Ang Pamahayag Mahitungod sa Pamilya—Mga Pulong gikan sa Dios

Ganahan ko sa pamahayag mahitungod sa pamilya. … Ang pamahayag adunay balaanon nga tinubdan, mao nga atoa kining hatagan og balaanong pagtahod nga angay sa mga pulong nga gikan sa Dios. …

Sa dihang gipresentar kini, ang pamahayag wala mahiuyon sa mga panglantaw sa kalibotan. Wala kaniadto. Dili karon. Adunay uban nga nangita og sayop sa pamahayag mahitungod sa pamilya, kaminyoon, ug sekso. Ang uban misugyot nga bakwion sa Simbahan, usbon, o gani ibaliwala ang pamahayag.

Kini nga pamahayag mahitungod sa pamilya, sama sa gipahayag ni Presidente Hinckley, doktrina, akong mga kaigsoonan. Ang mga baroganan wala molapas apan hingpit nga nagsubay sa mga pamaagi sa Ginoo ug sa Iyang dalan sa pakigsaad. Ang mga pagtulun-an diha sa pamahayag gipadayag ni Ginoong Jesukristo ngadto sa Iyang Apostoles kaniadto ug karon. …

Kadtong dunay mga kabalaka, hibaloi nga mga anak kamo sa langitnong mga ginikanan, kabahin kamo sa pamilya sa inyong Langitnong Amahan. Walay lain nga mas nakaila kaninyo o mas lawom nga nagmahal kaninyo kay Kaniya. Duol Kaniya, ibubo ang inyong kasingkasing ngadto Kaniya; salig Kaniya ug sa Iyang mga saad. …

Makita nato sa pamahayag sa pamilya:

“Ang mga amahan ug mga inahan adunay katungdanan sa pagtabang sa usag usa ingon nga magkauban.”

Ang patas usa ka pulong nga mahinungdanon. …

Kon magpakabuhi kita nga ang atong mga mata nakatutok sa himaya sa Dios, magatahod kita sa usag usa ug magasuporta sa usag-usa. …

Ang atong Amahan sa Langit naghatag kanato sa pamahayag mahitungod sa pamilya aron makatabang kanato nga magiyahan pabalik ngadto Kaniya, makatabang nato nga makakat-on ug mapuno sa gugma, kalig-on, katuyoan, ug mahangtorong pagsabot.