Saunia mo le Faaipoioga e Faavavau?
O auala nei e lima e saunia ai o se talavou.
Ina ua faatoa lua vaiaso talu ona ou faaipoipo, sa toeitiiti lava a ou susunuina lo ma fale mautotogi. Sa ou faia ni paanunu ae faafuasei ona mu le ma masini faapau falaoa fou.
A o ou tu ai iina ma le teim sa faia se faatinoga e lou toalua fou. Sa ia ato i fafo le masini ma faau i lalo. Faatasi ai ma lau paanunu ua uliuli, na sau ai … se pepa o faatonuga ua faapaanunu lelei. Oi.
O le mea e faafetai ai, e le manaomia ona e atoatoa i le faia o paanunu (po o se isi lava mea) ina ia saunia ai mo le faaipoipoga e faavavau. Ae e i ai ni nai mea faigofie e mafai ona e faia e saunia ai, o se talavou, i le taimi nei.
Afai e te manatu e le faatatau nei le faaipoipoga e faavavau ia te oe, ia faaauau pea ona faitau. Ioe, atonu o le faaipoipoga o ni nai tausaga le mamao. Ae o le faaipoipoga ma le aiga e totonugalemu i le fuafuaga o le fiafia a le Tama Faalelagi—i se isi faaupuga, e matuai taua, taua moni lava. Siaki manatu nei e lima ma amata ona sauniuni nei loa.
1. Faaleleia Au Sootaga
O a mai au sootaga ma ou matua ma nai ou tei? Afai na o sina togitogi laitiiti, atonu o se mea lenei e galue ai. E mafai foi ona e galue i au sootaga ma isi tagata. Taape i tua! Talanoa i se tasi e fou, e oo lava i se tasi o … o le itupa faafeagai. O le tele o lou faataitai o tomai faale-sootaga, o le faigofie foi lena pe a amata ona e tafao faamasani ma le manatu mamafa i ai.
2. Taumafai e Tausia le Tulafono o le Legavia
Ua aoao mai leMo Le Malosi o le Autalavou: O se Taiala mo le Faia o Filifiliga “Ona o lagona faalefeusuaiga e matua paia ma mamana tele, ua tuuina mai ai e le Atua ia te oe Lana tulafono o le ola mama e saunia ai oe e faaaoga nei lagona e pei ona Ia faamoemoeina. O loo tau mai i le tulafono o le legaviā e faapea, e faatagaina e le Atua gaoioiga faalefeusuaiga i le na o le va o se alii ma se tamaitai ua faaipoipoina” ([2022], 23). O le taumafai e tausia le tulafono o le legavia o le a saunia ai oe mo se sootaga o le faaipoipoga e sili atu ona anoa.
3. Mafaufau e Auauna Atu i se Misiona
Na ou faamisiona i Guadalajara, Mekisiko. O le nonofo faatasi ma se soa 24/7 sa faigata i nisi taimi ma saunia ai au mo sootaga i le lumanai. Sa ou tuputupu ae foi faaleagaga. Na saunoa Peresitene Russell M. Nelson: “Ou te toefaamautu atu ma le malosi ua poloaiina e le Alii ia alii talavou agavaa uma lava, ma malolosi ia sauniuni mo, ma auauna atu i se misiona. … Mo outou tuafafine talavou ma malolosi, o se misiona o se avanoa mamana foi, ae tuu i le faitalia, .” Afai e te manao e auauna atu ae e te le o mautinoa pe o e malosi faaletino pe faalemafaufau, talanoa i lou epikopo e uiga i filifiliga e fetaui ma ou tulaga, e aofia ai misiona o auaunaga.
4. Alu i le Malumalu
Sa e iloaina o le malumalu o le nofoaga lea e tatau ona [e] i ai, ae na e iloa e mafai ona fesoasoani ia te oe e saunia ai mo le faaipoipoga e faavavau? A o e auai i papatisoga i le malumalu (ma, mulimuli ane, isi sauniga), o le a faamanuiaina oe i le mana o le Atua e fesoasoani ia te oe, e aofia ai tafaoga faamasani ma faaipoipoga. O le auauna atu i ou tuaa i le malumalu e saunia ai foi oe e auauna atu i lou toalua i le lumanai (talitonu mai ia te au—i le faaipoipoga, e taua le auauna atu). Ma o le tumau o le agavaa mo se pepa faataga o le malumalu ma le tausia o au feagaiga o le a saunia ai oe ina ia faamauina i le malumalu i le feagaiga o le faaipoipoga e faavavau i se aso.
5. Salamo i Aso Taitasi
E le gata i le na toeitiiti mule fale, sa ou faia le tele o mea sese talu ona ou faaipoipo. Ae ona o Iesu Keriso, e le afaina lena mea! I le faaipoipoga, e leai se tasi e atoatoa. O le a e le atoatoa foi i le taimi nei. Tau lava o le taumafai pea e mulimuli i le Faaola ma salamo i le ala. A o e faia, o le a saunia oe e le Tama Faalelagi, fesoasoani ia te oe, ma taiala oe. O le taimi lava e te faaipoipo ai, ia faaauau pea ona galue ia faaleleia atili. O le mea e laki ai o le faaipoipoga e faavavau o le—faavavau lena. E mafai e oe ma lou toalua ona faaauau pea ona salamo ma alualu i luma faatasi agai atu i le ola e faavavau.