O Se Tu masani o le Kerisimasi—Sui

I le 1843, sa tusia ai e le tusitala Peretania o Charles Dickens lana tala masani A Christmas Carol. E faatatau i se toeaina matua e igoa ia Epenesa Scrooge, e le popole tele i se tasi po o soo se mea nai lo ana tupe. Ina ia faaali atu le faanoanoa tele o le tagata o Scrooge, ua faaalia ai e Dickens o ia e faatauemu i le Kerisimasi ma soo se tasi e manao e faamanatuina. Ona oo lea i le Kerisimasi, sa asiasia o ia i le po e agaga o e ua faaali atu ia te ia ana Kerisimasi i le taimi ua tuanai, taimi nei, ma le lumanai. O nei faaaliga ua mafua ai ona ia tomanatu i lona olaga, i le tulaga o lona agaga, faapea foi i ana sootaga ma isi tagata. Ua ia tauto ai e sui—ma ua ia faia. O le Scrooge fou, ua sili atu ona fiafia ma faamanuiaina ai isi.

Sa talanoa Elder Gerrit W. Gong o le Korama a Aposetolo e Toasefululua e uiga i lenei tala ma faapea mai:

“O le Kerisimasi lenei, atonu e mafai ona tatou talia—ma ofo atu—meaalofa taua a Iesu Keriso o le suia ma le salamo, o le faamagalo ma faagalo, o le tuuina atu na meaalofa i isi ma i tatou lava.

“Ia tatou faia se filemu ma le tausaga ua te’a. Faate’a faalavefau faalelagona ma le vavaō, o feteenaiga ma le feitaga’i ua tumu ai o tatou olaga. Tau ina ia tatou tuuina atu e le tasi i le isi o tatou avanoa fou nai lo le tamau i o tatou tapulaa ua tuanai. Tatou tuu atu i le Scrooge fou ua i totonu o i tatou taitoatasi se avanoa e sui ai.

“Na afio mai lo tatou Faaola i le Kerisimasi e faasaoloto e na saisaitia—ae le na o i latou i le falepuipui. E mafai ona Ia faasaolotoina i tatou mai aitu o o tatou tuanai, ma talaia i tatou mai filifili ma faanoanoaga o a tatou agasala ma agasala a isi. E mafai ona Ia togiolaina i tatou mai lo tatou manatu ia i tatou lava, manatu faapito e ala i le toefanauina ia te Ia.”

E te le tau leaga e pei ona sa i ai Scrooge e faataga ai le Kerisimasi e suia oe mo le lelei. O lea la, e mafai faapefea e i tatou taitoatasi ona avea le Kerisimasi o se taimi o le faafouga ma suiga? O ni nai manatu nei atonu e te amata ai:

• Filifili se uiga o le Faaola e taulai atu ai i Kerisimasi taitasi. E mafai ona e suesue i se uiga o Iesu Keriso i le taimi o le Kerisimasi ma taumafai ia sili atu ona mulimuli i Lana faataitaiga. Mo se fesoasoani, e mafai ona e vaai i le Tala’i La’u Talalelei: O Se Taiala i le Faasoaina Atu o le Talalelei a Iesu Keriso, mataupu 6.

• Faaopoopo se tu masani e faatotonugalemu ia Keriso. Afai e te lagona e manaomia e lau faamanatuina o le Kerisimasi se isi uiga, taumafai e faaopoopo se tu masani e fesoasoani ia te oe e taulai atili atu ai ia Iesu Keriso. E le faapea e tatau ona tulaga ese. E mafai ona e faalogologo i musika e sili atu ona faatotonugalemu ia Keriso, auauna atu i se tasi i lou aiga, valaaulia uo i le lotu mo le sauniga faamanatuga o le Kerisimasi, pe fai se galuega faatino o le Fanau mai o Keriso.

• Sui se tu masani mo le lelei sili atu. Ina ia faia sina alualu i luma i au gaoioiga masani, e mafai ona e faaaofia ai se tagata fou pe faaopoopo i ai se elemene e faatotonugalemu ia Keriso.

• Fai atu leai i se tu masani po o se valaaulia pe afai e te lagona le atuatuvale. Afai e te lagona o lau kalena o Tesema ua tumu i gaoioiga faa-lotoifale ma e leai sou taimi e mafaufau ai e uiga i le Faaola pe faaalu se taimi faatasi ma e pele i le ala e te manao ai, aua e te faanoanoa i le faataatia ese o se gaoioiga.

E mafai foi ona e pei o le Scrooge fou: “Sa fai mai lava e uiga ia te ia i taimi uma, sa ia iloa le auala e tausia lelei ai le Kerisimasi.” E mafai ona e faatumauina lelei le Kerisimasi e ala i le filifili e faalatalata atili atu i le Tama Faalelagi ma le Faaola i sina auala i tausaga taitasi.