O Auala Tatou Te Mulimuli AIi Ia Iesu Keriso
E mafai ona tatou mulimuli ia Iesu Keriso e ala i le auai faatasi ma Ia i Lana galuega.
Fafaga A’u Mamoe, saunia e David Koch
Pe a tatou papatiso, ua tatou amataina le faagasologa o le tauaveina i o tatou luga o le suafa o Iesu Keriso. Na tusia e Peresitene Dallin H. Oaks, “O se tasi o uiga sili ona taua o le tauaveina i o tatou luga o le suafa o Keriso [o] se naunautaiga ma se tautinoga e tauave i o tatou luga le galuega a le Faaola ma Lona malo.”
O Le galuega a le Faaola “o le aumaia o le tino ola pea ma le ola faavavau o le tagata.” O le tino ola pea o se meaalofa ua uma ona faamaonia e Iesu Keriso e ala i Lona Toetu. O le ola e faavavau o le meaalofa silisili lea e mafai ona tuuina mai e le Atua i tagata. O le ola e faavavau ai o ni aiga i Lona afioaga.
Ina ia tatou maua le ola e faavavau, e tatau ona avea i tatou ma soo faamaoni o Iesu Keriso. O lona uiga tatou te maua le talalelei toefuataiina e ala i le faatuatua ia Iesu Keriso ma Lana Togiola, salamo, ia papatisoina, mauaina o le meaalofa o le Agaga Paia, ma tumau e oo i le iuga.
Auai ma le Naunautai
Ona tatou auai faatasi lea ma le Faaola i Lana galuega e ala i le fesoasoani i fanau a le Atua ia avea foi ma soo faamaoni o Iesu Keriso. E aofia ai le faasoaina atu o Lana talalelei, faapotopotoina o Isaraelu ua faataapeapeina, faataunuuina o tiutetauave i le Ekalesia a le Faaola, ma taumafai ia avea faapei o Ia.
Na aoao mai Peresitene Russel M. Nelson, “Soo se taimi e te faia ai soo se mea e fesoasoani ai i soo se tasi—i itu uma o le veli—fai se laasaga agai i luma i le osia o feagaiga ma le Atua ma maua o latou sauniga e tatau ai o le papatisoga ma sauniga o le malumalu, ua e fesoasoani e faapotopoto Isaraelu.”
Ina ia avea le galuega a le Faaola ma a tatou galuega, tatou te taulai atu i Ona faamoemoega, tausia Ana poloaiga, ma alolofa le tasi i le isi. A o tatou faia Lana galuega i Lana ala, o nisi mea e totoe mo i tatou e fuafuaina e i tatou lava. Sa tautino mai le Faaola:
“E moni Ou te fai atu, e tatau i tagata ona auai ma le naunautai i se faamoemoega lelei, ma fai mea e tele i lo latou lava loto malie, ma aumai le amiotonu tele;
“Aua ua i totonu ia te i latou le mana, lea ua latou pule ai ia te i latou lava. O le a lava le tulaga e oo i ai le faiga e tagata o mea lelei, o le a leai lava se ala o le a aveesea ai lo latou taui.”
A o tatou mulimuli i le Faaola, auai faatasi ma Ia i Lana galuega, ma fesoasoani i isi ia avea ma Ona soo faamaoni, tatou te aoao atu mea o le a Ia aoao atu, taulai atu i Lana aoaoga faavae autu, ma gauai faapitoa atu ia i latou o e matitiva, le tagolima, ma vaivai. Na aoao manino mai e le Faaola lenei mea ina ua Ia sii maia le tala a Isaia i se sunako i Nasareta:
“Ua i o’u luga le Agaga o le Alii, aua ua na faauu mai ia te a’u e folafola le tala lelei i e matitiva; ua auina mai a’u e ia e faamalolo i e loto momomo, e tala’i le saolotoga i le tafeaga, ma ia pupula mata o e tauaso, e tuu saoloto i e ua faasauaina.”
O le auai faatasi ma Iesu Keriso i Lana galuega o se mea fiafia aua o Ana galuega, fuafuaga, ma faamoemoega “e le mafai ona faalavelaveina, pe mafai foi ona leai se mea o i ai.” Mo i latou o lagona le faavaivaia, na apoapoai mai le Alii: “O le mea lea, aua le faavaivai i le faia o mea lelei, ona o lo o oulua faataatiaina le faavae o se galuega tele. Ma e mai mea iti e tutupu mai ai mea tetele.”
O Le Loto ma se Mafaufau Naunautai
E le manaomia ona tatou aumaia ni taleni po o ni tomai tulaga ese i le galuega a le Alii. O Lana tulaga manaomia ua na o se tautinoga ma se naunautaiga. Na Ia fetalai, “E manaomia e le Alii le loto ma le mafaufau malie.” E mafai e le Alii ona faia le naunau ia mafai. Ae Na Te le mafai pe o le a Ia lē faia foi i latou e mafai, ia naunau. E tusa lava po o le a lo tatou talenia, o le a Ia le faaaogaina i tatou sei vagana ua tatou tuuto atu i Lana galuega ma naunau e fesoasoani ia te Ia.
Sa faaalia e Samuelu ma Ana-Maria Koivisto le tautinoga ma le naunautai. E le’i leva ona uma le la faaipoipoga, ae siitia atu le aiga o Koivisto mai Finelani i Suetena ina ia sailia ni avanoa faigaluega. Ina ua taunuu atu, sa valaaulia Uso Koivisto e asiasi atu ia Peresitene Leif G. Mattsson, o se fesoasoani i le au peresitene o le Siteki a Göteborg Suetena. Talu ai e lē tautala Samuelu i le gagana Suetena, o lea na la talanoa ai i le gagana Peretania.
Ina ua mavae se asiasiga puupuu, sa talosagaina e Peresitene Mattsson ia Samuelu e avea ma taitai misiona a le uarota. Na faasino mai e Samuelu le mea manino, “Ae ou te le tautala i le gagana Suetena.”
Sa faalagolago atu Peresitene Mattsson i luga o lana kesi ma fesili patino atu, “Pe na ou fesili atu pe mafai ona e tautala i le gagana Suetena, pe e te naunau e auauna atu i le Alii?”
Sa tali atu Samuelu, “Sa e fesili mai pe ou te naunau e auauna atu i le Alii. Ma ou te naunau.”
Na talia e Samuelu le valaauga. Sa talia foi e Ana-Maria ia valaauga. Sa laua auauna atu ma le faamaoni ma aoao e tautatala i le gagana Suetena matagofie i le faagasologa o le ala. O le tautinoga ma le naunautai e auauna atu i le Alii ua faamatalaina ai olaga o Samuelu ma Ana-Maria. Ua laua aoaoina a’u e faapea, a tatou auauna atu, tatou te faaaogaina taleni ua tatou maua, ona fesoasoani lea o le Alii ia i tatou e faataunuu Ona faamoemoega.
Pe a tatou naunau e auauna atu, tatou te taumafai e aua le faitio pe muimui. Afai tatou te le faaeteete ma lē faatumauina se vaaiga e faavavau ma faamanatu ia i tatou lava po o ai moni lava e ona lenei galuega, atonu tatou te faitio, muimui, ma faavaivai i la tatou tautinoga ia Iesu Keriso. E mafai ona alualu i luma lenei mea i le fouvale tuusao e faasaga i le Alii. Mulimuli ane, e mafai ona mamulu atu le faatuatua ua tatou maua.
Ou te tatalo ina ia mafai ona tatou filifili i taimi uma e mulimuli ia Iesu Keriso e ala i le auai faatasi ma Ia i Lana galuega. A o tatou faia, ua tuuina mai ia i tatou “folafolaga silisili ona tetele ma taua,” e aofia ai le faamagaloga o agasala, faaolataga, ma le faaeaga. E moni, ua folafola mai ia i tatou le meaalofa silisili e mafai ona tuuina mai e le Atua—o le ola e faavavau.