Mga Propeta sa Dios

Ang Ginoo mipamatuod ngadto sa babaye sa Sunam nga si Eliseo usa ka propeta sa Dios, ug siya milihok pinaagi sa pagpadayon kaniya sa iyang balay.

Kita usab makadawat og personal nga pagpamatuod sa propeta sa Dios karon ug ablihan ang atong mga kasingkasing ug mga hunahuna—ang atong panimalay—sa mensahe nga ang atong Langitnong Amahan aduna alang nato niining kataposang mga adlaw. …

Unsa ang usa ka propeta? Ang propeta usa ka tawo kinsa gitawag sa Dios aron mamulong alang Kaniya. …

Ang mga propeta mga manalagna ug mga tigpadayag. Nagpasabot kana nga sila makakita sa unsay dili makita sa uban, ug sila makapanagna sa umaabot nga mga panghitabo. … Ang mga propeta nagdawat og mga sugo ug mga pagpadayag gikan sa Ginoo. …

Ang mga propeta usab mosangyaw sa ebanghelyo ug dinasig nga mga magtutudlo ug mga mensahero sa Dios ngadto sa tanang tawo sa yuta. …

Ang mga propeta nagpamatuod kang Kristo—sa Iyang pagkaanaa, sa Iyang pangalagad, ug sa Iyang pagkabalaan. …

Ang babaye sa Sunam nagtudlo kanato nga makaangkon kita niana nga pagpamatuod pinaagi sa Espiritu Santo. Ako mosaad kaninyo nga sa higayon nga kita mahibalo nga sila mga dinihogan sa Dios, ang atong kinabuhi mas masayon bisan sa atong nagpadayon nga mga hagit, samtang magtuman kita sa ilang mga tingog uban sa pagsalig, hugot nga pagtuo, ug paglaom. Ang pagpaminaw ug pagtuman sa tingog sa propeta mahinungdanon sa paghupot sa matag maayo nga butang hangtod sa Ikaduhang Pag-anhi sa atong Manluluwas. …

Ako mapasalamaton alang sa paggiya ug sa gipahinungod nga mga paningkamot sa buhing mga propeta. … Sa kanunay ang Ginoo maoy mopili sa Iyang mga sulugoon.