Tilotilo mai ia te A’u!

I se tasi taimi sa ou fai atu ai i se potuaoga o tamaiti aoga, “Tilotilo mai ia te a’u!” Sa ou matauina ina ua ou fai atu lenei tala, sa latou tilotilo uma i o’u mata. Latou te lei vaai i o’u seevae, suti, po o le fusiua. Latou te lei vaai i lo’u lauulu po o o’u lima. Sa latou tilotilo mai i o’u mata. O o’u mata e pei o faamalama i le mea e nofo ai le “a’u” moni.

I le Mo Le Malosi o le Autalavou: O Se Taiala mo le Faia o Filifiliga, ua aoaoina ai i tatou e paia o tatou tino ma ia “taulimaina [o tatou tino]—ma tino o isi—ma le faaaloalo.” Tatou te faitau: “A o e faia ni faaiuga e uiga i ou laei, faiga o lou ulu, ma foliga vaaia, fesili ifo ia te oe lava, ‘Pe o ou faamamaluina ea lo’u tino o se meaalofa paia mai le Atua?’ E finagalo le Tama Faalelagi ia tatou vaai atu i le tasi ma le isi po o ai moni lava i tatou: e le na o tino faaletino ae o Ana fanau pele e i ai se taunuuga paia. Aloese mai sitaili e faamamafa pe tosina atu ai le gauai le talafeagai i lou tino faaletino nai lo le tagata ua avea ai oe o se atalii/afafine o le Atua ma se lumanai e faavavau.”

A o ou auauna atu o se peresitene o le misiona, sa ou faamanatu soo atu i faifeautalai lenei mataupu faavae, talu ai o le toatele o tagata sa laei tauagafau. “Vaai i mata,” sa ou fai atu ai i faifeautalai. “Ia iloa atu le tagata. Aua le na ona vaai i se tino. Vaai i se atalii o le Atua.”

Pe a e vaai i isi, taumafai e vaai ia i latou. Aua le faamasinoina i latou i o latou lavalava (pe leai foi) po o sitaili o lauulu. Vaai i o latou mata. Vaai i tua atu o foliga vaaia i fafo i le tagata moni o i ai i latou—o fanau a le Atua.

I le mulimuli ai i lenei manatu, e mafai ona e filifili e fai ni ou ofu ma faailoa atu oe lava i se auala e le faalavelaveina ai lou faasinomaga moni o se atalii o le Atua. E mafai ona e filifili e faigofie i le mea e mafai ai mo isi ina ia aua nei faalavelaveina ma vaai ia te oe i le tagata moni o loo e i ai. Ia ofu ma le tauagafau ma talafeagai. Ia ofu ina ia iloa ai oe e tagata ae le na o ou foliga vaaia.

O lenei auala, e te faaalia ai ua e iloa, e pei ona tatou faitau ai i le taiala Mo Le Malosi o le Autalavou , “o lou tino o se meaalofa ofoofogia mai lou Tama Faalelagi. Na Ia tuuina atu ia te oe e fesoasoani ia te oe ia avea atili e faapei o Ia.”