Sau, Mulimuli Mai ia te A’u

O OaNatia

Saunia e Eric D. Snider

O Mekasini a le Ekalesia

Suesue loloto teisi i tusitusiga paia.

E mafai faapefea ona sili le faavavau? E le mafai ona e mafaufauina.

Sa iloa e le Au Paia anamua o le a latou feagai ma tofotofoga. Ae na folafola atu e le Faaola i e usiusitai ma faamaoni o nei luitau o le a sili atu nai lo taui.

“E le mafai ona outou vaaia i o outou mata faalenatura, i le taimi nei, le fuafuaga a lo outou Atua e faatatau i mea o le a oo mai pe a mavae le taimi nei, ma le mamalu e mulimuli mai pe a mavae puapuaga e tele” (Mataupu Faavae ma Feagaiga 58:3).

E maoae lea folafolaga.

Sa fai mai e le Aposetolo o Paulo se mea e taitutusa: “O mea e lei vaaia e mata, e lei lagona foi e taliga, e lei oo foi i le loto o se tagata, o mea ia ua saunia e le Atua mo i latou o e alofa ia te ia” (1 Korinito 2:9).

I se isi faaupuga: O faamanuiaga o loo faatalitali mai ia i tatou i le faavavau mo le faamaoni i le Atua o le a matua maoae lava tatou te le mafaufauina! Aua la e te popole i faamatalaga auiliili. Po o le a lava, o le a tatou fiafia.

O nisi taimi e faatagaina ai i tatou e le Alii e filifili.

Mataupu Faavae ma Feagaiga 60–62

E masani ona tuuina mai e le Atua ia i tatou le malosi i le auala tatou te usiusitai ai ia te Ia. O nisi o faataitaiga:

I le Mataupu Faavae ma Feagaiga 60:5, ua poloaiina ai e le Alii nisi o le Au Paia anamua e o “vave” i St. Louis—ae fai mai “e le afaina” pe latou te fausia se vaa pe faatau se vaa.
I le 61:22, ina ua uma ona ta’u atu i le usoga ia aua nei malaga i le vai mo le taimi nei, ua fetalai mai le Alii “pe a mavae sina mea itiiti” e mafai ona latou filifili pe o i le vai po o le laueleele, “e tusa ma a latou faamasinoga i le lumanai.”
I le 61:35, ua fetalai mai le Alii e mafai e alii ona “malaga faatasi [i le vaega e tasi], pe taitoatasi, e pei ona foliga mai e lelei ia i latou”—ae faaopoopo atu faapea i soo se tulaga lava, e finagalo o Ia ia Reynolds Cahoon ma Samuel H. Smith e avea ma soa.

E le tatau ona poloaiina i tatou i mea laiti uma (tagai i le Mataupu Faavae ma Feagaiga 58:26–27). A leai se taitaiga patino ua tuuina mai, tatou te faaaogaina o tatou lagona masani ma le malamalamaaga faaleagaga, ma mulimuli i le mataupu faavae o loo i le Mataupu Faavae ma Feagaiga 62:8: “O nei mea e tumau ia te outou e faia e tusa ma le faamasinoga ma taitaiga a le Agaga.”