Ang Nakasentro sa Pamilya nga Ebanghelyo ni Jesukristo

Ang doktrina sa Ang Simbahan ni Jesukristo sa mga Santos sa Ulahing mga Adlaw nakasentro sa pamilya. …

Bisan pa og anaa kanang doktrinal nga konteksto, adunay oposisyon. …

Ang nasudnon nga pag-us-os sa kaminyoon ug pagpanganak masabtan ra sa makasaysayanon nga mga rason, apan ang mga mithi sa mga Santos sa Ulahing adlaw ug ang mga buhat kinahanglan nga molambo—dili mosunod—sa mga uso. …

Samtang nagkaubos ang impluwensiya sa pagkaginikanan, ang mga Santos sa Ulahing mga Adlaw sa gihapon adunay hinatag sa Dios nga responsibilidad sa pagtudlo sa ilang mga anak sa pag-andam sa atong pamilya sa destinasyon sa kahangtoran (tan-awa sa Doktrina ug mga Pakigsaad 68:25). …

Ang atong Manluluwas, nga si Jesukristo, mao ang atong labing maayo nga modelo. … Ang pagsunod kang Kristo ug pagtugyan sa atong kaugalingon sa pagserbisyo sa usag usa maoy labing maayo nga sulbad sa kahakog ug sa pag-inusara nga karon ingon og komon na kaayo.

Ang mga ginikanan usab adunay katungdanan sa pagtudlo sa ilang mga anak sa praktikal nga kahibalo gawas sa mga baroganan sa ebanghelyo. …

… Molambo ang pamilya kon magkat-on sila isip usa ka grupo ug magtinambagay sa tanang butang mahitungod sa pamilya ug sa mga sakop niini. …

Talagsaong mga panalangin moabot sa mga pamilya kon dungan sila nga mag-ampo, mangluhod sa gabii ug sa buntag sa pagpasalamat sa mga panalangin ug i-ampo ang komon nga mga problema. Ang mga pamilya mapanalanginan usab kon dungan sila nga mosimba sa mga tulumanon sa Simbahan ug sa ubang pang-debosyon nga mga kahimtang. Ang mga relasyon sa pamilya malig-on usab pinaagi sa mga istorya sa pamilya, paghimo og mga tradisyon sa pamilya, ug pagpakigbahin og sagradong mga kasinatian. …

Ako mopamatuod bahin ni Ginoong Jesukristo, nga mao ang Bugtong Anak sa Dios, atong Mahangtoron nga Amahan. Siya nagdapit kanato sa pagsunod sa dalan sa pakigsaad nga mosangpot ngadto sa panagtigom sa langitnong pamilya.