Pagbaton og Hiyas sa Pagpugong sa Kaugalingon

Ang Ginoo mipahayag: …

“Ug walay bisan usa nga makatabang niini nga buhat gawas kon siya magpaubos ug puno sa gugma, adunay hugot nga pagtuo, paglaom, ug gugma nga putli, kasarangan sa tanan nga mga butang, bisan unsa ang itugyan ngadto sa iyang pag-amuma.”

Ang giya sa Manluluwas, nga nakarekord niining sagrado nga pagpadayag, nagpahinumdom nato nga ang pagpugong sa kaugalingon mahinungdanon nga pagpalig-on alang sa usa ka lig-on nga pundasyon diha ni Jesukristo. …

Sa mga kinaiya nga nagbaton sa tinuod nga mga disipulo ni Kristo, ang pagpugong sa kaugalingon mabantayan dayon isip usa ka paghulagway sa Manluluwas sa Iyang Kaugalingon, usa ka bililhong bunga sa Espiritu, nga mahimong madawat sa tanan kinsa bukas ngadto sa balaanong impluwensya. …

Ang mga disipulo ni Kristo kinsa naningkamot sa pag-ugmad niining Kristohanong kinaiya molambo sa kamapainubsanon ug mapuno sa gugma. …

… Ang ebanghelyo ni Jesukristo nagdapit nato sa paggamit niini nga hiyas ilabi na sa mga panahon sa hagit, kay niini gayod nga mga sitwasyon nga ang tinuod nga kinaiya sa usa ka indibidwal mabutyag. …

Ang pangalagad sa Manluluwas dinhi sa yuta naglangkob og hiyas sa pagpugong sa kaugalingon sa tanang aspeto sa Iyang kinaiya. …

Si Jesukristo, ang labing halangdon sa tanan, nag-antos alang nato hangtod nga miagas ang Iyang dugo sa matag lungag sa panit, apan wala gayod Niya tugoti nga ang kasuko magdilaab sa Iyang kasingkasing, ni ang agresibo, makapasilo, o mapasipad-on nga mga pulong Iyang malitok, bisan taliwala sa ingon niana nga kasakit. …

… Kon kita maningkamot uban sa pagtuo ug kakugi nga apilan og pagpugong sa kaugalingon sa atong mga buhat ug mga pulong, ako mopamatuod nga atong mapalig-on ug maangkla ang atong kinabuhi sa mas segurado nga paagi diha sa tinuod nga pundasyon sa atong Manunubos.