O Le Fiafia e ala i le Liliu Atu i Fafo
Faalagolago i le Alii e maua ai le olioli mo oe lava, ma fesoasoani i isi ia lagonaina foi.
O nisi taimi pe a tatou popole pe atuatuvale, atonu tatou te lagonaina e pei e leai so tatou malosi—pe manao foi—e aapa atu ma auauna atu. Ae e mafai e le Alii ona faamanuiaina i tatou a o tatou taumafai. O ni manatu nei e tolu.
1. Vaai i le Alii, Faasoa Atu Mea ua E Aoaoina
Ina ua uma ona liua atalii o Mosaea i le Alii, sa avea i latou ma faifeautalai maoae, ae sa le’i faamanuiaina i latou i taimi uma. E le’i faate’ia i latou, ae na latou lotovaivai. Sa faamafanafanaina i latou e le Alii, ma fetalai mai, “Ia onosai i ou puapuaga, ona Ou tuuina atu lea ia te outou o le manuia” (Alema 26:27).
O le a se taimi na faamafanafanaina ai oe e le Alii? Faasoa atu lou aafiaga i se tasi atonu e manaomia le faamalosiauga.
2. Ia I Ai le Faamoemoe i le Malumalu
Pe a tatou manaomia se malosiaga faalelagona, o le i ai i totonu o le malumalu e mafai ona fesoasoani ia i tatou e lagona ai le filemu. Ina ua uma ona nutipalaina le lalolagi ma faatofuina i le pogisa ina ua mavae le Faasatauroga o Keriso, sa faapotopoto sa Nifaē faataamilo i le malumalu. Ina ua mavae Lona Toetu, sa faaali mai Iesu ma auauna atu ia i latou (tagai i le 3 Nifae 11:1–15).
Mafaufau i soo se aafiaga faapitoa na e maua i le malumalu, latalata i le malumalu, po o le faalogo e uiga i le malumalu. O taimi uma lava e te auauna atu ai i le malumalu po o le faia o galuega o talafaasolopito o aiga, o loo e auauna atu e pei ona sa soifua ai Iesu ma aoao atu. Ua e aumaia agaga ia te Ia taitoatasi.
3. Faaaoga Au Taleni e Auauna Atu Ai
Ina ua iloa e Iesu ua fasiotia Lona tausoga o Ioane le Papatiso, sa “alu ese … i se nofoaga toafa” (Mataio 14:13). Ae ina ua Ia vaai i se vaega toatele o tagata o e na mulimuli ia te Ia, sa ia faaauau Lana galuega, ma faamaloloina e mamai ma faatinoina le vavega o le fafagaina o le faitau afe e ala i le faateleina o areto ma i’a (tagai i le Mataio 14:14–21).
Ua tuuina mai e le Alii ia i tatou meaalofa e fesoasoani e faamanuia ai isi (tagai i le Mataupu Faavae ma Feagaiga 46:11, 26). Mafaufau i se mea e te fiafia e fai, ma liliu atu i se faatinoga o le auaunaga. E mafai ona avea ma soo se mea, mai le taoina o meaai mo se tasi e oo i le faasavali o a latou taifau!