumalu o São Paulo Pasila, o le uluai malumalu na fausia ma faapaiaina i Amerika i Saute atoa, ona faatoa maua lea o o laua sauniga o le malumalu ma faamauina. E oo atu i le taimi lena, ua ou auauna atu i se misiona i Rio de Janeiro.
Pe a ma le lua masina ao lei faaiuina la’u misiona, sa faatagaina ai e la’u peresitene o le misiona ma’ua ma la’u soa e malaga i le po ma tagata o le siteki mai Rio de Janeiro i le Malumalu o São Paulo Pasila ina ia mafai ona faamauina a’u i o’u matua ma maua o’u lava sauniga o le malumalu. O lo’u aafiaga i le malumalu sa i ai se aafiaga maoae i le vaega na totoe o la’u misiona. Sa ou fiafia e molimau atu e uiga i le malumalu ma le taua o le fuafuaga a le Atua mo aiga. Na suia foi e le malumalu la’u vaaiga mamao i le lumanai.
Elder Soares a o avea ma se faifeautalai talavou, faatasi ai ma lona uso ma matua
Ina ua foi mai la’u misiona, sa ou manao e su’e se soa e faavavau ma ia faamauina i le malumalu. Sa ou feiloai muamua i lo’u toalua o Rosana, a o ma auauna atu i le misiona lava lea e tasi. I ni nai masina talu ona uma a ma’ua misiona, sa ma’ua feiloai i se siva a siteki tuufaatasi. Sa amata ona ma tafafao faamasani, ma i le lua tausaga mulimuli ane, sa ma faaipoipo ma faamauina i le malumalu faatasi ai ma le sini o le tausia o lo ma aiga e faavavau.
Elder Soares ma lona faletua, o Rosana
Sa ma galulue faatasi ma Rosana e fatu se aiga e taulai atu i le Faaola, Ana aoaoga, ma aoaoga a Ana perofeta ma aposetolo. I se taimi, sa ou maua ai le faamanuiaga o le faamauina o la’u fanau e toatolu i o latou taitoalua. O le vaaia o i latou o tootutuli i le fatafaitaulaga i totonu o le malumalu o se aafiaga e le mafaagaloina ma matagofie. O le asō, o loo tausia e le ma fanau a latou fanau i le talalelei—e pei lava ona sa faia e o’u matua mo a’u ma o’u uso ma a o ma taumafai ma Rosana e fai mo i latou. E mafai ona ou vaai i faamanuiaga o le talalelei o faaauau pea e faavavau mo lo matou aiga!
O Elder Soares ma lona faletua, o lana fanau, ma o latou taitoalua
Ua Faia e le Faaola Ina ia Mafaia
Soo se mea lava ou te alu i ai i se tofiga faale-Ekalesia, ou te taumafai e saili sina faatusa o le Fanau Mai o Iesu e faatau ma aumai i le fale. Ua ma lagonaina ma Rosana o nei Faatusa o le Fanau Mai o Iesu e fesoasoani e faafesootai atu i tatou i le Faaola. O le asō ua i ai sa matou faaputuga! I se tasi tausaga a o lumanai le Kerisimasi, sa matou tuuina uma ai a matou faatusa o le Fanau Mai o Iesu i ni fata lapopoa se lua i lo matou fale. Ina ua mavae le Kerisimasi, sa tonu ia i maua e tuu ai pea. O aso uma lava e faamanatu mai ai e na faatusa o le Fanau Mai o Iesu ia i matou le mea e sili ona taua ia i matou—o le Faaola, Lana talalelei, ma lo matou aiga.
Ua faatagaina e Elder Soares lana faaputuga o faatusa o le Fanau Mai o Iesu e faamanatu atu ai ia te ia le Faaola i le tausaga atoa.
Mo i tatou, o le aiga o mea uma ia aua “o le aiga o le totonugalemu lea o le fuafuaga a le Foafoa mo le taunuuga e faavavau o Lana fanau.” Ae a aunoa ma Iesu Keriso, e le mafai lena fuafuaga. O Lana Togiola ma Lana talalelei ua mafai ai le folafolaga o aiga e faavavau.
Na aoao mai Peresitene Russell M. Nelson, “E nao sauniga faaola o le talalelei a Iesu Keriso e mafai ona faaeaina ai aiga. O le taunuuga tupito lea o loo tatou taumafai i ai ia tatou fiafia o se aiga—maua faaeega paia, faamauina, ma saunia mo le ola e faavavau i le afioaga o le Atua.”
I o tatou aso, ua aoao mai perofeta ma aposetolo faapea “E maua le fiafia i le olaga faaleaiga pe a faavae i aoaoga a le Alii o Iesu Keriso.” Po o le a lava le tulaga o lou aiga, a o e faia le mea sili e mulimuli ai i le Alii, o le a Ia faamanuiaina oe i le malosi e saili ai ni auala e siitia ai lou aiga i le taimi nei ma le aiga o le a e maua i se aso. O le a Ia fesoasoani ia te oe ia alualu i luma agai atu i le mamalu o le a i ai se aso e ola fiafia ai faatasi ma e pele ia te Ia ma lo tatou Tama Faalelagi e faavavau.