E mafai faapefea ona ou iloa ua ou salamo moni ma ua faamagaloina a’u?

Toe Taunuu i le Mea na Amata Ai, saunia e Jenedy Paige

Na fetalai mai le Alii: “Faauta, o ia o lē ua salamo i ana agasala, o ia lava lea ua faamagaloina o ia, ma o A’u, o le Alii, e lē toe manatuaina lava.

“O le mea lenei e mafai ai ona outou iloa pe afai ua salamo se tagata i ana agasala—faauta, o le a ia ta’uta’u atu ma lafoai i ai” (Mataupu Faavae ma Feagaiga 58:42–43).

E ala i le salamo faamaoni, e mafai ai ona tatou maua le faamagaloga. “Pe a e lagonaina le mafanafana mai le Agaga, e mafai ona e iloa o loo galue le mana togiola o le Faaola i lou olaga.” Ma afai tatou te toe se’e, e mafai ona tatou toe salamo, faamagaloina, ma taumafai pea.

E le gata i lea, na aoao mai Elder Dieter F. Uchtdorf o le Korama a Aposetolo e Toasefululua: “O le a taumafai Satani ia tatou talitonu e le faamagaloina a tatou agasala aua e mafai ona tatou manatuaina. O Satani e pepelo. … E lei folafola mai le Atua faapea, o le a tatou le manatuaina a tatou agasala. O le manatuaina o le a fesoasoani ia i tatou e aloese mai ai i le toe faia o mea sese lava na. Peitai, afai tatou te tumau i le moni ma le faamaoni, o le a oo ina manifinifi le manatua o a tatou agasala.”