Santa Ninja Faalilolilo

Ata na tusia e Katelyn Budge

Mo lo’u aiga, o le Kerisimasi o se aso malolo e tumu i le olioli. Mo le umi lava ou te manatua ai, sa faia ai e lo’u aiga se mea matou te ta’ua o le Santa Ninja Faalilolilo. O se tu masani faigofie ae faafiafiaina. Muamua, matou te saunia se meaalofa ma se kata mo se tasi e le tagolima. Ona matou tolotolo atu lea i lo latou faitotoa, tuu ai iina, faatatagi le logo o le faitotoa, ma taufetuli ese ae latou te lei maua i matou. E pei o le avea ma se vaega o se misiona faapitoa o le Kerisimasi!

E ese le manaia o le lagona o le avea ma Santa Ninja Faalilolilo. O taimi uma lava, ou te maua ai lenei lagona mafanafana ma le fiafia i totonu lea ou te ataata ai, e pei o sina fiafia itiiti i lo’u loto. O lenei tu masani ua suia ai le ala ou te vaai ai i le Kerisimasi.

A o ou laitiiti, sa ou manatu o le Kerisimasi sa tele lava ina faatatau i meaalofa. Ae o le taimi nei, ua ou vaai i ai o se taimi e auauna atu ai i isi ma faasoa atu le alofa o Keriso. Matou te faia auaunaga o se vaega o Kerisimasi uma, ma taumafai e fesoasoani i le tele o tagata i le mea e mafai ai. E le faigofie i taimi uma—o nisi taimi o lona uiga o le alapo e fesoasoani i le tuaoi o le matou auala pe faaalu se aoauli o se Aso Toonai e faamama ai le falesa. Ae e aoga lava i taimi uma. O le taui o le vaaia lea o le lotofaafetai o isi tagata, mauaina o faamanuiaga i lo’u lava olaga, ma le mauaina o le fiafia mama lea e oo mai i le iloaina sa ou faia se mea lelei.

Pe a ou mafaufau ia Iesu Keriso, ou te mafaufau i le tele o Lona alofa ia i tatou ma le ala na Ia faaalia ai lena alofa e ala i le auauna atu i isi. O Lona olaga e musuia ai foi au e auauna atu, ma ou te iloa a ou auauna atu i isi, o loo ou auauna atu foi i le Atua. O le Kerisimasi e le na o le tuuina atu o meaalofa; e faatatau i le foai atu o oe lava ia. O le mea lena na aoao mai e Santa Ninja Faalilolilo ia te au, ma o le mea lena ou te faamoemoe ou te tauaveina faatasi ma au i aso uma.