Sabado sa Hapon nga Sesyon
Walay Maglingkod nga Mag-inusara
Mga Kinutlo
South Africa
Estonia
Diha sa sambingay sa maayong Samaryanhon, si Jesus nagdapit kanato sa pagduol sa usag usa ug ngadto Kaniya diha sa Iyang balay abotanan—Iyang Simbahan. …
Ang diwa sa “luna sa balay nga abotanan” naglakip sa “walay maglingkod nga mag-inusara.” Kon kamo moadto sa simbahan, kon makakita kamo og usa ka tawo nga nag-inusara, mahimo bang abiabihon ug tuparan ninyo siya? …
Ang “walay maglingkod nga mag-inusara” nagpasabot usab nga walay tawo nga maglingkod nga mag-inusara sa emosyonal o espirituwal nga paagi. Kausa miuban ko sa usa ka masulub-on nga amahan sa pagbisita sa iyang anak nga lalaki. Mga tuig na ang milabay, ang anak nga lalaki mahinamon nga mahimong usa ka bag-ong deacon. Alang sa okasyon, ang iyang pamilya mipalit kaniya sa iyang unang pares sa bag-ong sapatos.
Apan sa simbahan, ang mga deacon mikatawa kaniya ug sa iyang sapatos. Ang iyang sapatos bag-o, apan dili uso. Naulaw ug nasakitan, ang batan-ong deacon miingon nga dili na gayod siya moadto pag-usab sa simbahan. Ang akong kasingkasing nagsubo gihapon kaayo alang kaniya ug sa iyang pamilya. …
Sa Iyang gipahiuli nga Simbahan, kitang tanan mas maayo kon walay maglingkod nga mag-inusara. Dili lang kita yanong mopahiluna o motugot. Kita tinud-anay nga moabiabi, modawat, mangalagad, mohigugma. …
Karon daghan ang mibati nga nag-inusara ug nahibulag. …
Adunay daghang rason nga tingali kita mobati nga kita dili mohaom sa simbahan—nga, sa pasumbingay nga pagkaistorya, kita naglingkod nga nag-inusara. …
Ang Mosiah 18:21 nagdapit kanato sa paghiusa sa atong mga kasingkasing diha sa gugma. Ako modapit kanato nga dili kaayo mabalaka, dili kaayo mohukom, dili kaayo magdahom og dako sa uban—ug, kon gikinahanglan, mahimong dili kaayo mohukom sa atong kaugalingon. …
Ang pagkahisakop sa pakigsaad mapalawoman samtang kita moduol sa usag usa ug ngadto sa Ginoo diha sa Iyang balay abotanan. Ang Ginoo mopanalangin kanatong tanan kon walay maglingkod nga mag-inusara.