Ua Faaleleia le Faamagaloga

I le vasega fitu sa i ai lenei tamaitiiti na sauaina au. Sa ia faasalalau ni tala leaga ma le le moni e uiga ia te au ma faia ai isi tagata e talitonu e le o au o se tagata lelei. E vavae ese a’u e tagata ona o tala sa ia faasalalauina, ma e oo lava i nisi o a’u uo na amata ona talitonu i ai. Sa ou talanoa i o’u matua ma se tasi o o’u faiaoga e uiga i ai, ae sa ou fefe tele e talanoa i le tamaitiiti e uiga i ai.

I le taimi o le taumafanafana, sa ou faia ai se tolauapiga faaili, ma sa i ai lenei tamaitiiti i le vaega o le lesona e tasi e pei o a’u. I le taimi muamua, sa ou le fiafia ona sa ou toe faatasi ma ia. Ae sa ou filifili e talanoa atu ia te ia. Ina ua uma le lesona lona lua, sa ou ta’u atu ia te ia o mea sa ia fai mai ai e uiga ia te a’u e le moni ma fesili atu ia te ia pe aisea na ia faia ai.

Sa ia faatoese mai ma iu ai ina tautau atu i tagata uma i le aoga o tala e le moni. Ma sa ou faamagalo ia te ia. I le tolauapiga a le faaili, sa ou valaaulia o ia e taaalo ma au i kata i le taimi o a matou malologa, ma na iu lava ina avea i maua ma uo.

I le avea ai ma se tagata O Le Ekalesia a Iesu Keriso o le Au Paia o Aso e Gata Ai, o la’u sini o le avea ma se e faatupuina le filemu. Ou te taumafai e faauo atu i tagata uma. Sa aoaoina au e lo’u tama e uiga i le faamagaloga ma a e salamo mo au agasala, ua fetalai mai le Alii o le a Ia "le toe manatuaina lava" (Mataupu Faavae ma Feagaiga 58:42). O le faamagalo atu e mafai ona matuai faaleleia lava.

O Iesu Keriso o le faataitaiga sili lea. E atoatoa o Ia. Ou te iloa afai ou te mulimuli ia te Ia, e mafai ona ou ulu atu i le malo selesitila faatasi ma Ia ma le Tama Faalelagi.