Motan-aw ngadto sa Dios ug Mabuhi

Siyempre, ang tambag nga “motan-aw ngadto sa Dios ug mabuhi” dili lamang dunay kahulogan ngari kanato sa kahangtoran apan makahimo usab sa tanang kalainan sa kinaiya ug kalidad sa atong mortal nga kinabuhi. …

Walay saad nga mas kanunay gibalikbalik diha sa kasulatan sa Basahon ni Mormon kay sa niini: “Kon tumanon ninyo ang akong mga sugo kamo mouswag sa yuta: apan kon dili ninyo tumanon ang akong mga sugo kamo ipahimulag gikan sa akong atubangan.” … Ang “pag-uswag” nagpasabot sa pagtagamtam sa giya ug mga panalangin sa langit diha sa ilang kinabuhi. … Ang “pag-uswag” naglakip sa kapasidad sa pagbarog batok sa kalisdanan ug pagsulay. …

… Ang mga sugo sa Dios ug tambag makita diha sa mga kasulatan ug sa mga pulong sa Iyang mga sulugoon. Ang mga baroganan ug mga mithi nga gipahimutang diha sa “Ang Pamilya: Usa ka Pamahayag ngadto sa Kalibotan” maoy una nga sanglitanan. Ang lain mao ang giya nga makita diha sa booklet nga Alang sa Kalig-on sa mga Kabatan-onan. …

Ingon og walay utlanan ang tinguha sa mga tawo sa pagpangita og lainlaing kapanguhaan alang sa kahulogan, kalipay, ug tabang. Kadaghanan “nagtan-aw lapas sa tumong.” … Sa pagpangita sa Dios, makakaplag kita og kalinaw diha sa kalisdanan ug ang atong pagtuo makapadayon sa pagtubo bisan sa mga panahon sa pagduhaduha ug espirituhanong hagit. Makadawat kita og kalig-on bisan anaa ang oposisyon ug pagkahilayo. Atong mapahiuyon ang unsay labing angay sa karon nga panahon. …

Ang pagtan-aw ngadto sa Dios nagpasabot nga dili kay Siya basta lang usa sa atong mga prayoridad; nagpasabot kini, hinuon, nga Siya ang labing taas nga prayoridad.