Puipui Lou Malumalu

“Tuu le moe umi atu nai lo le mea e tatau ai; vave momoe ina ia outou le vaivai; alapo a’e, ina ia olaola o outou tino ma o outou mafaufau” (Mataupu Faavae ma Feagaiga 88:124). Fai mai tagata tomai faapitoa e manaomia e talavou le moe e 8–10 itula i po taitasi. Atonu o loo e mafaufau, “Ioe, ai se manaia o lena mea .” Ae taumafai pea oe. E taua tele. E ui lava o nisi mea e pei o le a’oga atonu e le mafai ona e puleaina, ae taulai atu i mea e mafai ona e pulea. Mo se faataitaiga, ia faatapulaa le taimi e te matamata ai i le tv po o lau telefonii, aemaise lava i le po. Aua nei aumaia lau masini i totonu o lou potumoe i le po.

‘Ai i le taeao. O le a faafetai atu lou tino ma lou faiai ia te oe. E moni lava. Ua toatele naua talavou e mafai ona aai i le taeao, ae latou te le faia. O lenei mea ua avea ai i latou ma ni tagata e leai ni a latou lisi o mea e fai ma e leai se taulaiga. Faaalu se taimi e ‘ai ai sina mea—soo se mea—mo le taeao e fafagaina ai oe. Po o le a lava le mea e i ai—falaoa, sisi, araisa, fualaau aina, sirio, fuamoa, yogurt, katogo—tau lava o le ’ai.

Tu i luga. Minoiminoi solo. E faapena le faigofie. Ae ua toatele naua tagata talavou e le o faia lenei mea. O le auai i se ituaiga o gaoioiga faaletino i aso uma o le a fesoasoani ia te oe e aloese ai mai le tele o faafitauli tau i le soifua maloloina i le taimi nei ma mulimuli ane. Ma o le a e maua ai se lagona lelei. E le tau tuli ia faigata pe faatulagaina. Savali i fafo. Siva na o oe i lou potu. Soo se mea lava. Na o le minoi lava.

E i ai le mea e ta’u o le soonafai. O le faaupuga “a leai se tiga, leai se mea e maua” e i ai ona tapulaa. O nisi ituaiga o tiga o se faailoga lea ua tatau ona taofi. O nisi talavou e uunaia malosi i latou lava i taaloga, malosi, po o isi gaoioiga faaletino ma e faaleagaina ai o latou tino. (O nisi taimi o tagata matutua o i latou ia e tuleia malosi i latou.) Ia maloloina, ma ia gauai atu i faailoilo o loo tuuina atu e lou tino ia te oe.

Ua aoao mai le Alii o le faatupuina ma le faamoemoe o mafaufauga tu’inanau e sese (tagai i le Mataupu Faavae ma Feagaiga 63:16). Aua le pueina ni ata o oe lava ia e lē lavalava (pe tusi ni feau faalefeusuaiga) ma auina atu i tagata e ala i se polokalama feau tusitusia. Soo se tasi lava e auina atu ia te oe na mea pe fai atu ia te oe e auina atu, e le o avea o ia ma se uo. O le taimi lava e amata ai se mafutaga po o se talanoaga i le itu lenei, o se tulaga tele lena, mumu, ma le emoemo o le faailoga MATAUTIA! O le feau tusitusia faalefeusuai e sese. E faalumaina. E taulimaina ai tino o tagata ma le lē faaaloalo. Ma le isi, e te le iloa lava po o fea e ono iu i ai se ata faaeletonika i le taimi lava e alu ai i fafo.

Ua faasa e le Alii ni mea faapitoa, e pei o le tapaa (tagai i le Mataupu Faavae ma Feagaiga 89:8). O le nikotini (o se fualaau faasāina i le tapaa) e matuā fai ma vaisu. (O nisi tagata ua tuu le faaaogaina o fualaau faasaina ua fai mai o le tuu o le ulaula sa sili atu ona faigata ona fai.) O vape e faaaoga i sikaleti e masani lava ona i ai ni nikotini. Ma e tusa lava pe leai, e i ai isi vailaau leaga. (Ma le isi, ua e faalogo o nisi taimi e pa ai maa uila i sikaleti faaeletonika? Na o le tasi lava le mafuaaga e aloese ai.)

Pe a salalau atu le luitau aupito lata mai i ala o faasalalauga faaagafesootai, e te le tau faia. O nisi o nei mea e i ai se tulaga lamatia o le faaleagaina o le tino. O isi e lamatia ai meatotino a isi tagata. Toetoe lava o i latou uma e matuai valea lava, ma e le o oe o se vale. Ioe, e mafai ona e maua le fiafia. Ae ia e matapoto. E pei ona saunoa mai le perofeta o Iakopo, “E, ia outou popoto; o le a se isi mea e mafai ona ou fai atu ai?” (Iakopo 6:12).