Na Fesoasoani le Upu Moni ia te Au e Sola Ese Ai mai Ponokalafi

Saunia e Garrett M.

Sa na o le fesoasoani a Iesu Keriso ma Ana upumoni na mafai ai ona ou faatoilaloina la’u tauiviga ma ponokalafi.

I le 12 o o’u tausaga, na ou faalogo ai i tagata o talanoa e uiga i mea lē talafeagai i le a’oga. E i ai taimi e manatu ai nisi o a’u uo e malie le faaali mai ia te au o ata ponokalafi. Mulimuli ane, na ou fia iloa ma faaosoosoina ai a’u e sailiili atili. Sa ou tosina atu i ponokalafi, lea na tele se vaega o lo’u olaga na alu ai mo le tele o tausaga. E mautinoa lava na aafia tele ai a’u.

Sa ou fefe e talanoa i se tasi e uiga i la’u tauiviga ma ponokalafi aua ou te lei manao e ese se manatu o se tasi ia te au. Ina ua maua au e o’u matua ma otegia au e uiga i ai, sa ou maasiasi ma lagona le leaga tele ma le tausalaina. Ia, ou te fiafia na la faia, ma maimau pe ana vave ona ou ta’u atu ia i la’ua. Sa la alolofa ia te au i lea tulaga ma fesoasoani ia te au e faatoilalo a’u tauiviga.

Sa uunaia au e o’u matua e talanoa i lo’u epikopo. Sa ou teena mo sina taimi, ae ina ua iu ina ou talanoa atu ia te ia, sa malamalama o ia. Sa ia aoaoina au e uiga i le faagasologa o le salamo. I le aluga o taimi, sa ia fesoasoani ia te au ia ou salamo. Sa ia uunaia au e faatu ni sini laiti ma amata ni mausa lelei e pei o le tatalo, faitauina o au tusitusiga paia, ma le faatumuina o lo’u taimi i mea lelei. O nei mausa e mafai ona valaaulia ai le Agaga ma fesoasoani ia te au e faalagolago ai i le Faaola seia oo ina ou le toe manao e toe matamata i ponokalafi.

Sa ou tauivi mo sina taimi, ae faatasi ai ma le fesoasoani a o’u matua, le epikopo, ma le Alii, sa ou manumalo ai. O loo faaosoosoina pea au i nisi taimi, ae sa ou galue malosi lava ina ia oo i le mea ua ou i ai. Ua silia nei ma le lua tausaga o o’u mama. Ua sili atu nei lo’u mautinoa. I lenei malaga atoa, ua ou aoaoina ai ni nai mea taua.

Upumoni e Faavavau e uiga i o Tatou Tino

I le Mo Le Malosi o le Autalavou: O Se Taiala mo le Faia o Filifiliga na ou aoaoina ai e paia o tatou tino. E tusa lava po o a ou foliga po o le a foi le vaaiga a isi ia te oe, o lou tino o loo i le faatusa o le Atua.

Ua aoao mai leMataupu Faavae ma Feagaiga 130:22 e faapea o le Tama Faalelagi ma Iesu Keriso e i ai tino o aano ma ivi, ae e leai le Agaga Paia. E pei o se malumalu, o o tatou tino foi o “se nofoaga e mafai ona nofo ai le Agaga.” E manaomia ona tatou tausia faalelei i latou. Ou te manao e faaaloalo i lo’u tino e ala i le tausia o le mama, maloloina, ma agavaa e maua ai le Agaga e faatasi ma au.

Ua ou aoaoina foi o lagona faalefeusuaiga e paia. E le o se agasala. O le taimi tatou te taumafai ai ma le loto i ai e fafagu i latou i fafo atu o le faaipoipoga pe faia ni gaoioiga le talafeagai ia i latou, ona avea ai lea o i latou ma agasala. E finagalo le Atua ia tatou maua ni olaga fiafia ma ni aiga e mafai ona tatou faatasi ai e faavavau. O lagona feusuai o se vaega taua o le fuafuaga a le Atua. Na aoaoina au e le taiala Mo Le Malosi o le Autalavou e le mafai ona e faaaloalo i lou tino pe afai e te le faaaloalo i na lagona.

Faamafanafanaga ma Fesoasoaniga

Ou te fiafia i musika. Ou te fiafia e usu pese ma faalogologo i musika faagaeetia e pei o viiga ma pese o le StrivetoBe e fesoasoani ia te au e lagona ai le Agaga. O se tasi o mea ou te fiafia i ai o le “E Mafai Ona Ou Faia Mea Uma.” Sa ou aoao “Ou te mafaia mea uma lava i le faamalosi mai o Keriso ia te a’u” (Filipi 4:13).

O Iesu Keriso o lo’u papa. O Ia o lo’u malamalama. O Ia o lo’u Faaola ma le Togiola ma le tele o isi mea. E alofa o Ia ia i tatou ma Na te manatu mo i tatou. E finagalo o Ia ia tatou manuia ma faia mea sili tatou te mafaia. O le a Ia fesoasoani mai ia i tatou e tusa lava po o le a. E faamafanafanaina au i lenei mea aua e tele ou faaletonu. E ese le matagofie o le alofa tele o se tasi ofoofogia ia te au. O loo ou taumafai i le mea sili ou te mafaia ina ia avea faapei o Ia—mo Ia.

E le afaina po o le a le mea o loo e oo i ai pe faafia foi ona e toilalo pe pau. A o e faalagolago i le Faaola ma Lana Togiola, o le a Ia si’i pea oe i luga ma ave oe i le laina faatini. Ou te iloa sa na ona mafai lava ona ou faatoilaloina o la’u tauiviga ma ponokalafi faatasi ai ma Lana fesoasoani. Faatasi ai ma Iesu Keriso, e mafai moni lava ona e manumalo i soo se mea.

E alaala le tusitala i Georgia, ISA.