សម័យប្រជុំរសៀលថ្ងៃអាទិត្យ
ពួកគេគឺជាចៅក្រមជំនុំជម្រះខ្លួនគេផ្ទាល់
សេចក្តីដកស្រង់
ស.រ.អា.
គោលបំណងដ៏សំខាន់នៃការបង្កបង្កើត និងជីវិតរមែងស្លាប់របស់យើង គឺដើម្បីផ្តល់ឲ្យយើងនូវឱកាសដើម្បីធ្វើទង្វើ និងប្រែក្លាយជាអ្វីដែលព្រះអម្ចាស់អញ្ជើញយើងឲ្យប្រែក្លាយ ។ …
… យើងមិនទទួលបានពរជ័យពីសិទ្ធិជ្រើសរើសខាងសីលធម៌ ក្នុងការធ្វើអ្វីដែលយើងចង់ធ្វើ នៅពេលណាក៏បាននោះទេ ។ ផ្ទុយទៅវិញ ស្របតាមផែនការរបស់ព្រះវរបិតា យើងបានទទួលសិទ្ធិជ្រើសរើសខាងសីលធម៌ ដើម្បីស្វែងរក ហើយធ្វើសកម្មភាពដែលស្របតាមសេចក្ដីពិតដ៏អស់កល្បជានិច្ច ។ …
ប្រធាន ដាល្លិន អេក អូក បានសង្កត់ធ្ងន់ថា ដំណឹងល្អរបស់ព្រះយេស៊ូវគ្រីស្ទអញ្ជើញយើងទាំងដើម្បី ដឹង អ្វីមួយ និងដើម្បី ក្លាយជា អ្វីមួយតាមរយៈការអនុវត្តដោយសុចរិតនៃសិទ្ធិជ្រើសរើសខាងសីលធម៌ ។ …
[ ប៉ុន្តែ ]កិច្ចការ និងបំណងប្រាថ្នារបស់យើងតែម្យ៉ាងមិនអាចជួយសង្គ្រោះយើងបានឡើយ ។ « បន្ទាប់ពីអ្វីៗទាំងអស់ដែលយើងអាចធ្វើបាន » យើងបានផ្សះផ្សាជាមួយនឹងព្រះ តាមរយៈសេចក្តីមេត្តាករុណា និងព្រះគុណដែលមានតែតាមរយៈពលិកម្មដ៏ធួន និងអស់កល្បជានិច្ចរបស់ព្រះអង្គសង្រ្គោះ ។ …
ពួកយើងជាច្រើនអាចរំពឹងថា ការបង្ហាញខ្លួនរបស់យើងនៅខាងមុខវេទិកាជំនុំជម្រះនៃចៅក្រមដ៏អស់កល្បជានិច្ច គឺដូចគ្នាទៅនឹងដំណើរការកាត់ក្តីខាងលោកិយផងដែរ ។ ចៅក្រមនឹងធ្វើជាប្រធាន ។ ភស្តុតាងនឹងត្រូវបានបង្ហាញ ។ សាលក្រមនឹងត្រូវបានដាក់បង្ហាញ ។ ហើយយើងទំនងជានឹងមិនប្រាកដប្រជា និងភ័យខ្លាចរហូតទាល់តែយើងដឹងពីលទ្ធផលចុងក្រោយ ។ ប៉ុន្តែខ្ញុំជឿថានោះមិនមែនជាដំណើរការត្រឹមត្រូវឡើយ ។ …
សេចក្តីកោតខ្លាចដល់ព្រះអម្ចាស់ពុំមែនជាការយល់ដឹងដ៏មិនច្បាស់លាស់អំពីការចូលទៅក្នុងទីវត្តមានរបស់ទ្រង់ដើម្បីទទួលបានការកាត់សេចក្តីឡើយ ។ ផ្ទុយទៅវិញ វាគឺជាការរំពឹងទុកនៃការទទួលស្គាល់ខ្លួនយើង « តាមដែលមាននៅពេលនេះ » ហើយ « អំពីរឿងទាំងឡាយ តាមដែលនឹងមាននៅពេលខាងមុខ » ។ …
ហើយនៅទីបំផុត យើងគឺជាចៅក្រមជំនុំជម្រះខ្លួនយើងផ្ទាល់ ។ មិនចាំបាច់មាននរណាម្នាក់មកប្រាប់យើងកន្លែងដែលយើងត្រូវទៅនោះទេ ។ នៅក្នុងទីវត្តមានរបស់ព្រះអម្ចាស់ យើងនឹងទទួលស្គាល់នូវអ្វីដែលយើងបានជ្រើសរើសដើម្បីប្រែក្លាយនៅក្នុងជីវិតរមែងស្លាប់ និងដឹងខ្លួនថា ត្រង់ណាដែលយើងគួរស្ថិតនៅក្នុងភាពអស់កល្បជានិច្ច ។