Digital Lamang: Dali, Sunod Kanako
Naghunahuna Ka Ba Kon Kinahanglan Ka Ba nga Mokuha Sa Imong Patriyarkal Nga Panalangin?
Kon dili ka segurado kon ang pagdawat og patriyarkal nga panalangin para imo ba gayod, padayon lang og basa.
Kon nagbasa ka niini, adunay dako nga tsansa nga naghunahuna ka na sa patriyarkal nga mga panalangin bag-ohay lang.
Ang pagdawat sa imong patriyarkal nga panalangin--diin ang pipila sa mga propeta mitandi ngadto sa "personal nga kasulatan alang kanimo" o gani usa ka "personal nga Liahona"--usa ka makapahinam nga oportunidad nga makabati sa lawom, personal nga gugma sa Langitnong Amahan alang kanimo.
Apan unsa kaha kon makuyawan ka bahin niini? Unsa kaha kon daghan ka og mga pangutana? Unsa kaha kon nabalaka ka kon unsay isuti diha sa imong patriyarkal nga panalangin--o dili isulti?
Kon mibati ka sa ingon, wala ka mag-inusara. Apan adunay mga tubag sa imong mga pangutana. Padayon sa pagbasa alang sa pipila lang niini.
Unsaon Nako Pagkahibalo Kon Andam Na Ba Ko?
Walay piho nga edad kon kanus-a ka "kinahanglan" nga modawat sa imong patriyarkal nga panalangin. Motabang kini kanimo bisan pa man og kanus-a nimo kini dawaton! Sa pag-ingon niana, ang maayo nga panahon nga modawat sa imong panalangin mao nga kon ikaw "igo ang kabatan-on nga daghan pang importante nga mga desisyon sa kinabuhi ang umaabot pa," nga maayo ang pagkahulagway sa panahon nga ikaw anaa karon.
Sa kataposan, kanus-a ka modawat sa imong patriyarkal nga panalangin tali na kini kanimo ug sa Langitnong Amahan. Usa ka maayong timaan sa pagkaandam mao nga kon ikaw aduna nay tinguha nga modawat sa imong patriyarkal nga panalangin ug nakasabot kon unsa kini—apan dili kinahanglan nga mahibalo ka sa tanan! Makaampo ka alang sa kompirmasyon ug pagpakigsulti sa imong bishop o presidente sa branch bahin sa imong mga pangutana.
Human sa leksiyon sa Young Women bahin sa patriyarkal nga mga panalangin, diha koy pagbati nga kinahanglan kong modawat sa akoa aron mahibalo sa giya nga gitagana sa Langitnong Amahan para nako. Nag-ampo ko og maayo ug nagtuon sulod sa daghang bulan.
Dayon, usa ka adlaw sa Sunday School, ang akong magtutudlo miingon kanako, "Kon naghunahuna ka bahin sa imong patriyarkal nga panalangin, tingali panahon na nimo nga mokuha niini." Kana nakadasig nako sa pagpadayon, ug mapasalamaton kaayo ko nga gibuhat gyod nako. Tungod sa akong patriyarkal nga panalangin, nasayod ko nga ang Langitnong Amahan nahibalo kon si kinsa ako.
Acadia L., edad 16, Baden-Württemberg, Germany
Gikinahanglan Ba Gayod Nako ang Patriyarkal nga Panalangin?
Wala kita gimandoan nga modawat og patriyarkal nga panalangin, apan walay duhaduha maayo gayod kini nga ideya! Ang imong panalangin mahimong usa ka tinubdan sa kalig-on, kahupayan, ug pagpadayag ug usa ka bililhon nga kapanguhaan kon maghimo ka og dagko nga mga desisyon o nagsagubang og malisod nga panahon.
Pananglitan, si Elder Randall K. Bennett sa Seventy miingon nga ang pagdawat sa iyang patriyarkal nga panalangin nakatabang kaniya nga masabtan ang iyang "tinuod nga mahangtoron nga pagkatawo--kon si kinsa gayod [siya] ug si kinsa [siya] mamahimo." Nakapalambo kini sa iyang pagtuo sa Langitnong Amahan ug ni Jesukristo, nga nakatabang kaniya nga magpabiling lig-on sa dihang nagdiborsyo ang iyang mga ginikanan.
Kon dili ka pa gihapon segurado kon nagkinahanglan o gusto ka og patriyarkal nga panalangin, pangutan-a ang imong mga ginikanan, mga igsoon, ubang sakop sa pamilya, o mga lider sa Simbahan kon giunsa sa ilang panalangin pagtabang kanila.
Sa dihang una nakong nadawat ang akong patriyarkal nga panalangin, nakakat-on ko og daghan bahin sa akong kaugalingon. Ganahan ko mobalik-balik og basa niini labing minos kausa sa usa ka semana, ug matag higayon nga buhaton ko kini, makakat-on ko og bag-ong butang. Nakatabang kini nako nga tan-awon sa kinatibuk-ang kahulogan ang akong kinabuhi pinaagi sa usa ka espirituhanong lente ug makita kon giunsa sa Ginoo pagtabang ug paggiya kanako sa matag aspeto sa akong kinabuhi.
Dmitri P., edad 17, Minnesota, USA
Unsaon Kaha Kon Ang Akong Panalangin Dili Mao ang Akong Gidahom o Gilaoman?
Kon nabalaka ka nga ang imong patriyarkal nga panalangin dili makatubag sa tanan nimong mga paglaom, mga damgo, ug mga pangutana bahin sa umaabot--o motubag kini sa paagi nga dili nimo ganahan--hinumdomi nga panalangin kini, dili detalyado nga panagna. Dili kini mosulti nimo sa tanan nga mahitabo sa imong kinabuhi (o sa eksakto gyod kon unsaon pagkahitabo niini), apan kini mosulti nimo unsa nga mga panalangin ang imong madawat pinaagi sa pagsunod sa giya sa Langitnong Amahan.
Labaw sa tanan, ang imong patriyarkal nga panalangin usa ka mensahe sa gugma sa Dios alang nimo. Gusto sa Langitnong Amahan nga molampos ka ug mopauli ngadto Kaniya. Ang imong patriyarkal nga panalangin usa lang sa daghang kapanguhaan nga Iyang gihatag nimo aron tabangan ka sa imong panaw.
Maglisod ko sa una sa pag-ila og pagpadayag, apan pinaagi sa akong patriyarkal nga panalangin, ang Langitnong Amahan mipadayag ngari nako sa Iyang gisaad nga mga panalangin ug sa Iyang gugma alang nako. Nakapalig-on kini nako ug nakatabang nako sa pagtutok sa mga butang nga labing importante. Mitubo ang akong pagtuo ug nagkalawom ang akong gugma alang sa Manluluwas ug sa Langitnong Amahan.
Bree-Ell R., edad 16, Auckland, New Zealand