Dominggo sa Hapon nga Sesyon
Sa Ilang Kaugalingon Sila ang mga Tighukom
Mga Kinutlo
USA
Usa ka nag-unang katuyoan sa Paglalang ug sa atong mortal nga kinabuhi mao ang paghatag kanato sa kahigayonan nga molihok ug mahimong unsa ang gidapit sa Ginoo nga kita mamahimo. …
… Wala kita napanalanginan og moral nga kabubut-on sa pagbuhat sa bisan unsay atong gusto bisan kanus-a nato gusto. Hinuon, sumala sa plano sa Amahan, kita nakadawat og moral nga kabubut-on sa pagpangita ug paglihok sumala sa mahangtorong kamatuoran. …
Si Presidente Dallin H. Oaks mihatag og gibug-aton nga ang ebanghelyo ni Jesukristo nagdapit kanato nga mahibalo og usa ka butang ug mahimong usa ka tawo nga adunay nalampos pinaagi sa matarong nga paggamit sa moral nga kabubut-on. …
[Ug gani] ang atong mga buhat ug mga tinguha lamang dili moluwas ug dili makaluwas kanato. “Human sa tanan nga atong mabuhat,” kita mapasig-uli ngadto sa Dios pinaagi lamang sa kaluoy ug grasya nga anaa pinaagi sa walay kinutoban ug walay kataposan nga maulaong sakripisyo sa Manluluwas. …
Daghan kanato mahimong magdahom nga ang atong pagpakita sa atubangan sa hukmanan sa Mahangtoron nga Maghuhukom mahimong susama sa paghusay diha sa usa ka kalibotanon nga korte sa balaod. Usa ka maghuhukom ang mangulo. Ang ebidensiya ipakita. Usa ka hukom ang ipakanaog. Ug lagmit dili kita sigurado ug magmahadlokon hangtod mahibal-an nato ang kataposan nga sangpotanan. Apan ako nagtuo nga ang ingon nga paghulagway dili tukma. …
Ang kahadlok diha sa Ginoo dili mao ang maduhaduhaon nga kakulba mahitungod sa pag-atubang diha sa Iyang presensiya aron pagahukman. Hinuon, kini mao ang paglaom sa kataposan nga pag-ila mahitungod sa atong mga kaugalingon sa “mga butang ingon nga sila gayod mao” ug “ingon nga sila gayod mahimo.” …
Sa kataposan, kita mao ang mohukom sa atong kaugalingon. Walay usa ang kinahanglang mosulti kon asa kita moadto. Sa presensiya sa Ginoo, atong angkonon kon unsay atong gipili nga mamahimo sa mortalidad ug kita mismo masayod kon asa kita angay mahisakop sa kahangtoran.