Hiusaha ang Inyong Kasingkasing Ngadto ni Jesukristo: Ang Sagradong Gasa sa Musika sa Primary

Nakakaplag ko og kamaya sa pakigkonektar sa isig ka Santos pinaagi sa gipakigbahin nga pinulongan sa sagrado nga musika. Ug labi na gayod pinaagi sa yano nga mga awit sa Primary, ang Balaang Espiritu mipagtigbabaw sa mga babag sa pinulongan ug mipuno sa akong kasingkasing sa Iyang paghunghong. …

Ang musika sa Primary usa sa malumong mga himan sa Dios aron sa pagtanom og mga liso sa pagpamatuod diha sa mga kasingkasing sa labing bata nga mga disipulo sa Manluluwas. …

… Ang musika sa kanunay nahimo na nga labing importanteng bahin sa pagtudlo sa mga bata sa ebanghelyo. Ang mga awit sa Primary mahimong una nga espirituhanong pinulongan sa bata tungod kay ang ilang yano, halandomon nga mga melodiya naghatag og tingog sa mga kamatuoran sa ebanghelyo. …

Ang mga awit sa Primary mahimo usab nga gamhanang mga himan sa pagtudlo sa doktrina. Ang pipila sa awit naghisgot sa mga istorya sa kinabuhi ug sa pagpangalagad sa Manluluwas. Ang uban nagtudlo sa Iyang mga kinaiya, sama sa Iyang pagtuo, Iyang paglaom, ug Iyang gugmang putli. Ug ang labing sagrado nga mga awit nagpamatuod sa Iyang walay kinutoban nga Pag-ula ug sa gugma nga midagayday gikan niana nga buhat sa kaluwasan. …

… Ang usa ka awit nga nakat-onan sa nag-edad og sayis adunay gahom nga magpabilin diha kanato—ug mahimong mobalik sa mosunod nga dekada sa mga higayon sa pagdesisyon, tentasyon, kasubo, o kamaya. …

… Ang Espiritu makagamit sa musika aron matatak ang walay kataposang mga kamatuoran diha sa ilang malumong mga kasingkasing. Ug pag-abot sa panahon, ang mga bata makapili nga ihiusa ug idangop ang ilang mga kasingkasing ug ilang kinabuhi ngadto ni Jesukristo pinaagi sa paghimo ug pagtuman sa sagrado nga mga pakigsaad ngadto Kaniya. …

Minahal nga mga higala, ako mopamatuod nga ang mga awit sa Primary nagtudlo og mahangtorong mga kamatuoran ug doktrina nga mogiya nato ngadto ni Jesukristo ug sa Iyang ebanghelyo.