Na’o Tusiga Faaeletonika: Leo o le Autalavou
Na Faaolaina A’u e Keriso Ina Ua Ou Malemo
Ua pe a ma le lima tausaga talu ona avea au ma se tagata aau faatautava. I se tasi vaitau, na ma iloa ai ma lo’u faiaoga ua lava lo’u alualu i luma e aau ai i le au (pito i lelei) matutua. Ae sa ou iloa o taimi o toleniga a le au e feteenai ma le seminare i le tagata lava ia, o se tasi o nofoaga ou te fiafia e amata ai o’u taeao ma o se auala autu na ou latalata atili atu ai ia Keriso.
Sa ou matua tauivi lava ma lenei filifiliga. A o ou tatalo e uiga i ai, sa ou lagonaina le uunaiga o le auai i le au a le o se mea e finagalo le Atua ou te faia. Sa ou faia se oso o le faatuatua ma saunia a’u lava e amata uma le aau mo le au matutua ma le seminare i luga o le initoneti.
Magoto Atu i le Pogisa
O le ala i luga mo le seminare i le taeao po sa seasea faigata ia te au. E ui ina sa ou lelava, ae sa ou iloaina sa ou agai atu i se nofoaga o le filemu ma le aoaoina. Ae o le ala a’e pe tusa o le 4:45 mo le aau sa faaesea ma pogisa. Ma o toleniga sa sili atu ona faigata nai lo se isi lava mea na ou oo i ai.
O le taimi lea, sa ou manatuaina ai se lauga a Peresitene Russell M. Nelson. O se upusii mai le lauga na tu matilatila mai ia te a’u:
“Pe a e aapa atu i luga mo le mana o le Alii i lou olaga i le malosi atoa e tutusa ma se tagata o loo malemo ma tau’ā’ā pea mo le ea, o le mana mai ia Iesu Keriso o le a avea ma ou mana. A silafia e le Faaola e te fia manao moni lava e aapa atu ia te Ia—pe a mafai ona Ia lagonaina le manao silisili o lou loto o le fia mauaina o Lona mana i lou olaga—o le a taitaia oe e le Agaga Paia ia iloa tonu le mea e tatau ona e faia.
“ A e aapa atu faaleagaga e sili atu i lo se isi lava mea na e faia muamua, o le a tafe mai Lona mana ia te oe. ”
A o ou mafaufau i lenei upusii, sa oo ina ou malamalama i se tulaga loloto atu le lagona e pei o loo malemo. I le tasi itu, o nisi taimi ou te lagona ai e pei ua ou malemo moni lava. Sa tuleia lo’u tino i lona maualuga i totonu o le vai, ma sa masani ona ou tau manavanava moni mo le ea. Sa ou lagona foi e pei o loo ou malemo i le pogisa ma le tuulafoaiina. Sa ou matuai manaomia lava le ea ma le faasaoina.
Aapa atu mo Keriso
Ina ia faaali atu i le Tama Faalelagi ma le Faaola ou te manao e aapa atu ia i Laua, sa ou taulai atu i le faatinoina. Sa ou auai i le malumalu, suesue i tusitusiga paia i aso uma, auai i le seminare i luga o le initoneti, ma tatalo mo se fesoasoani ma se uiga faaalia lelei.
A o ou toe tepa i tua i lenei taimi faigata tele, e mafai ona ou molimau atu “Sa tafe mai [lava] Lona mana ia te au!” Na faamalosia ma faagafatiaina a’u e Iesu Keriso. O nisi taimi sa faigata ai ona vaai i lena lava taimi, ae a ou toe tepa i tua ma tatalo ia iloa pe na faapefea ona ou tuputupu ae, ou te vaaia le aao o le Faaola i lo’u olaga. Ou te iloa o loo soifua o Ia ma alofa ia te au! Ona o Ia, e mafai ai mea uma pe a tatou talitonu.
Sara R., 16 tausaga, Texas, ISA
E fiafia e pese, faasalalau, aau, ma suesue i tusitusiga paia.