Saili le Olioli
Vaavaai mo se taimi fiafia se tasi i aso taitasi, ma o le a e vaaia ai faamanuiaga a le Atua.
O nisi taimi e faigata ai ona fiafia. Afai na e lagonaina le faanoanoa ia te oe lava ona o le le lagonaina o le fiafia 24/7, ia iloa e le afaina ma o se mea e masani ai e lugā ma lālō. O le mea moni, o le olaga lava lena!
Ua tatou aoao i le 2 Nifae 2:25, “Na pa’ū Atamu ina ia i ai tagata; ua ola tagata ina ia latou maua le olioli.” Ma’eu se tala fiafia! O se vaega tele o lo tatou i ai iinei i le lalolagi e faatatau i le mauaina o le olioli. Ae e faapefea ona tatou faia lena mea i aso le lelei?
Se Taimi Fiafia i Aso Taitasi
O nisi aso atonu e lagonaina sina susulu teisi atu ma sili atu ona faafiafiaina nai lo isi, ae e mafai ona e maua ni taimi o le olioli i soo se aso. Na tuuina mai e Elder Dallin H. Oaks o le Korama a Aposetolo e Toasefululua faapenei:
“E seāseā lava tatou mauaina se mea tatou te le o sailia.
“O e sailia le olioli?
O se mea e fesoasoani ia te au e saili ai le olioli—aemaise lava i na aso po o vaiaso faigata—o le faailoaina lea o se taimi fiafia se tasi i aso taitasi.
O nei taimi e le tatau ona tetele, suia ai olaga, pe ofoofogia. E mafai ona avea ma mea e pei o le mauaina o se feau tusitusia manaia mai se uo, matauina o lanu susulu o se goto ifo o le la, faitauina o se mau sa lagona e pei ua na o au lava e faatatau i ai, po o le fiafia i meaai e sili ona ou fiafia i ai!
Pe a ou sailia ma le loto i ai ma faailoa atu ia le itiiti ifo ma le tasi se “taimi fiafia” i aso taitasi, e fesoasoani ia te a’u e lagona ai le olioli sili atu ma iloa ai le tele o faamanuiaga ua tuuina mai e le Atua ia te a’u, tetele pe laitiiti.
Mafaufau e taumafai e saili se taimi fiafia se tasi i aso taitasi. Fai se lisi e fesoasoani ia te oe e mata’itu ai i latou. A o faatupula’ia lau lisi, o le a faapena fo’i lou olioli!