Na o Tusiga Faatekinolosi: Sau, Mulimuli Mai Ia Te A’u
O Lau Tausimea: O se Meaalofa mai le Atua.
E tuuina mai e le Tama Faalelagi ia i tatou ni meaalofa e faamanuia ai i tatou ma isi.
Ata na pueina e Christina Smith
I aso anamua, o le tausimea o se ituaiga auauna faapitoa o lana galuega o le puleaina o se aiga tele po o le siakiina o meatotino a lona matai. O nisi o tausimea na tofia foi e vaavaaia malo a o toesea le tupu. O se faatuatuaga tele lena!
Na fetalai mai le Alii “Ma ai se e maua o ia o se tausimea faamaoni, fai mea tonu, ma atamai, o le a ulufale atu i le olioli o lona Alii, ma o le a maua e ia le ola e faavavau” (Mataupu Faavae ma Feagaiga 51:19). E le o talanoa o ia e uiga i le vaavaaia o mea tautupe a se isi tagata, e ui i lea—na fetalai mai le Alii o le a tali atu tagata uma mo o latou mea (tagai i le Mataupu Faavae ma Feagaiga 104:12), ma o le toatele o tagata e le galulue mo se tupu.
“O le a la le uiga o lenei mea mo i tatou i nei aso? O a ni mea o e tausia? O le a le mea ua tuuina atu e le Atua ia te oe?
O Mea ua Tuuina Atu ia te Oe
O se tasi o faataitaiga o le tausimea lelei o le faataoto i taleni, lea na tuuina atu ai e se tagata mauoa i ana auauna taitoatasi se aofaiga patino o taleni, o se ituaiga o tupe. O le toalua o na auauna sa faaaogaina lelei a laua meaalofa ma faateleina ai a laua taleni, ma sa viia e lo laua matai le la galuega (tagai Mataio 25:14–30). O na auauna o ni tausimea lelei.
Soo se meaalofa mai le Atua o se vaega lea o au mea (tagai i le 1 Peteru 4:10). O lou tausimea e mafai ona aofia ai lou tino, au meaalofa faaleagaga, o ou tomai, ou valaauga i le Ekalesia, ma e oo lava i lou malamalama i le talalelei. O faamanuiaga maoae na, ae e finagalo le Atua e fesoasoani i Ana fanau uma . O au mea “e le mo na o [lou] manuia ae ia faamanuia ai isi.”
Ua fetalai mai le Alii, “O lo’u faamoemoe o le faia lea o mea mo la’u au paia. … Peitai e tatau ona faia i laʼu lava ala” (Mataupu Faavae ma Feagaiga 104:15–16 O le ala ua Ia filifilia e aofia ai i tatou! E mafai ona avea oe ma se tausimea atamai ma amiotonu e ala i le faaaogaina o “taleni” uma ua Ia tuuina atu ia te oe e auauna atu ai ma faamanuia ai isi tagata.
O Se Faamanuiaga mo Oe
E ui o u mea e mafai ona fesoasoani ia te oe e auauna atu ai i isi, ae o na meaalofa o se faamanuiaga sili foi lea mo oe. Ia manatua, na folafola mai e le Tama Faalelagi le ola e faavavau i tausimea faamaoni uma. E finagalo o Ia e faamanuia foi !
E faatuatuaina oe e le Tama Faalelagi, ma e fiafia, o Ia i au taumafaiga. O le faalagolago ia Iesu Keriso i le faia o le mea sili e te mafaia e avea ai ma se tausimea lelei i le taimi nei, o le a e latalata atili atu ai ia te Ia ma saunia ai oe e avea ma se tausimea lelei i le faavavau.