សេចក្តីស្រឡាញ់ដ៏ធួនរបស់ព្រះគ្រីស្ទ

សេចក្តីដកស្រង់

ដោយអែលឌើរ នែល អិល អាន់ឌើរសិន

ក្នុងកូរ៉ុមនៃពួកសាវកដប់ពីរនាក់

ប្រសិនបើបងប្អូនបានប្រព្រឹត្តអំពើបាបធ្ងន់ធ្ងរ ហើយកំពុងស្ថិតក្នុងដំណើរការប្រែចិត្ត ឬមានបំណងចង់ប្រែចិត្តពេញលេញ និងទទួលបាននូវអំណរនៃការអត់ទោសហួសពីពាក្យដែលអាចថ្លែងបាន សូមដឹងថា អព្ភូតហេតុនេះកំពុងរង់ចាំបងប្អូន ។ …

ការងាកចេញពីអំពើបាប ការងាកទៅរកព្រះ និងការពង្រឹងសេចក្តីជំនឿរបស់បងប្អូននៅលើព្រះយេស៊ូវគ្រីស្ទ គឺជាការចាប់ផ្ដើមដ៏ស្រស់ស្អាត ។ ការមានឆន្ទៈធ្វើតាមព្រះដោយរាបសា រួមមានការសារភាពពីអំពើបាបធ្ងន់ធ្ងររបស់បងប្អូនទៅកាន់ប៊ីស្សព ឬប្រធានសាខា ប៉ុន្តែការអត់ទោសរបស់បងប្អូនទាំងស្រុងនឹងបានមកពីព្រះអង្គសង្រ្គោះ ។ …

បំណងប្រាថ្នាដើម្បីត្រឡប់ទៅរកព្រះយ៉ាងពិតប្រាកដអមដោយការប្តេជ្ញាចិត្ត គឺដើម្បីមានភាពទៀងត្រង់ទាំងស្រុងជាមួយព្រះវរបិតាសួគ៌ ជាមួយខ្លួនឯង ជាមួយអស់អ្នកដែលរងការឈឺចាប់ និងជាមួយអ្នកដឹកនាំបព្វជិតភាពរបស់បងប្អូន ។ …

បំណងប្រាថ្នាចង់បានរបស់បងប្អូននាំឲ្យបងប្អូនចង់ជួសជុលនូវការខូចខាតទាំងអស់ដែលបងប្អូនបានធ្វើ ។ ប៉ុន្តែរឿងមួយចំនួនមិនស្ថិតក្រោមអំណាចរបស់បងប្អូនដើម្បីជួសជុលនោះទេ បងប្អូនអធិស្ឋានដោយក្លៀវក្លាទូលសូមឲ្យព្រះអម្ចាស់តាមរយៈព្រះគុណទ្រង់នឹងជួយព្យាបាលអស់អ្នកដែលបានរងការឈឺចាប់ដោយសារទង្វើរបស់បងប្អូន ។ …

នៅពេលបងប្អូនស្វែងរកការអត់ទោសរបស់ព្រះអម្ចាស់ ចូរមានចិត្តអត់ធ្មត់នៅពេលបងប្អូនរង់ចាំការអនុម័តពេញលេញរបស់ទ្រង់ ។ …

សម្រាប់បងប្អូនដែលបានរងរបួសដោយអយុត្តិធម៌ដោយអំពើបាបដ៏ធ្ងន់ធ្ងររបស់ដទៃ ខ្ញុំចង់ចែកចាយសេចក្ដីស្រឡាញ់ និងសេចក្ដីអាណិតអាសូររបស់ព្រះអង្គសង្គ្រោះ ការលួងលោម និងសេចក្តីសុខសាន្តរបស់ទ្រង់ ។

… ខ្ញុំសូមថ្លែងជាសាក្សីដល់បងប្អូនថា ព្រះអង្គសង្គ្រោះស្គាល់ ហើយស្រឡាញ់បងប្អូន ។ សូមឈោងទៅរកទ្រង់ ។ ទ្រង់គឺជាអង្គលួងលោម និងជាកម្លាំងបងប្អូន ទ្រង់នឹងបញ្ជូនពួកទេវតារបស់ទ្រង់មកលើកទ្របងប្អូនឡើង ។